Read Central Bicolano Amos 5 Bible Online

Amos 5 - Central Bicolano bible

Amos 5

¹Banwaan nin Israel, dangoga ining panambitan na aawiton ko saindo:

²Buminagsak, an birhen na Israel, asin dai na siya makakabangon! Naghihigda siya sa daga, asin mayo nin minatabang tanganing makatindog siya.

³An Kagurangnan Dios nagtataram, “An sarong syudad nin Israel minapadara nin sangribong soldados, alagad sanggatos sana an nakakabalik; saro pang syudad an minapadara nin sanggatos, alagad sampolo sana an nakakabalik.”

⁴An Kagurangnan nagtataram sa banwaan nin Israel, “Madya kamo sa sako, asin mabubuhay kamo.

⁵Dai kamo magduman sa Beer-sheba sa pagsamba. Dai nindo ako paghanapon sa Betel, huli ta an Betel mawawaraan nin halaga. Dai kamo magduman sa Gilgal huli ta itatapok an saiyang mga namamanwaan.”

⁶Magdolok kamo sa Kagurangnan, asin mabubuhay kamo. Kun dai kamo magdolok saiya, maabot siya sa banwaan nin Israel siring sa kalayo. Susuloon kan kalayong iyan an mga taga Betel, asin mayo nin siisay man na makakasigbo kaiyan.

⁷Herak man saindo, kamo na nagbibiko kan hustisya asin nagdadaya kan deretso nin mga tawo!

⁸An Kagurangnan an naggibo kan mga bitoon, kan Pleiades asin kan Orion. Pinapangagin niyang kaliwanagan an kadikloman, asin an aldaw pinapangagin niyang banggi. Inaapod niya an katubigan kan dagat dangan inuula niya iyan sa kinaban. Kagurangnan an saiyang ngaran.

⁹Dinadarahan niya nin kapahamakan an mga makokosog asin an saindang mga bantayan.

¹⁰Banwaan nin Israel, naoongis kamo sa kiisay man na dai minaoyon sa inhustisya asin minatuga kan bilog na katotoohan.

¹¹Inapi nindo an mga dukha saka hinabonan kan saindang kakanon, kaya dai kamo mag-eerok sa pinatindog nindong magayon na mga harong na gibo sa gapo, ni mag-iinom kan arak hale sa magagayon nindong ubasan.

¹²Huli ta aram ko an kadakul nindong kasombikalan asin kun gurano kadakula an saindong mga kasalan. Pinapasakitan nindo an mga matanos, minaako kamo nin suhol, saka dai nindo itinatao an deretso kan mga dukha.

¹³Kaya an dai paggirong sa siring karaot na mga panahon iyo an pinakamarahay na gibohon!

¹⁴Giboha nindo an matanos asin bakong an maraot, tanganing mabuhay kamo. Dangan tunay na masasakaibahan nindo an Kagurangnan, an Dios nin mga hukbo, siring sa sinasabi nindo.

¹⁵Kaongisan nindo an maraot, kamotan an tama, asin papagdanayon an hustisya sa mga hukoman; tibaad pa maherakan nin Kagurangnan an mga tawo sa nasyon na ini na nagkakaburuhay pa.

¹⁶Kaya an Kagurangnan, an Dios nin mga hukbo, nagtataram, “Magkakaigwa nin pagtangis asin panambitan sa mga tinampo. Maski an mga paraoma aapodon tanganing magtangis para sa nagadan kaiba kan mga tinandanan na paratangis.

¹⁷Magkakaigwa man nin pagtangis sa mga ubasan huli ta madatong ako sa pagpadusa saindo.” An Kagurangnan an nagtaram.

¹⁸Herak man saindo na mga nagmamawot na mag-abot na an aldaw nin Kagurangnan! Anong karahayan an itatao saindo kan aldaw na iyan? An aldaw na iyan magigin aldaw nin kadikloman asin bakong aldaw nin kaliwanagan.

¹⁹An aldaw na iyan makakaarog sa tawong duminulag sa leon alagad an nasabatan sarong oso; o arog sa tawong nagpuli sa harong dangan kan magkapot siya sa lanob, kinagat siya nin halas!

²⁰An aldaw nin Kagurangnan madara nin kadikloman asin bakong kaliwanagan; iyan magigin sarong aldaw nin kamondoan, na mayo nin anoman na kaogmahan.

²¹An Kagurangnan nagtataram, “Naoongisan ko an saindong mga pyesta; dai ko nawiwilihan an saindong mga banal na pagtiripon.

²²Maski pa dolotan nindo ako nin mga tinutong na atang saka dolot na pagkakan, dai ko iyan aakoon; dai ko man aakoon an mga pinatabang hayop na dinadara nindo sako bilang mga dolot para sa katoninongan.

²³Ontoka nindo an maribok nindong mga awit; habo akong magdangog kan tanog kan saindong mga arpa.

²⁴Embes kaiyan, pabulosa nindo an hustisya siring sa pagbulos kan salog, asin an katanosan siring sa sapa na dai nagmamara.

²⁵“Banwaan nin Israel, dai ako naghagad nin mga sakripisyo o mga dolot kan pangenotan ko kamo sa desyerto sa laog nin kwarentang taon.

²⁶Alagad ngunyan, huli ta sinamba nindo an ladawan ni Sakkut, an saindong hadeng dios, asin an ladawan ni Kaiwan, an saindong dios na bitoon, papasanon nindo an mga ladawan na iyan

²⁷kun itapok ko na kamo sa dagang nasa ibong kan Damasco,” an sabi nin Kagurangnan, na an ngaran Dios nin mga hukbo.