Read Central Bicolano Ezekiel 7 Bible Online

Ezekiel 7 - Central Bicolano bible

Ezekiel 7

¹Nagtaram sako an Kagurangnan,

²“Aki nin tawo, iyo ini an tataramon ko, an Kagurangnan Dios, para sa daga nin Israel: Iyo na ini an kataposan para sa bilog na daga!

³“Israel, nag-abot na an kataposan mo. Mamamatean mo an sakuyang kaanggotan; huhukoman taka sosog sa saimong mga ginibo, asin papadusahan taka huli kan saimong makauuyam na mga gawe.

⁴Dai taka papaligtason o maheherakan. Papadusahan taka huli kan makauuyam na mga gawe mo, tanganing maaraman mo na ako an Kagurangnan.”

⁵Iyo ini an tataramon nin Kagurangnan Dios: “Sunod-sunod na kasakitan an maabot saimo.

⁶Tapos na an gabos. Iyo na ini an kataposan. Tapos ka na.

⁷Nagdadangadang na an kataposan para sa mga nag-eerok sa daga. Harani na an oras na dai na magkakaigwa nin mga maoogmang pagtiripon sa kabukidan, kundi kariribokan.

⁸“Madali ko nang iula saimo an sakuyang kaanggotan; huhukoman taka sosog sa saimong mga ginibo, asin papadusahan taka huli kan saimong makauuyam na mga gawe.

⁹Dai taka paliligtason o maheherakan. Papadusahan taka huli kan makauuyam na mga gawe mo, tanganing maaraman mo na ako an Kagurangnan, asin ako an nagpapadusa saimo.”

¹⁰Nagdadangadang na an aldaw! Namumurak na an inhustisya asin nagsusupang na an kapaabaw-abawan.

¹¹An kadahasan nagbubunga nin orog na katampalasanan. Mayo nin matatada sa saindang pagsadiri, ni sa saindang kayamanan, kaomawan asin kamurawayan.

¹²Nagdadangadang na an panahon. Harani na an aldaw na dai na magkakaigwa nin kahulogan an pagbakal ni an pagpabakal, huli ta an kaanggotan nin Dios maabot sa gabos.

¹³Mayong negosyante na mabubuhay nin halawig tanganing makabangon giraray sa saiyang pagkalugi, huli ta para sa gabos an labi-labing kaanggotan nin Dios. An mga maraot dai makakaligtas sa kagadanan.

¹⁴Pinatanog na an trompeta asin nag-aandam na an gabos. Alagad mayo maski saro na maduman sa gera, huli ta madatong sa gabos an labi-labing kaanggotan nin Dios.

¹⁵Igwa nin ralaban sa mga tinampo asin igwa nin helang saka gutom sa mga harong. An mga nasa luwas kan syudad magagadan sa ralaban; an mga nasa laog kan syudad magigin biktima nin helang saka gutom.

¹⁶An nagkapira makakadulag pasiring sa kabukidan siring sa mga salampating tinakot sa mga kapantayan. Sinda gabos mag-aagrangay para sa saindang mga kasalan.

¹⁷Magigin maluya an saindang mga kamot asin tatakigan an saindang mga tuhod.

¹⁸Magubing sinda nin sako, asin matatakot nin labi-labi. Aarisan ninda an saindang payo asin masosopog sinda gabos.

¹⁹An saindang mga bulawan saka plata itatapok ninda sa mga tinampo siring sa mga ati, huli ta dai sinda ikakaligtas kan mga iyan kun iula na nin Kagurangnan an saiyang kaanggotan. Dai ninda iyan magagamit sa paghale kan saindang kagutoman. An bulawan saka plata iyo an nagdara sainda sa kasalan.

²⁰Kaidto ipinag-orgulyo ninda an saindang magagayon na mga alahas, alagad an mga iyan ginamit ninda sa paggibo nin makauuyam na mga ladawan. Kaya an mga bagay na iyan ginibo nin Kagurangnan na magin maati para sainda.

²¹“Tutugotan ko an mga dayuhan na habonan sinda,” an sabi nin Kagurangnan. “Ipapakua ko an mga iyan sa mga maraot na tawo sa daga asin babasang-basangon ninda iyan.

²²Dai ako makikilabot maski basang-basangon ninda an mahalaga kong Templo, kun laogon iyan kan mga parahabon dangan digtaan.

²³“Maribong an gabos—an daga pano nin panggagadan asin an mga syudad pano nin kadahasan.

²⁴Dadarahon ko digdi an pinakamaraot na mga nasyon tanganing sadirihon an saindang mga harong. Manluluya an boot kan saindang maiisog na mga lalaki, kun digtaan na kan mga nasyon an saindang mga lugar na pinagsasambahan.

²⁵Pag-abot kan kasakitan, mahanap sinda nin katoninongan alagad dai nanggad ninda iyan makukua.

²⁶Sunod-sunod na maabot an kasakitan asin an maraot na bareta. Makikimaherak sinda sa mga propeta na ipahayag sainda an bisyon na nahiling ninda. An mga padi mayo nang ikakatukdo sa mga tawo, asin an mga kamagurangan mayo nang ikakataong hatol.

²⁷Magmomondo an hade, mawawaraan nin paglaom an prinsipe, asin tatakigan an mga tawo sa takot. Papadusahan ko an gabos huli kan saindang ginibo, asin huhukoman ko sinda siring kan paghukom ninda sa iba; dangan maaraman ninda na ako an Kagurangnan.”