Read Central Bicolano Hosea 13 Bible Online

Hosea 13 - Central Bicolano bible

Hosea 13

¹Kaidto, kun minataram an tribu ni Efraim, nagkakatarakot an ibang tribu nin Israel, huli ta an tribung ini ginagalangan sa Israel. Alagad nagkasala an mga tawo huli sa pagsamba ki Baal, asin huli kaini, magagadan sinda.

²Padagos sinda sa pagkasala huli sa paggibo nin mga metal na ladawan na pagsasambahon—mga dios-dios na plata, na minukna kan isip nin tawo, na ginibo kan mga kamot nin tawo. Dangan minasabi sinda, “Pagdolot kamo nin mga sakripisyo sa sainda!” Paanong nakakahadok an tawo sa mga dios-dios—mga dios-dios na pormang torong baka!

³Kaya magkakawarara an mga tawong siring kaini, arog sa alopoop sa pagkaaga, arog sa ambon na nawawara amay pa an aldaw. Makakaarog sinda sa dagami na ipinapalid kan doros, arog sa asong hale sa sarong pugon.

⁴Nagsasabi an Kagurangnan, “Ako an Kagurangnan na saindong Dios, na nangenot saindo paluwas sa Egipto. Mayo kamo nin ibang Dios kundi ako sana. Ako sana an saindong paraligtas.

⁵Ako an nag-ataman saindo sa mamarang daga sa kalangtadan.

⁶Alagad kan makalaog kamo sa marahay na daga asin magkabarasog kamo, nagin mapaabaw-abaw kamo dangan nalingawan nindo ako.

⁷Kaya sasalakayon ko kamo siring sa sarong leon. Arog sa sarong leopardo, hihipaan ko kamo sa aagihan nindo.

⁸Sasalakayon ko kamo siring sa sarong oso na nawaraan kan saiyang mga ogbon, saka roronoton ko an saindong mga daghan. Siring sa sarong leon, kakakanon ko kamo, asin pepedasohon arog sa pagpedaso kan sarong lalaw na hayop.

⁹“Roronoton ko kamo, banwaan nin Israel! Siisay an makakatabang saindo?

¹⁰Naghagad kamo nin hade saka mga lider, alagad paano ninda ikakaligtas an nasyon?

¹¹Sa kaanggotan, tinawan ko kamo nin mga hade, asin sa labi-labi kong kaanggotan hinale ko sinda.

¹²“Nakatala an mga kasalan asin karatan nin Israel; nakasaray an mga talaan na iyan.

¹³An Israel igwa nin oportunidad na mabuhay, alagad hinaboan niya iyan; arog siya sa sarong omboy na madali nang mamundag, alagad habong magluwas sa tulak nin saiyang ina.

¹⁴Dai ko ililigtas an banwaan na ini sa kinaban kan mga gadan o sa kapangyarihan nin kagadanan. Kagadanan, padagosa an pagpapasakit mo! Kinaban kan mga gadan, padagosa an panggagaba mo! Dai ko na nanggad maheherakan an banwaan na ini.

¹⁵Maski pa magtalubo an Israel siring sa mga doot, ipapadara ko an mainit na doros sa sirangan hale sa desyerto na iyo an mapamara kan saindang mga burabod saka mga bubon. Iyo man iyan an makua kan gabos na bagay na mahalaga.

¹⁶Kaipuhan na padusahan an Samaria huli ta nagrebelde iyan sako. Magagadan sa gera an saiyang mga namamanwaan; roronoton sa daga an saiyang mga omboy asin lalaslason an mga tulak kan mga bados na babae.”