Read Central Bicolano Amos 2 Bible Online

Amos 2 - Central Bicolano bible

Amos 2

¹Nagtataram an Kagurangnan, “Paulit-ulit na nagkasala an mga taga Moab, asin huli kaiyan, papadusahan ko sinda. Dai ninda ginalangan an mga tolang kan hade nin Edom kan tutongon ninda iyan.

²Papadarahan ko nin kalayo an daga nin Moab asin susuloon ko an mga bantayan nin Keriot. An mga taga Moab magagadan sa tahaw nin karibokan nin gera mantang nagkukurahaw an mga soldados asin nagtatanog an mga trompeta.

³Gagadanon ko an pamayo nin Moab asin an gabos na lider kan daga.”

⁴Nagtataram an Kagurangnan, “Paulit-ulit na nagkasala an mga taga Juda, asin huli kaiyan, papadusahan ko sinda. Tinalikodan ninda an sakong mga katukdoan asin dai inotob an sakong mga pagboot. Linagalag sinda kan parehong mga dios-dios na pinaglingkodan kan saindang mga ginikanan.

⁵Kaya papadarahan ko nin kalayo an Juda asin susuloon ko an mga bantayan kan Jerusalem.”

⁶Nagtataram an Kagurangnan, “Paulit-ulit na nagkasala an mga Israelita, asin huli kaiyan, papadusahan ko sinda. Ipinapabakal ninda sa kaoripnan an mga tawong matanos na dai nakakabayad kan saindang utang, mga dukhang dai nakakabayad maski kan halaga nin sarong pades nin sandalyas.

⁷Tinitimaktimakan ninda sa alpog an payo kan mga dukha asin itinutuklang ninda paluwas sa dalan an mga daing sukat. Dinodorogan nin mag-ama an babaeng oripon, kaya linalanghadan ninda an sakong ngaran.

⁸Sa gabos na lugar na pagsasambahan, nagkakatorog an kalalakihan sa gubing na sangra kan dukhang may utang sainda. Sa templo nin saindang Dios, nag-iinom sinda kan arak na saindang kinua sa mga may utang sainda.

⁹“Alagad, banwaan ko, huli saindo kun kaya pinuho ko an mga Amoreo, an mga lalaking arog kahalangkaw sa mga sedro asin arog kakosog sa mga hamurawon.

¹⁰Ilinuwas ko kamo hale sa Egipto, pinangenotan sa desyerto sa laog nin kwarentang taon, dangan tinawan kan daga na pagsadiri kan mga Amoreo.

¹¹Pinili ko an nagkapira sa saindong mga aking lalaki tanganing magin mga propeta, asin an nagkapira sa hoben na lalaki tanganing magin Nazireo. Bakong totoo ini, banwaan nin Israel? Ako, an Kagurangnan, an nagtaram.

¹²Alagad pinainom nindo nin arak an mga Nazireo, asin pinagbotan nindong dai magtaram kan sakong mensahe an mga propeta.

¹³Ngunyan, roronoton ko kamo sa daga, asin maagrangay kamo arog sa kariton na pano nin trigo.

¹⁴Dai makakaligtas maski an pinakamarikas na paradalagan; mawawaraan nin kosog an makokosog na mga lalaki, asin dai ikakaligtas kan mga soldados maski an saindang buhay.

¹⁵An mga parapana dai makakatagal, an mga marikas dumalagan dai makakadulag, asin an mga nangangabayo dai makakaligtas.

¹⁶Sa aldaw na iyan, maski an pinakamaisog na soldados matapok kan saiyang armas dangan madulag.” An Kagurangnan an nagtaram.