Read Central Bicolano Hosea 5 Bible Online

Hosea 5 - Central Bicolano bible

Hosea 5

¹“Mga padi, dangoga nindo ini! Paghinanyog kamo, banwaan nin Israel! Paghimate kamo, kamo na kaayon sa pamilya kan hade! Dapat ipinahiling nindo an hustisya sa saindong paghukom—kaya kamo an huhukoman! Nagin sarong siod kamo sa Mizpa, sarong hikot na nabibiklad sa Bukid nin Tabor,

²sarong hararom na kalot sa Syudad nin Acacia, kaya papadusahan ko kamo gabos.

³Aram ko kun ano an kabaing nin Israel—dai niya ako pwedeng pagtagoan. Dai siya nagin maimbod, asin bakong maninigong magsamba sako an saiyang banwaan.”

⁴An karatan na ginibo kan mga tawo iyo an nakakaolang sainda sa pagbalik ninda sa Dios. Huli ta an epiritu nin pakikipagdorogan yaon sa sainda asin dai ninda midbid an Kagurangnan.

⁵An kapaabaw-abawan kan mga taga Israel iyo man sana an nagsasaksi laban sainda. An saindang mga kasalan iyo an nakakapasingkog saka nakakapatumba sainda, asin matutumba kaiba ninda an mga taga Juda.

⁶Dadarahon ninda an saindang mga karnero saka baka tanganing idolot bilang mga sakripisyo sa Kagurangnan, alagad dai iyan makakatabang sainda. Dai ninda siya makukua, huli ta binayaan na niya sinda.

⁷Dai sinda nagin maimbod sa Kagurangnan; bako niyang sadiri an mga aki ninda. Kaya dai mahahaloy, magagadan sinda asin mararaot an saindang daga.

⁸Huyopa an trompeta nin gera sa Gibea! Patanoga an alarma sa Rama! Ipahayag an pakigera sa Bet-aven! Sa pakigera, mga lalaki nin Benjamin!

⁹Nagdadangadang na an aldaw nin pagpadusa, asin marurumpag an Israel. Mga taga Israel mangyayari nanggad ini!

¹⁰An Kagurangnan nagsasabi, “Naaanggot ako huli ta an Israel sinalakay kan mga lider nin Juda asin inanaban nin daga. Kaya an padusa papabuloson ko sa sainda siring sa sarong baha.

¹¹Naaapi an Israel; nawara an daga na sadiri niya, huli ta binoot nanggad niyang magsunod sa mga mayong ikakatabang.

¹²Raraoton ko an Israel asin roronoton ko an mga taga Juda.

¹³“Kan mamatean nin Israel an saiyang helang, asin kan mahiling nin Juda an sadiri niyang mga lugad, nagduman an Israel sa Asiria sa paghahagad nin tabang sa emperador, alagad dai niya kayang paomayan an Israel o bolongon an lugad nin Juda.

¹⁴Arog sa leon, sasalakayon ko an mga taga Israel asin mga taga Juda. Ako mismo an maronot sainda dangan babayaan ko sinda. Kun darahon ko na sinda sa harayo, mayo nin siisay man na maligtas sainda.

¹⁵“Papabayaan ko an sakong banwaan sagkod na magtios sinda kan maninigo para sa saindang kasalan asin hanapon ninda ako. Tibaad sa saindang pagtios, hingowahon nindang hanapon ako.”