Read Central Bicolano Hosea 9 Bible Online

Hosea 9 - Central Bicolano bible

Hosea 9

¹Banwaan nin Israel, ontoka an sa paganong pagselebrar nindo kan saindong pyesta. Tinalikodan nindo an saindong Dios asin dai kamo nagin maimbod saiya. Nakalakop kamo sa daga sa pagpabakal kan saindong sadiri sa dios na si Baal; arog kamo sa mga maraot na babae asin namotan nindo an trigo na sa paghona nindo ibinayad niya saindo!

²Alagad dai mahahaloy, magkukulang an saindong trigo saka lana nin oliba, asin dai na kamo magkakaigwa nin arak.

³Dai magdadanay an banwaan nin Israel sa daga nin Kagurangnan, kundi mapipiritan na magbalik sa Egipto asin magkakan kan ipinangalad na kakanon sa Asiria.

⁴Sa mga dayuhan na dagang idto dai sinda makakapagdolot nin arak sa Kagurangnan; dai sinda makakadara saiya nin mga sakripisyo. Madidigtaan an siisay man na magkakan kan saindang kakanon, arog kan kakanon na kinakakan sa harong na may gadan. Huli ta an kakanon ninda panhale sana kan gutom; dai iyan dadarahon bilang dolot sa Templo nin Kagurangnan.

⁵Pag-abot kan mga itinalaan na pyesta sa pag-omaw sa Kagurangnan, ano an saindang gigibohon?

⁶Kun mag-abot an kasakitan asin mawarak an banwaan, titiponon sinda kan mga taga Egipto tanganing ilubong duman sa Memfis! An mga lugar na natutugdokan kan saindang mga harong saka an mga mahalagang bagay ninda na gibo sa plata tataluboan nin doot asin binit.

⁷Nag-abot na an panahon nin pagpadusa, an panahon na maako an mga tawo kan maninigo sainda. Kun mangyari na iyan, maaaraman iyan kan mga Israelita! Nagsasabi kamo, “Lolong an propetang ini. Bua an tawong ini na pinasabongan nin espiritu.” Anggot kamo sako huli ta dakulang marahay an saindong kasalan.

⁸Sinugo ako nin Dios bilang propeta tanganing patanidan an saiyang banwaan na Israel. Alagad saen man ako magduman, hiningowa nindong siodon ako siring sa sarong gamgam. Sa sadiring daga nin Dios, an mga tawo kaiwal kan propeta.

⁹Mayo na sindang ibang ginigibo kundi karatan, siring kan yaon sinda sa Gibea. Gigiromdomon nin Dios an saindang kasalan asin papadusahan sinda huli kaiyan.

¹⁰Nagsasabi an Kagurangnan, “Kan manumpongan ko an Israel, nakakaagid iyan sa pakanumpong nin ubas sa desyerto. Kan mahiling ko an saindong mga ginikanan, nakakaagid iyan sa pakahiling kan enot na hinog na bunga nin higera. Alagad kan makaabot sinda sa Bukid nin Peor, nagpoon sinda sa pagsamba ki Baal asin dai nahaloy, nakaarog sinda sa mga makauuyam na mga dios-dios na saindang namotan.

¹¹An kadakulaan nin Israel malayog paharayo siring sa sarong gamgam, asin dai na sinda mag-aaki; mayo na nin babaeng mabados asin mayo na nin aking ipapangidam.

¹²Alagad maski pa magpadakula sinda nin mga aki, kukuahon ko an mga iyan sa sainda asin mayo akong itatadang buhay. Herak man sa sainda sa panahon na bayaan ko na sinda.”

¹³Kagurangnan, nahihiling kong pinaghahanap an saindang mga aki dangan ginagadan.

¹⁴Ano an hahagadon ko na gibohon mo sa mga tawong ini? Gibohang baog an saindang mga babae! Halean mo sinda nin gatas tanganing dai makapasuso sa saindang mga aki!

¹⁵Nagsasabi an Kagurangnan, “Nagpoon an mga maraot nindang gibo sa Gilgal. Duman nagpoon an pagkaongis ko sainda. Huli kan maraot na ginibo ninda, papahaleon ko sinda sa sakong daga, asin dai ko na sinda mamomotan; nagrebelde laban sako an gabos nindang lider.

¹⁶An banwaan nin Israel nakakaagid sa sarong tinanom na naalang an mga gamot asin dai na nagbubunga. Dai sinda magkakaigwa nin mga aki, alagad maski pa magkaigwa sinda, gagadanon ko an mga aking namomotan nindang marahay.”

¹⁷An Dios na sakong pinaglilingkodan masikwal kan saiyang banwaan, huli ta dai sinda nagdangog sa saiya; magigin mga lagalag sinda sa mga nasyon.