Read Central Bicolano Jonah 2 Bible Online

Jonah 2 - Central Bicolano bible

Jonah 2

¹Mantang nasa tulak si Jonas kan dakulang sira, namibi siya sa Kagurangnan na saiyang Dios:

²“Sa sakong kasakitan, nag-apod ako saimo, O Kagurangnan, asin sinimbag mo ako. Sa kairaroman kan kinaban kan mga gadan nagkurahaw ako sa paghagad nin tabang, asin dinangog mo ako.

³Ihinulog mo ako sa kairaroman, sa pusod nin dagat, asin napalibotan ako nin tubig, linantopan kan dakula mong mga alon.

⁴Nagsaboot ako na pinahale mo na ako sa atubang mo asin dai ko na nanggad mahihiling an banal mong Templo.

⁵Linantopan ako kan tubig asin pinoot ako; natahoban nanggad ako kan dagat, asin an sakong payo napano kan mga doot nin dagat.

⁶Nakaabot ako sa mga gamot kan kabukidan, pasiring sa daga na an mga trangkahan danay na serado sagkod pa man. Alagad ika, O Kagurangnan na sakuyang Dios, an naghawas kan sakong buhay hale sa kairaroman.

⁷Kan nanluya an sakong kalag, namibi ako saimo, Kagurangnan, asin an sakong pamibi nakaabot saimo, sa banal mong Templo.

⁸An mga nagsasamba sa mayong halagang mga ladawan dai nagin tunay na maimbod saimo.

⁹Alagad aawitan taka nin mga kaomawan; madolot ako nin sakripisyo asin ootobon ko an sakuyang panuga saimo. An kaligtasan naghahale sa Kagurangnan!”

¹⁰Dangan pinagbotan nin Kagurangnan an sira na iluwa si Jonas sa baybayon, asin nagsunod ini.