Read Central Bicolano Hosea 10 Bible Online

Hosea 10 - Central Bicolano bible

Hosea 10

¹An Israel nakaagid sa balagon nin ubas na pano nin bunga. Kan magdakul an saiyang bunga, nagdakul man an pinatindog niyang mga altar. Kan mag-orog an bunga kan saiyang daga, orog man na naggayon an ginibo niyang sagradong mga hariging gapo na saiyang sinasamba.

²Kaipuhan na magtios ngunyan an mga tawong madaya an puso huli kan saindang mga kasalan. Gagabaon nin Dios an saindang mga altar asin raraoton niya an saindang sagradong mga harigi.

³Dai mahahaloy, magsasabi an mga tawong ini, “Mayo kami nin hade huli ta dai kami natakot sa Kagurangnan. Alagad ano an magigibo nin sarong hade para sa samo?”

⁴Mayo nin kahulogan an saindang mga sinasabi; naggibo sinda nin bakong totoong mga sumpa asin mayong halagang mga tipan. An hustisya nagin inhustisya, na nagtatalubo arog sa nakakahudong na doot sa sarong inaradong oma.

⁵Matatakot saka mamomondo an mga tawong nag-eerok sa syudad nin Samaria huli sa pagkawara kan bulawan na baka sa Bet-aven. An pagkawarang iyan pagtatangisan kan mga tawo saka kan mga padi na naglilingkod sa dios-dios na idto. Maghahaya sinda sa panahon na halean na kan saiyang kamurawayan an bulawan na torong baka.

⁶Dadarahon iyan sa Asiria bilang buhis sa dakulang emperador. Mapapasopog an Israel huli kan hatol na saiyang sinunod.

⁷An hade kan Samaria iaanod, siring sa sarong pedaso nin kahoy na nasa tubig.

⁸Magkakagaraba an mga lugar na pagsasambahan sa kabubuldan nin Aven, saen nagsasamba nin mga dios-dios an banwaan nin Israel. Matalubo sa mga altar ninda an mga tonok saka doot. Maapod an mga tawo sa mga bukid, “Tagoa kami!” asin sa mga bulod, “Tahobi kami!”

⁹Nagsasabi an Kagurangnan, “Dai nag-ontok sa pagkasala an banwaan nin Israel laban sako poon pa kan magkasala sinda sa Gibea. Kaya aaboton sinda nin gera sa Gibea.

¹⁰Sasalakayon ko an makasalan na banwaan na ini asin papadusahan ko sinda. Magkakasararo an mga nasyon laban sainda asin papadusahan sinda huli kan kadakul nindang mga kasalan.

¹¹“Kaidto an Israel nakakaagid sa sarong ogbon na babaeng baka na pinatood sa pagginik. Alagad sasakalan ko an magayon niyang liog para sa mas magabat na trabaho. Dapat na mag-arado an Juda saka magsurod an Israel.

¹²Nagsabi ako, ‘Aradohon nindo asin tanoman nin katanosan an dai pa natatanoman na daga, dangan anihon an mga biyaya na magigin bunga kan saindong pagigin maimbod sako. Panahon na tanganing magbalik kamo sako, an saindong Kagurangnan, asin madatong ako dangan mawaras nin mga biyaya sa saindo.’

¹³Alagad embes na gibohon nindo iyan, nagtanom kamo nin karatan asin nag-ani kan bunga kaiyan. Kinakan nindo an bunga kan saindong mga kaputikan. “Huli ta nagsarig kamo sa saindong mga karwahe asin sa dakul nindong soldados,

¹⁴madatong sa saindong banwaan an gera dangan magagaba an gabos nindong bantayan. An aldaw na iyan makakaagid sa aldaw na rinaot ni Hadeng Salman an syudad nin Bet-arbel sa sarong gera; nagkaroronot kaidto an mga ina kaiba an saindang mga aki.

¹⁵Siring kaiyan an mangyayari saindo, mga taga Betel, huli kan dakulang karatan na saindong ginibo. Pagpoon pa sana kan ralaban, magagadan an hade nin Israel.”