Read Central Bicolano Numbers 11 Bible Online

Numbers 11 - Central Bicolano bible

Numbers 11

¹Nagpoon pagreklamo sa Kagurangnan an mga Israelita manongod kan saindang mga kasakitan. Kan nadangog sinda nin Kagurangnan, naanggot siya asin pinadarahan niya sinda nin kalayo. Nasulo an nagkapira sainda saka an sarong poro kan kampo.

²Nakimaherak an mga tawo ki Moises; namibi siya sa Kagurangnan asin napalsok an kalayo.

³Kaya an lugar nginaranan Tabera huli ta sinulo sinda duman kan kalayo nin Kagurangnan.

⁴Igwa nin mga dayuhan na nagbabaklay kaiba kan mga Israelita. An mga dayuhan nagkaigwa nin sobrang pagmawot na makakakan nin karne asin maski an mga Israelita nagpoon man magreklamo, “Kun igwa kutana kita nin makakakan na karne!

⁵Sa Egipto daing bayad kitang nagkakan nin sira. Duman igwa kita nin mga pipino, melon, sibulyas asin mga bawang.

⁶Ngunyan mayo na an satong kosog. Mayo kita nin kinakakan sa aroaldaw kundi an mannang ini!” (

⁷An manna garo pisog nin kulantro na krema an kolor.

⁸Kun banggi, minahugpa iyan sa kampo kaiba kan ambon. Pagkaaga, pinupurot iyan kan mga Israelita, ginigiling o binabayo tanganing magin arina, dangan linalabonan asin ginigibong tinapay. An namit kaiyan garo tinapay na sinalakan nin lana nin oliba.)

¹⁰Nadangog ni Moises an reklamo kan gabos na tawo na nakatindog sa pintoan kan saindang mga tolda. Naanggot nin marahay an Kagurangnan, kaya namondo si Moises.

¹¹Nagsabi si Moises sa Kagurangnan, “Tadaw ta maraot an pagtratar mo sako? Tano ta dai mo ako nawilihan? An mga tawong ini sarong pasanon na magabat nin marahay. Tadaw ta ibinugtak mo sinda sako?

¹²Ipinangidam ko daw sinda? Ako daw an nangaki sainda tanganing taraman mo ako na kilikon ko sinda, siring kan pagkilik sa sarong aki na nagsososo, pasiring sa daga na ipinanuga mo sa saindang magurang?

¹³Saen ako makua nin karne na ipapakakan sainda gabos? Padagos sinda sa paghibi sa paghagad nin karne.

¹⁴An mga tawong ini sarong pasanon na magabat nin marahay para sako; dai ko sinda madadara na ako sanang saro!

¹⁵Kun iyan an gigibohon mo, maherak ka sako asin gadanon mo na ako tanganing dai na ako magtios kan saimong pasakit.”

¹⁶Tinaraman nin Kagurangnan si Moises, “Pumili ka nin setentang mga gurang sa Israel, idtong minimidbid na mga lider kan komunidad. Darahon mo sinda sako sa Tabernakulo, asin sabihan mo sinda na magtindog sa kataed mo.

¹⁷Mahilig ako dangan makikiolay saimo duman. Kukuahon ko an ibang espiritu na itinao ko saimo asin itatao ko sainda tanganing makatabang sinda sa pag-otob mo sa saimong katongdan para sa mga tawong ini; dangan dai ka na magsosolo sa pag-otob kaiyan.

¹⁸Sabihan mo an mga tawo na maglinig sinda para sa aga asin makakan na sinda nin karne. Nagreklamo sinda asin naghapot kun siisay an matao sainda nin karne. Nagsabi pa sinda na mas marahay an saindang buhay sa Egipto. Kaya tatawan ko sinda nin karne dangan makakan sinda.

¹⁹Bako sana para sa saro, duwa, lima, sampolo o sa beynteng aldaw an itatao ko sainda,

²⁰kundi para sa sambulan, sagkod na magluwas iyan sa saindang dungo dangan mauyam sinda. Ini an mangyayari huli ta isinikwal ninda ako na kaiba ninda asin nagsabi sinda na marahay pang dai na sinda naghale sa Egipto.”

²¹Nagsimbag si Moises, “An bilang kan mga tawong kairiba ko minaabot sa seis syentos mil, asin nagtaram ka na tatawan mo sinda nin karne na makakakan ninda sa laog nin sambulan!

²²May magkanigo daw na baka saka karnero na bubunoon tanganing magkanigo sainda? Kun madakop an gabos na sira sa dagat, magkanigo daw iyan sainda?”

²³Tinaraman nin Kagurangnan si Moises, “Igwa daw nin kasagkoran an sakong kapangyarihan? Mahihiling mo ngunyan kun mangyayari an sakong itinaram o dai!”

²⁴Kaya nagluwas si Moises asin ibinareta sa mga tawo an itinaram nin Kagurangnan. Nagpili siya nin setentang mga lider asin pinatindog sa palibot kan Tabernakulo.

²⁵Dangan naghilig sa panganoron an Kagurangnan asin kinaolay si Moises. Kinua nin Kagurangnan an ibang espiritu na itinao niya ki Moises asin itinao sa setentang mga lider. Kan maghilig sainda an espiritu, nagpoon sindang magpropesiya siring sa mga propeta, alagad dai iyan nahaloy.

²⁶Kan oras na iyan nawalat sa kampo si Eldad saka si Medad, duwang lalaki na kairiba man sa setenta. Alagad minsan dai sinda nagduman sa Tabernakulo, naghilig man sainda an espiritu asin nagpropesiya sinda duman sa kampo.

²⁷Nagdalagan an sarong lalaki tanganing ipaisi ki Moises an ginigibo ni Eldad saka ni Medad.

²⁸Huli kaini, nagsabi si Josue na aki ni Nun, asin katabang ni Moises magpoon kan siya hoben pa, “Kagurangnan kong Moises, paontokon mo sinda!”

²⁹Nagsimbag si Moises, “Nagmamakulog ka daw sako? Tawan logod nin Kagurangnan kan saiyang espiritu an gabos na tawo asin gibohon na propeta sinda gabos!”

³⁰Dangan nagbalik sa kampo si Moises asin an setentang lider nin Israel.

³¹An Kagurangnan nagpadara nin doros na may darang mga pugo hale sa dagat, asin an mga iyan nagralayog sa langkaw na kulang sa sarong metro hale sa daga. Naghurugpa an mga pugo sa kampo asin sa mga lugar sa palibot kaiyan, dakul na kilometro an kahiwasan pasiring sa gabos na direksyon.

³²Kaya nandakop nin mga pugo an mga Israelita kan aldaw asin kan bangging idto patin kan suminunod pang aldaw; dai makulang sa sangribong kilo an nadakop kan lambang saro. Binalad ninda an mga pugo sa palibot kan kampo.

³³Alagad dai pa ngani ninda nauubos an karne, naanggot na sainda an Kagurangnan asin nagdara siya sainda nin peste.

³⁴Kaya an lugar nginaranan Kibrot-Hattaava huli ta duman ninda ilinubong an mga tawong nagin sobra an pagmawot sa karne.

³⁵Hale duman, nagbaklay sinda pasiring sa Hazerot asin nagkampo duman.