Read Central Bicolano Ezekiel 9 Bible Online

Ezekiel 9 - Central Bicolano bible

Ezekiel 9

¹Dangan nadangog kong nagkurahaw an Dios, “Dumigdi kamo, mga lalaking mapadusa sa syudad. Daraha nindo an saindong mga armas.”

²Hale sa trangkahan na nasa luwas kan Templo sa amihan, nag-abot tolos an anom na lalaki, na an lambang saro may armas. Kaiba ninda an sarong lalaking nakagubing nin lino, na may darang sarong pansurat. Naglaog sinda dangan nagtindog sa may bronseng altar.

³Dangan an kamurawayan kan Dios nin Israel nag-itaas hale sa mga kerubin, saen dating namumugtak ini, asin nagpasiring sa may palaog kan Templo. Inapod nin Kagurangnan an lalaking nakagubing nin lino,

⁴dangan sinabihan, “Maglibot ka sa bilog na syudad nin Jerusalem asin markahan mo an angog kan lambang saro na nag-aagrangay asin nasasakitan huli kan gabos na makauuyam na mga bagay na ginigibo sa syudad.”

⁵Dangan sinabihan nin Dios an iba pang mga lalaki, “Magsunod kamo saiya sa paglibot sa syudad dangan manggadan kamo. Dai nindo pagpaligtason an siisay man; dai kamo maherak sa kiisay man.

⁶Gadanon nindo an mga gurang na lalaki, an mga hoben na lalaki, an mga hoben na babae, mga ina asin mga aki. Alagad dai nindo pagdutaan an siisay man na may marka sa angog. Magpoon kamo digdi sa sakong Templo.” Kaya pinonan ninda an panggagadan huli sa paggadan kan mga lider na nagtitindog duman sa Templo.

⁷Sinabihan nin Dios an armadong mga lalaki, “Digtaan nindo an Templo. An mga patyo kaiyan panoa nindo nin mga bangkay. Lakaw na kamo!” Kaya pinonan ninda an panggagadan kan mga tawo sa syudad.

⁸Mantang nanggagadan sinda, nabayaan akong mayong kaiba. Nagdapa ako dangan nagkurahaw, “Kagurangnan Dios, tutunawon mo daw an natatada sa Israel sa saimong labi-labing kaanggotan sa Jerusalem?”

⁹Nagsimbag an Dios, “Dakula nin marahay an kasalan kan mga tawo sa Israel asin Juda; an daga pano nin dugo asin an syudad pano nin inhustisya. Nagsasabi sinda, ‘Pinabayaan nin Kagurangnan an satong daga asin dai niya kita mahihiling!’

¹⁰Alagad dai ko sinda paliligtason o maheherakan; gigibohon ko sainda an ginibo ninda sa iba.”

¹¹Dangan an lalaking nakagubing nin lino nagbalik asin nag-osip sa Kagurangnan, “Ginibo ko na an saimong mga pagboot.”