Read Central Bicolano Numbers 12 Bible Online

Numbers 12 - Central Bicolano bible

Numbers 12

¹Taga Cus an naagom ni Moises kaya binasol siya ni Miriam asin ni Aaron.

²Olay ninda, “Nagtaram daw an Kagurangnan sa paagi sana nanggad ni Moises? Bakong nagtaram man siya sa paagi nyato?” Nadangog nin Kagurangnan an saindang sinabi. (

³Si Moises sarong tawong orog na mapakumbaba ki sa kiisay man na nabubuhay sa kinaban.)

⁴Biglang nagtaram an Kagurangnan ki Moises, ki Aaron asin ki Miriam, “Magduman kamong tolo sa Tabernakulo.” Nagduman sinda

⁵dangan naghilig an Kagurangnan sa sarong hariging panganoron, nagtindog sa pintoan kan Tabernakulo dangan inapod si Aaron asin si Miriam. Nagrani sinda,

⁶dangan nagtaram an Kagurangnan, “Dangoga nindo an sakong itataram! Kun may mga propeta saindo, minapahiling ako sainda sa mga bisyon, asin kinakaolay ko sinda sa mga pangatorogan.

⁷Alagad bakong siring an ginigibo ko ki Moises na sakong sorogoon; siya an pinaniwalaan ko kan sakong banwaan.

⁸Hampangan ko siyang kinakaolay, maliwanag kong itinataram saiya an gabos asin bako sa mga paokod; nahiling niya an sakong porma. Tadaw ta nangahas kamong magtaram laban sa sorogoon kong si Moises?”

⁹Anggot sainda an Kagurangnan, kaya kan maghale siya,

¹⁰asin kan maghale sa Tabernakulo an panganoron, nalakop tolos an hawak ni Miriam kan nakakatakot na helang sa kublit asin nagputi siring sa ambon. Kan mahiling idto ni Aaron,

¹¹nagtaram siya ki Moises, “Nakikimaherak ako saimo na dai mo kami pagpadusahan huli kan naginibo ming kalolongan asin kasalan.

¹²Dai mo siya pagpabayaan na makaarog sa sarong namundag na gadan, na an kabanga kan saiyang kublit mayo na.”

¹³Kaya namibi si Moises sa Kagurangnan, “Nakikimaherak ako, O Dios, na paomayan mo siya!”

¹⁴Nagsimbag an Kagurangnan, “Kun linutaban siya sa lalawogon kan saiyang ama, bakong dadarahon niya an kasosopgan sa laog nin pitong aldaw? Pabayaan nindo siya sa luwas kan kampo sa laog nin pitong aldaw; pakatapos kaiyan pwede na siyang makalaog.”

¹⁵Kaya pitong aldaw si Miriam sa luwas kan kampo, asin dai nagpadagos sa pagbaklay an mga Israelita sagkod na dai siya nakalaog giraray.

¹⁶Dangan naghale an mga Israelita sa Hazerot asin nagkampo sa kalangtadan nin Paran.