Read Central Bicolano Numbers 1 Bible Online

Numbers 1 - Central Bicolano bible

Numbers 1

¹Kan enot na aldaw kan ikaduwang bulan kan ikaduwang taon pakahale kan banwaan nin Israel sa Egipto, nagtaram an Kagurangnan ki Moises sa Tabernakulo duman sa Desyerto nin Sinai:

²“Sensohon nindo ni Aaron an bilog na komunidad nin Israel sosog sa saindang mga kamaganakan asin mga pamilya. Ilista nindo an ngaran kan lambang lalaki

³na an edad beynte paitaas, na maninigong maglingkod sa hukbo.

⁴Magpatabang kamo sa sarong pamayo nin kamaganakan hale sa lambang tribu.”

⁵Iyo ini an ngaran kan mga lalaki, na mga lider sa saindang mga tribu, na pinili hale sa saindang komunidad para sa trabahong ini: Tribu Pamayo kan Kamaganakan Ruben si Elizur na aking lalaki ni Sedeur Simeon si Selumiel na aking lalaki ni Zurisaddai Juda si Nason na aking lalaki ni Amminadab Issakar si Netanel na aking lalaki ni Zuar Zabulon si Eliab na aking lalaki ni Helon Efraim si Elisama na aking lalaki ni Ammihud Manases si Gamaliel na aking lalaki ni Pedazur Benjamin si Abidan na aking lalaki ni Gideoni; Dan si Ahiezer na aking lalaki ni Ammisaddai Aser si Pagiel na aking lalaki ni Okran Gad si Eliasaf na aking lalaki ni Deuel Neftali si Ahira na aking lalaki ni Enan.

⁶Sa tabang kan mga lalaking ini, tinipon ni Moises saka ni Aaron an bilog na komunidad sa enot na aldaw kan ikaduwang bulan, asin binilang ninda an gabos na tawo sosog sa saindang mga kamaganakan sagkod pamilya. An ngaran kan gabos na lalaki na beynteng taon an edad paitaas binilang ninda asin ilinista

⁷sosog sa pagboot nin Kagurangnan. Ginibo ni Moises an pagsenso duman sa Desyerto nin Sinai.

⁸An ngaran kan mga lalaking beynteng taon an edad paitaas, na maninigong maglingkod sa hukbo, ilinista sosog sa saindang kamaganakan asin pamilya, magpoon sa tribu ni Ruben na matuang aking lalaki ni Jacob. Ini an kabilogan na bilang kan lambang tribu: Tribu Bilang Ruben kwarenta y seis mil kinyentos Simeon singkwenta y nuebe mil tres syentos Gad kwarenta y singko mil seis syentos singkwenta Juda setenta y kwatro mil seis syentos Issakar singkwenta y kwatro mil kwatro syentos Zabulon singkwenta y syete mil kwatro syentos Efraim kwarenta mil kinyentos Manases treynta y dos mil dos syentos Benjamin treynta y singko mil kwatro syentos Dan sesenta y dos mil syete syentos Aser kwarenta y uno mil kinyentos Neftali singkwenta y tres mil kwatro syentos An kabilogan na bilang minaabot sa seis syentos tres mil kinyentos singkwenta.

⁹An mga Levita dai senenso kaiba kan ibang mga tribu,

¹⁰huli ta nagtaram an Kagurangnan ki Moises,

¹¹“Pagsenso mo sa mga lalaking maninigong maglingkod sa hukbo, dai mo ipag-ayon an tribu ni Levi,

¹²kundi gibohon mo sindang paraataman kan Tabernakulo asin kan mga kagamitan kaini; sinda an madara kan Tabernakulo sagkod kan mga kagamitan kaiyan, maglilingkod diyan patin makampo sa palibot kaiyan.

¹³Kun maliwat kamo nin kampo, an mga Levita an matangkas kan Tabernakulo asin matugdok kaiyan sa bagong lugar. An magrani sa Tabernakulo pwera sainda, gagadanon.

¹⁴Itutugdok kan ibang mga Israelita an saindang mga tolda, an lambang saro sosog sa saiyang tribu, sa tamang kampo asin sa irarom kan sadiring bandera.

¹⁵Alagad an mga Levita makampo sa palibot kan Tabernakulo sa pagbantay kaiyan, tanganing mayo nin makadolok diyan na magigin dahelan kan pagkaanggot ko sa bilog na komunidad nin Israel.”

¹⁶Ginibo kan mga Israelita an gabos na ipinagboot nin Kagurangnan ki Moises.