Read Central Bicolano Hosea 14 Bible Online

Hosea 14 - Central Bicolano bible

Hosea 14

¹Magbalik kamo sa Kagurangnan na saindong Dios, O banwaan nin Israel. An saindong kasalan iyo an nakapatumba saindo.

²Magbalik kamo sa Kagurangnan, asin an pamibing ini iyo logod an saindong dolot sa saiya: “Patawada an gabos ming kasalan asin dangoga an samong pamibi, dangan oomawon mi ika siring sa samong ipinanuga.

³Dai nanggad kami ikakaligtas nin Asiria, asin dai man kami matatabangan kan mga kabayong panggera. Dai na nanggad kami masabi sa samong mga dios-dios na sinda an samong Dios. Huli ta sa saimo, Kagurangnan, nakakakua nin pagkaherak an mga ilo.”

⁴Nagsasabi an Kagurangnan. “Papabalikon ko giraray sako an sakong banwaan. Bilog na puso ko sindang mamomotan; bako na akong anggot sainda.

⁵Ako magigin arog sa uran sa sarong mamarang daga para sa banwaan nin Israel. Mamumurak sinda siring sa lirio; magigin pusog an saindang pagkagamot arog sa mga kahoy nin Lebanon.

⁶Magigin marambong sinda huli sa mga bagong sanga, asin magigin magayon siring sa mga kahoy na oliba. Magigin mahamot sinda siring sa mga sedro nin Lebanon.

⁷Mabalik sinda asin mag-eerok sa lindong kan sakong pangataman. Mamumurak sinda arog sa sarong tatamnan, mamumunga siring sa sarong poon nin ubas, asin an hamot ninda magigin arog kan arak nin Lebanon.

⁸An banwaan nin Israel dai na nanggad magsasamba sa mga dios-dios; sisimbagon ko an saindang mga pamibi asin aatamanon ko sinda. Arog sa sarong marambong na kahoy lilindongan ko sinda; ako an gigikanan kan gabos nindang biyaya.”

⁹An nakasurat digdi masabotan logod kan mga madonong asin itanom logod ninda sa saindang puso. Matanos an mga paagi nin Kagurangnan, asin nabubuhay an mga matanos na tawo huli sa pagsunod kan mga iyan, alagad nasisingkog saka natutumba an mga parakasalang minasuway kaiyan.