Read Central Bicolano Joel 2 Bible Online

Joel 2 - Central Bicolano bible

Joel 2

¹Huyopa an trompeta; patanoga an alarma sa Sion, an banal na bulod nin Dios. Pagtakig, banwaan nin Juda! Nagdadangadang na an aldaw nin Kagurangnan.

²Sarong aldaw iyan nin kadikloman asin kamondoan, sarong mapongaw na aldaw saka mahibog na kadikloman! Nagdadangadang an dakulang hukbo nin mga doron arog sa kadikloman na naglalakop sa ibabaw nin kabukidan. Dai pa nin nangyaring arog kaiyan, asin ngapit, dai na mangyayari iyan.

³Arog sa kalayo, kinakakan ninda an mga tinanom. An daga sa atubang ninda nakakaagid sa Tatamnan nin Eden, alagad saindang binabayaan na garo mayong tanom na kalangtadan. Mayo nin nakakadulag sa sainda.

⁴Nakakaagid sinda sa mga kabayo; minadalagan sinda arog kan panggerang kabayo.

⁵Mantang naglulukso sinda sa mga alitoktok kan kabukidan, an ribok ninda arog sa ribok nin mga karwahe; nagkikirikiti sinda arog sa alang na doot na nasusulo. Nakalinya sinda siring sa sarong dakulang hukbo na andam sa pakilaban.

⁶Sa atubang ninda, nagkakatarakot an mga tawo; nanlolongsi an lambang saro.

⁷Minasalakay sindang arog sa mga parapakigera; minasakat sinda sa mga kudal arog sa mga soldados. An lambang saro sainda deretsong minamartsa, dai nagbabago nin direksyon

⁸asin dai nakakaolang sa aagihan nin iba. An mga olang saindang linulusotan, asin mayo nin nakakapaontok sa sainda.

⁹Minadaralagan sinda pasiring sa syudad; minarulukso sa mga kudal; minasarakat sa mga harong asin arog sa mga mahabon, minaralaog sinda sa mga bintana.

¹⁰Tinatakigan an daga mantang nagdadangadang sinda; minakobog-kobog an kalangitan. Minadiklom an aldaw saka an bulan, asin dai minaliwanag an mga bitoon.

¹¹Pakurahaw na pinagbotan nin Kagurangnan an saiyang hukbo. Dakul asin makosog an mga soldados na nagkukuyog sa saiya. Mangirhat nanggad an aldaw nin Kagurangnan! Siisay an makakatagal kaiyan?

¹²“Alagad maski ngunyan,” an sabi nin Kagurangnan, “magbalik kamo sako sa bilog nindong puso na may pag-ayuno asin pagtangis patin pagmondo.

¹³Magbakle kamo nin tudok sa saindong puso, asin bakong huli sa paggisi kan saindong gubing.” Magbalik kamo sa Kagurangnan na saindong Dios. Mahuyo siya asin maheherakon; matinios siya saka nag-ootob kan saiyang mga panuga; danay siyang andam sa pagpatawad asin bakong sa pagpadusa.

¹⁴Tibaad magliwat nin isip an Kagurangnan na saindong Dios asin bendisyonan kamo nin dakulang ani. Dangan madodolotan nindo siya nin trigo saka arak.

¹⁵Huyopa an trompeta sa Bukid nin Sion; paluwasa an pagboot para sa pag-ayuno asin sa pagtiripon!

¹⁶Tipona an mga tawo; andama sinda sa sarong banal na pagtiripon; tipona an mga gurang, kaakian asin an mga pasosong omboy. Maski an mga bago pa sanang kasalon kaipuhan na magluwas sa saindang kwarto dangan magduman.

¹⁷An mga padi, na naglilingkod sa Kagurangnan sa pagultanan kan altar asin kan pintoan kan Templo, kaipuhan na magtangis saka magpamibi: “Maherak ka sa saimong banwaan, Kagurangnan. Hare pagtugote an ibang nasyon na pagngisihan kami dangan pag-olog-ologon sa pagsabing, ‘Haen an saindong Dios?’”

¹⁸Dangan ipinahiling nin Kagurangnan an saiyang pagmakulog sa saiyang daga; naherakan niya an saiyang banwaan.

¹⁹Sinimbag niya sinda: “Ngunyan tatawan ko kamo nin trigo, arak saka lana nin oliba, asin mababasog kamo. Dai na kamo pagtutuyatuyaon kan ibang nasyon.

²⁰Hahaleon ko an hukbo nin mga doron na nag-abot hale sa amihan dangan aalawon ko an iba sa sainda pasiring sa desyerto. An mga nangengenot sainda mapapaduman sa Gadan na Dagat, an mga nasa hurihan mapapaduman sa Mediteraneo. Duman sinda magagadan saka mabata. Gagadanon ko sinda huli kan gabos nindang ginibo sa saindo.

²¹“Kaomahan, dai kamo matakot, kundi magin magayagaya saka maogma huli kan gabos na ginibo nin Kagurangnan para saindo.

²²Mga hayop, dai kamo matakot. Berde na an mga pasabsaban; nagbubunga na an mga kahoy, asin dakul na an bunga kan higera saka ubas.

²³“Maggayagaya kamo, banwaan nin Sion, mag-ogma kamo sa ginibo para saindo kan Kagurangnan na saimong Dios. Itinao niya saindo an tama sanang uran; pinahugpa niya para saindo an dakul na uran, an enot saka an huring uran arog kaidto.

²⁴An mga lugar nin ginikan mapapano nin trigo; an mga laogan sa kataed kan mga pugaan nin ubas magsusupay nin arak saka lana nin oliba.

²⁵Ibabalik ko saindo an nawara nindo sa mga taon kan kakanon kan mga doron an saindong mga tinanom. Ako an nagpadara kan mga doron laban sa saindo.

²⁶Ngunyan magkakaigwa na kamo nin dakul na pagkakan, asin mababasog kamo. Oomawon nindo an Kagurangnan na saindong Dios, na naggibo para saindo kan mga makangangalas na mga bagay. Dai na nanggad pagtutuyatuyaon an sakong banwaan.

²⁷Dangan, Israel, maaaraman mo na yaon ako sa kaibahan mo, asin na ako, an Kagurangnan, iyo an saimong Dios saka mayo na nin iba. Dai na nanggad pagtutuyatuyaon an sakong banwaan.

²⁸“Pakatapos, papahiligon ko an sakong espiritu sa gabos na tawo: an saindong mga aking lalaki saka babae maghuhula; an saindong mga gurang na lalaki magkakaigwa nin mga pangatorogan; an saindong mga hoben na lalaki makakahiling nin mga bisyon.

²⁹Sa panahon na iyan, papahiligon ko an sakong espiritu maski sa mga oripon, lalaki man o babae.

³⁰“Matao ako nin mga patanid dapit sa aldaw na iyan sa kalangitan asin sa daga: dugo, kalayo saka mahibog na aso.

³¹An aldaw magdiklom an bulan mapula na garo dugo bago umabot an dakula saka mangirhat na aldaw nin Kagurangnan.

³²Alagad makakaligtas an nag-aapod sa ngaran nin Kagurangnan. Sosog sa itinaram nin Kagurangnan, ‘An iba sa Jerusalem makakadulag; an sakong pinili makakatagal.’”