Read Central Bicolano Jonah 1 Bible Online

Jonah 1 - Central Bicolano bible

Jonah 1

¹Sarong aldaw, nagtaram an Kagurangnan ki Jonas na aking lalaki ni Amittai.

²Nagsabi siya, “Magduman ka sa Nineve, idtong dakulang syudad, asin magtaram ka laban sa syudad, huli ta aram ko kun gurano karaot an mga namamanwaan duman.”

³Alagad embes na magduman si Jonas sa Nineve, nagduman siya sa ibong na direksyon tanganing makadulag sa Kagurangnan. Nagduman siya sa Jope, saen nakahiling siya nin sarong barko na mapasiring sa Espanya. Nagbayad siya kan pasahe, dangan nagsakay kaiba an mga tripulante sa pagpasiring sa Espanya, tanganing makadulag sa Kagurangnan.

⁴Alagad nagpadara an Kagurangnan nin makosog na bagyo sa dagat, kaya haros maronot an barko.

⁵Nagkatarakot an mga tripulante, kaya an lambang saro nagkurahaw sa pag-apod nin tabang sa saiyang dios. Dangan, tanganing mainaan an gabat kan barko, itinapok ninda sa dagat an mga kargamento. Mantang nangyayari ini, nagduman si Jonas sa ibabang kabtang kan barko dangan nagkatorog.

⁶Nahiling siya duman kan kapitan dangan sinabihan, “Tano ta nagkakatorog ka? Magbangon ka asin mag-apod sa saimong dios! Tibaad maherakan niya kita asin iligtas.”

⁷Nag-orolay an mga tripulante, “Magripa kita tanganing maaraman ta kun siisay an nagdara sato sa pag-alaman na ini.” Nagripa sinda asin an ngaran ni Jonas an nagluwas.

⁸Kaya sinabihan ninda siya, “Sabihi kami kun siisay an dapat basolon sa nangyayaring ini. Ano an ginigibo mo digdi? Anong nasyon an pinaghalean mo? Anong nasyonalidad mo?”

⁹Nagsimbag si Jonas, “Hebreyo ako. Nagsasamba ako sa Kagurangnan, an Dios nin langit, an naglalang kan daga asin kan dagat.”

¹⁰Dangan sinabihan sinda ni Jonas na nagdudulag siya sa Kagurangnan. Nagkatarakot an mga tripulante asin sinabihan siya, “Sala an ginibo mo!”

¹¹Orog na nagkosog an bagyo, kaya hinapot siya ninda, “Ano an dapat ming gibohon saimo tanganing maontok an bagyo?”

¹²Nagsimbag si Jonas, “Itapok nindo ako sa dagat asin maontok iyan. Aram kong ako an dahelan kan pag-abot kan makosog na bagyong ini sa saindo.”

¹³Embes kaiyan, hiningowa kan mga tripulante na makagilid an barko, alagad dai ninda nagibo iyan huli ta orog na nagkosog an bagyo.

¹⁴Kaya nagkurahaw sinda sa Kagurangnan, “Nakikimaherak kami saimo, Kagurangnan, na dai mo kami paggadanon kun gadanon mi an tawong ini! Ika, O Kagurangnan, an kaggibo kan gabos na ini.”

¹⁵Dangan binuhat ninda si Jonas asin itinapok sa dagat; tolos na nagkalma ini.

¹⁶Huli kaini nagkaigwa nin makuring takot sa Kagurangnan an mga tripulante, kaya nagdolot sinda nin sakripisyo asin nanuga na malingkod saiya.

¹⁷Sa pagboot nin Kagurangnan hinalon si Jonas nin sarong dakulang sira, asin sa laog nin tolong aldaw saka tolong banggi nasa tulak siya kan sira.