Read Central Bicolano Amos 4 Bible Online

Amos 4 - Central Bicolano bible

Amos 4

¹Dangoga nindo ini, kamong mga babaeng taga Samaria, na nagtataraba arog kan mga baka sa Basan, na nag-aapi kan mga maluluya, nagpapasakit kan mga dukha, saka nagboboot sa mga agom tanganing danay kamong tawan nin arak!

²Huli kan saiyang kabanalan, nagsumpa an Kagurangnan Dios, “Nagdadangadang an mga aldaw na guguyodon kamo paharayo sa paagi nin mga kawit; an lambang saro saindo magigin arog sa sira na nabanwit.

³Guguyodon kamo pasiring sa pinakaharaning labot sa kudal dangan itatapok sa luwas.”

⁴An Kagurangnan Dios nagtataram, “Mga taga Israel, dumuman kamo sa banal na lugar sa Betel asin magkasala kamo! Dumuman kamo sa Gilgal asin orog pa kamong magkasala! Daraha nindo an mga hayop na isasakripisyo aga-aga, asin an saindong himoloan sa lambang ikatolong aldaw.

⁵Lakaw kamo asin dolotan an saindong tinapay sa pagpasalamat sa Dios, dangan ipaghambog nindo an saindong mga boluntad na dolot! Iyo ini an gawe na boot nanggad nindong gibohon.

⁶“Ako an nagdara nin makuring gutom sa gabos nindong syudad alagad dai kamo nagbalik sa sako.

⁷Dai ko ipinadara an uran kan kaipuhan nanggad nindo iyan. Nagpadara ako nin uran sa sarong syudad, alagad dai sa ibang syudad. Naghugpa an uran sa sarong oma, alagad mamara sa ibang oma.

⁸Nanluluya sa paha an mga tawo hale sa duwa o tolong syudad sa paghanap nin tubig sa saro pang syudad, alagad mayo duman nin sukat na tubig na maiinom; alagad dai man giraray kamo nagbalik sa sako.

⁹“Nagpadara ako nin makuring init tanganing maalang an saindong mga tinanom. Kinakan kan mga doron an saindong mga tinanom saka ubasan, an saindong mga kahoy na higera saka oliba, alagad dai man giraray kamo nagbalik sa sako.

¹⁰“Nagpadara ako nin peste sa saindo arog kan peste na ipinadara ko sa Egipto. Ginadan ko sa gera an hoben nindong mga lalaki asin sinamsam an saindong mga kabayo. Pinano ko an saindong mga dungo kan parong nin mga gadan sa saindong mga kampo, alagad dai man giraray kamo nagbalik sa sako.

¹¹“Tinunaw ko an iba sa saindo arog kan ginibo kong pagtunaw sa Sodoma saka sa Gomorra. An mga natada sa saindo nakaarog sa naglalaad na sanga na kinua sa kalayo, alagad dai man giraray kamo nagbalik sa sako,” an sabi nin Kagurangnan.

¹²“Kaya papadusahan ko kamo, banwaan nin Israel. Mag-andam na kamo sa pag-atubang sako, huli ta gigibohon ko iyan!”

¹³An Dios iyo an naggibo kan kabukidan asin an naglalang kan mga doros. Ipinapahayag niya an saiyang kaisipan sa tawo; ginigibo niyang banggi an aldaw. Naglalakaw siya sa mga alitoktok kan kinaban. Iyo ini an saiyang ngaran: an Kagurangnan, an Dios nin mga hukbo!