Read Central Bicolano Hosea 3 Bible Online

Hosea 3 - Central Bicolano bible

Hosea 3

¹Sinabihan ako nin Kagurangnan, “Lakaw giraray asin pahilingan an saimong pagkamoot sa sarong babaeng nagpapasambay. Kaipuhan na mamotan mo siya siring na namomotan ko pa an banwaan nin Israel, maski nagsasamba na sinda sa mga dios-dios asin namomoot na magdara nin mga dolot na pasas sa mga ladawan.”

²Kaya nagbayad ako nin kinseng pedasong plata saka syento singkwenta kilos nin sebada tanganing bakalon siya.

³Sinabihan ko siya na sa halawig na panahon kaipuhan maglingkod siya sako saka dai dapat magin sarong maraot na babae, o makidorog sa ibang lalaki, dangan sa panahon man na iyan paglilingkodan ko siya.

⁴Sa siring na kamugtakan, mamumuhay na mayo nin mga hade o lider an mga Israelita; mayo nin mga sakripisyo o banal na mga hariging gapo, mayong mga dios-dios o mga ladawan na gagamiton sa pag-aram kan dai pa nangyayari.

⁵Alagad madatong an panahon na an banwaan nin Israel mabalik sa Kagurangnan na saindang Dios asin sa sarong kapagarakian ni David na saindang hade. Dangan magkakaigwa sinda nin takot sa Kagurangnan asin maako sinda kan saiyang marahay na mga regalo.