Read Central Bicolano Amos 3 Bible Online

Amos 3 - Central Bicolano bible

Amos 3

¹Banwaan nin Israel, dangoga an mensaheng ini na itinaram nin Kagurangnan laban saindo, an nasyon na ilinuwas niya hale sa Egipto:

²“Sa gabos na nasyon sa daga, ika sana an pinili ko asin inataman. Iyan an dahelan kun tadaw ta orog na minagabat an saimong mga kasalan, asin kun tano ta kaipuhan padusahan taka.”

³Magkaibahan daw na minalakaw an duwang lalaki kun dai sinda nagkaolay?

⁴Minaungal daw an leon sa kadlagan kun dai iyan nakakua nin sarong biktima? Minaungal daw an ogbon na leon kun dai iyan nin nadakop na anoman?

⁵Nadadakop daw an sarong gamgam sa sarong litag kun ini dai pinaonan? Minagubtik daw an litag kun mayo nin nakapagubtik kaiyan?

⁶Dai daw natatakot an mga tawo kun pinapatanog an panggerang trompeta sa laog nin syudad? Minaabot daw an kapahamakan sa sarong syudad kun dai iyan ipinadara nin Kagurangnan?

⁷Mayo pang ginibo an Kagurangnan Dios na dai ngona ipinahayag sa saiyang mga sorogoon, an mga propeta.

⁸Siisay an dai natatakot kun minaungal an sarong leon? Siisay an dai minapahayag kan mensahe kan Kagurangnan Dios kun siya nagtataram?

⁹Ipahayag mo sa mga nag-eerok sa mga palasyo sa Egipto saka sa Asdod: “Magtiripon kamo sa kabubuldan sa palibot nin Samaria asin hilinga nindo an karibongan saka pang-aapi na ginigibo duman.”

¹⁰Nagtataram an Kagurangnan, “Pinapano kan mga tawong ini an saindang mga harong nin mga bagay na nakua ninda sa paagi nin panghahabon saka dahas. Dai ninda aram kun paano an paggibo nin tama.

¹¹Kaya papalibotan kan kaiwal an saindang mga kudal, raraoton an saindang mga depensa, asin sasamsaman an saindang mga harong.”

¹²Nagtataram an Kagurangnan, “Siring na duwang bitis o sarong talinga na sana an nakukua kan pastor sa sarong karnero na tinabag nin sarong leon, dikit man na taga Samaria na naghihigda sa magagayon na higdaan an matatada.

¹³Paghinanyog asin pagsaksi laban sa mga kapagarakian ni Jacob,” an sabi kan Kagurangnan Dios, an Dios nin mga hukbo.

¹⁴“Sa aldaw na padusahan ko an banwaan nin Israel huli kan saindang mga kasalan, raraoton ko an mga altar sa Betel. Mapapasa an mga kanto kan gabos na altar asin mahuhulog sa daga.

¹⁵Raraoton ko an mga harong na para sa tig-lipot saka an sa tig-init. Magkakagaraba an mga harong na marpil, siring man an mga darakulang harong.”