Read Central Bicolano Daniel 8 Bible Online

Daniel 8 - Central Bicolano bible

Daniel 8

¹Kan ikatolong taon kan paghahade ni Belsazzar, nahiling ko an saro pang bisyon.

²Sa bisyon, nahiling ko an sakong sadiri sa laog kan kudal kan syudad nin Susa sa probinsya nin Elam. Nagtitindog ako sa tampi kan Salog nin Ulai,

³asin yaon duman sa tampi kan salog an sarong lalaking karnero na igwang halabang sungay, an saro mas halaba saka bago ki sa saro.

⁴Minasdan ko an lalaking karnero na nagsusuag pasiring sa solnopan, sa amihan asin sa habagat. Mayo nin hayop na pwedeng umatubang saiya o makadulag sa saiyang kapangyarihan. Ginigibo niya an saiyang mawilihan asin nagin mapaabaw-abaw siya.

⁵Mantang hinohorophorop ko an kahulogan kaini, igwa nin sarong lalaking kanding na nagdadalagan na nagtunga hale sa solnopan. Marikas nin marahay an pagdalagan kaini asin dai na nagduduta an saiyang mga bitis sa daga. Igwa siya nin sarong sungay sa pagultanan kan duwa niyang mata.

⁶Dinalagan niya an lalaking karnero, na sakong nahiling na nagtitindog sa tampi kan salog, asin dinaguso sa bilog niyang kosog.

⁷Minasdan ko siyang sinasalakay an lalaking karnero. Anggot siyang marahay asin tinamaan niya an karnero na ikinabari kan duwang sungay kaini. Mayo nin kosog an karnero tanganing umatubang saiya, kaya nakatapok siya sa daga dangan natimaktimakan; mayo nin siisay man na pwedeng magligtas saiya.

⁸Orog na nagin mapaabaw-abaw an kanding, alagad kan dakula nang marahay an saiyang kapangyarihan, nabari an saiyang sungay, asin sa lugar kaiyan may nagtungang apat na sungay, na an lambang saro nakaatubang sa ibang direksyon.

⁹An saro sa apat na sungay nagsanga nin sadit na sungay, na an kapangyarihan nakakaabot sa habagat saka sa sirangan asin pasiring sa Dagang Panuga.

¹⁰Orog na nagkosog an sadit na sungay sagkod na sinalakay kaini an hukbo nin langit, an mismong mga bitoon asin itinapok kaini an nagkapira sainda sa daga dangan tinimaktimakan.

¹¹Maski an Prinsipe kan langitnon na hukbo dai kaiyan ginalangan. Pinaontok kaiyan an aroaldaw na atang na idinolot sa Prinsipe, asin ginaba an Templo.

¹²Embes na mag-atang duman, an mga tawo nagkasala sa Templo, asin itinapok sa daga an totoong relihiyon. Nagibo kan sungay an gabos niyang boot na gibohon.

¹³Dangan nadangog kong hinapot kan sarong anghel an saro pang anghel, “Sagkod nuarin magpapadagos an mga bagay na ini na nahiling sa bisyon? Sagkod nuarin riribayan nin makangirhat na kasalan an aroaldaw na atang? Sagkod nuarin titimaktimakan an langitnon na hukbo saka an Templo?”

¹⁴Nadangog ko an simbag kan anghel, “Magpapadagos iyan sa laog nin mil syento singkwentang aldaw; mga aldaw na dai idodolot an pangbanggi asin pang-agang atang. Dangan hihirahayon an Templo.”

¹⁵Naghingowa akong masabotan an kahulogan kan bisyon, kan biglang magtunga sa atubang ko an sarong nakakaagid sa tawo.

¹⁶Dangan nadangog ko an sarong tingog na nag-apod hale sa ibong kan Salog nin Ulai, “Gabriel, paliwanagan saiya an kahulogan kan saiyang nahiling.”

¹⁷Nagdolok sako si Gabriel asin nagtindog sa kataed ko. Natakot ako nin marahay kaya natumba ako sa daga. Nagsabi siya sako, “Aki nin tawo, saboton mo na an bisyon ipinapanongod sa kataposan kan kinaban.”

¹⁸Mantang nagtataram siya, nadismayo ako alagad kinapotan niya ako asin pinatindog.

¹⁹Nagsabi siya, “Ipinapahiling ko saimo an magigin bunga kan kaanggotan nin Dios. An bisyon ipinapanongod sa panahon kan kataposan.

²⁰“An lalaking karnero na nahiling mo na igwang duwang sungay, iyo an kahadean nin Media saka Persia.

²¹An kanding iyo an kahadean nin Grecia, asin an sungay sa tahaw kan duwang mata kaiyan iyo an enot na hade.

²²An apat na sungay na nagtunga pakatapos na mabari an enot na sungay iyo an apat na kahadean na magigin bunga kan pagkabanga kan nasyon, alagad bakong arog kakosog an mga iyan sa enot na kahadean.

²³“Kun madali na an kataposan kan mga kahadean na idto, asin nagin maraot sinda kaya kaipuhan nang padusahan, magkakaigwa nin sarong hade, na matagas an payo, maraot asin madaya.

²⁴Orog siyang magkokosog—alagad bakong huli kan sadiri niyang kapangyarihan. Magdadara siya nin karatan asin magigibo niya an anoman na saiyang mawoton. Dadaogon niya an mga makosog na tawo asin an banwaan nin Dios.

²⁵Huli sa saiyang katusohan, magigibo niya an anoman na pandadaya. Magigin mahambog siya asin dakul an gagadanon niya na mayo nin patanid. Tutumangan niya an Hade nin mga hade, alagad maroronot siya bakong huli sa kapangyarihan nin tawo.

²⁶Mangyayari an bisyon na ini dapit sa pangbanggi asin pang-agang atang na ipinaliwanag saimo. Alagad hilomon mo ngona ngunyan, huli ta haloy pang panahon bago mangyari iyan.”

²⁷Nanluya an sakong boot asin naghelang ako sa laog nin nagkapirang aldaw. Dangan nagbangon ako asin nagbalik sa trabahong itinalaan sako kan hade, alagad naribong ako kan bisyon asin dai ko ini nasabotan.