Read Central Bicolano Hosea 1 Bible Online

Hosea 1 - Central Bicolano bible

Hosea 1

¹Ini an mensahe na itinao nin Kagurangnan ki Oseas na aking lalaki ni Beeri kan panahon na si Uzzias, Jotam, Ahaz, saka si Ezekias iyo an nagin mga hade nin Juda, asin kan si Jeroboam na aking lalaki ni Jehoas iyo an hade nin Israel.

²Kan an Kagurangnan enot na magtaram sa Israel sa paagi ni Oseas, sinabihan niya ini, “Lakaw dangan mag-agom ka; an agom mo magigin bakong maimbod saimo, asin an mga aki mo magigin arog man saiya. Sa parehong paagi binayaan ako kan sakong banwaan asin dai sinda nagin maimbod sako.”

³Kaya inagom ni Oseas an sarong babae na an ngaran Gomer, na aki ni Diblaim. Pakapangaki ni Gomer kan saindang matua, na sarong lalaki,

⁴sinabihan nin Kagurangnan si Oseas, “Ngaranan mo siyang ‘Jezreel,’ huli ta dai na mahahaloy, papadusahan ko an hade nin Israel huli kan mga panggagadan na ginibo kan ginikanan niyang si Jehu sa Jezreel. Tataposon ko na an paghahade kan pamilya ni Jehu.

⁵Sa panahon na iyan, raraoton ko an kapangyarihan kan hukbo nin Israel sa Kapantayan nin Jezreel.”

⁶Nagbados giraray si Gomer dangan nangaki nin sarong babae. Sinabihan nin Kagurangnan si Oseas, “Ngaranan mo siyang ‘Dai Namotan,’ huli ta dai na ako mamomoot sa mga Israelita asin dai ko na sinda papatawadon.

⁷Alagad mamomotan ko an mga taga Juda. Ako, an Kagurangnan na saindang Dios, an maligtas sainda, bakong sa paagi nin gera—o sa espada, pana saka bosog o sa mga kabayo asin mga parakabayo.”

⁸Pakatapos na butason ni Gomer an aki niyang babae, nagbados giraray siya asin nangaki nin sarong lalaki.

⁹Sinabihan nin Kagurangnan si Oseas, “Ngaranan mo siyang ‘Bako Kong Banwaan,’ huli ta an mga taga Israel bako ko nang banwaan, asin bako na ako an saindang Dios.”

¹⁰An mga taga Israel magigin siring kadakul sa baybay kan dagat, na dai pwedeng takadon o bilangon. Ngunyan sinasabihan sinda nin Dios, “Bako ko na kamong banwaan,” alagad maabot an aldaw na sasabihan niya sinda, “Kamo an mga aki kan Dios na buhay!”

¹¹Magkakasararo giraray an mga taga Juda saka an mga taga Israel. Mapili sinda nin saro sanang lider, asin siring sa dati, madakul sinda saka mauswag sa saindang daga. Iyo, magigin dakula an aldaw nin Jezreel!