Read Central Bicolano Joel 3 Bible Online

Joel 3 - Central Bicolano bible

Joel 3

¹An Kagurangnan nagtataram, “Sa panahon na iyan ibabalik ko an kauswagan nin Juda saka Jerusalem.

²Titiponon ko an gabos na nasyon asin dadarahon ko sinda sa Kapantayan nin Paghukom. Huhukoman ko sinda duman huli kan gabos na ginibo ninda sa sakong banwaan. Iwinarak ninda an mga Israelita sa dayuhan na mga nasyon asin binanga ninda an Israel, an sakong daga.

³Nagripa sinda tanganing aramon kun kiisay mapapaduman an mga bihag. Ipinabakal ninda bilang mga oripon an hoben pang mga lalaki saka mga babae tanganing magkaigwa nin pambayad para sa maraot na mga babae saka arak.

⁴“Ano an ginigibo mo sako, Tiro, Sidon, asin gabos na rehiyon nin Filistia? Boot nindo akong baloson? Kun nagbabalos kamo, babaloson ko tolos kamo!

⁵Kinua nindo an sakong plata saka bulawan dangan an sakong kayamanan dinara nindo sa saindong mga templo.

⁶Dinara man nindo an mga taga Juda saka mga taga Jerusalem harayo sa saindang daga dangan ipinabakal nindo sinda sa mga Griyego.

⁷Ngunyan papaluwason ko sinda sa mga lugar na pinagpabakalan nindo sainda asin gigibohon ko man saindo an ginibo nindo sainda.

⁸Itutugot kong ipabakal man an saindong mga aking lalaki saka mga babae sa mga taga Juda; ini an mapabakal sainda sa mga Sabeo, sa sarong nasyon na harayo nin marahay. Ako, an Kagurangnan, an nagtaram.

⁹“Ipahayag nindo ini sa mga nasyon: ‘Pag-andam para sa gera; apoda an saindong mga paralaban; tipona an gabos nindong soldados dangan lakaw na!

¹⁰Pulpoga an poro kan saindong mga arado tanganing magin mga espada asin an saindong mga pantakras na kutsilyo tanganing magin mga garod. Maski an mga maluya kaipuhan makilaban.

¹¹Paghidali asin madya, kamong nasa palibot na mga nasyon, asin magtiripon kamo sa kapantayan.’” Padarahan, O Kagurangnan, an saimong hukbo tanganing salakayon sinda!

¹²“Kaipuhan mag-andam an mga nasyon asin magduman sa Kapantayan nin Paghukom. Duman ako, an Kagurangnan, matukaw sa paghukom kan gabos na nasyon sa palibot.

¹³Dakula an saindang karatan; putola sinda arog sa mga poon nin trigo kun tig-ani; ronota sinda arog kan pagronot sa ubas sa sarong pano nang pugaan nin ubas, sagkod na magsupay an arak.”

¹⁴Ribo-ribo an yaon sa Kapantayan nin Paghukom. Madali nang mag-abot duman an aldaw nin Kagurangnan.

¹⁵An aldaw saka an bulan nagdidiklom, asin dai na nagliliwanag an mga bitoon.

¹⁶Hale sa Bukid nin Sion nagdadaguldol an Kagurangnan; an saiyang tingog nagdadaguldol hale sa Jerusalem; an kinaban saka an langit tinatakigan. Alagad susurogon niya an saiyang banwaan.

¹⁷“Dangan, Israel, maaaraman mo na ako an Kagurangnan na saimong Dios. Nag-eerok ako sa Sion, an banal kong bulod. An Jerusalem magigin banal na syudad; dai na nanggad iyan masasakop kan mga dayuhan.

¹⁸Sa panahon na iyan matatahoban nin mga ubasan an kabukidan, asin sa gabos na bulod makukua an kabakahan; an gabos na sapa nin Juda magbubulos nin tubig. Sarong sapa an mabulos hale sa Templo nin Kagurangnan, dangan babaribihon kaiyan an Sittim.

¹⁹“An Egipto magigin sarong desyerto, asin mayo nang mag-eerok sa Edom, huli ta sinalakay ninda an daga nin Juda asin ginaradan an mga tawong mayo nin sala.

²⁰Ako an mabalos para sa mga nagkagaradan; dai ko papatawadon an may kasalan. Alagad an Juda saka an Jerusalem pag-eerokan nin tawo sagkod pa man, asin ako, an Kagurangnan, mag-eerok sa Bukid nin Sion.”