Read Central Bicolano Numbers 14 Bible Online

Numbers 14 - Central Bicolano bible

Numbers 14

¹Mag-agang nagtangis an bilog na komunidad nin Israel.

²Nagreklamo sinda ki Moises asin ki Aaron; olay ninda, “Marahay pang nagadan na kami duman sa Egipto o minsan digdi sa kalangtadan!

³Ano ta dadarahon pa kita nin Kagurangnan sa dagang idto? Magagadan kita sa gera asin mabibihag an satong mga agom sagkod mga aki. Bako daw na mas marahay na magbalik kita sa Egipto?”

⁴Kaya nag-orolay sinda na magpili nin sarong lider na mangengenot sa saindang pagbalik sa Egipto.

⁵Dangan sa atubangan kan mga Israelita nagdapa sa daga si Moises asin si Aaron.

⁶Huli sa kamondoan, ginisi ni Josue na aki ni Nun asin ni Caleb na aki ni Jefunne an saindang mga gubing. An duwang espiyang ini, na kaibahan kan mga nagsiyasat kan daga,

⁷nagsabi sa mga tawo, “An dagang siniyasat mi sarong marahay na daga.

⁸Kun nawiwili sato an Kagurangnan dadarahon niya kita duman asin itatao niya sato an daga na mayaman sa gabos na bagay.

⁹Dai kamo magtumang sa Kagurangnan. Dai man kamo matakot sa mga nag-eerok duman huli ta madali ta sindang madaog. Kaiba ta an Kagurangnan asin nadaog na niya an mga dios-dios na nagsusurog sainda; kaya dai kamo matakot.”

¹⁰Boot kan bilog na komunidad na gapoon sinda sagkod na magadan, alagad biglang nahiling kan mga tawo sa Tabernakulo an kamurawayan nin Kagurangnan.

¹¹Tinaraman nin Kagurangnan si Moises, “Sagkod nuarin ako isisikwal kan mga tawong ini? Sagkod nuarin sinda dai matubod sako minsan pinahilingan ko na sinda nin mga milagro?

¹²Papadarahan ko sinda nin peste. Tutunawon ko sinda asin gigibohon takang ama nin sarong dakulang nasyon na mas makosog ki sa sainda!”

¹³Alagad nagsabi si Moises sa Kagurangnan, “Kinua mo an mga tawong ini sa Egipto huli kan saimong kapangyarihan. Kun maaraman kan mga Egipcio na tinunaw mo an saimong banwaan,

¹⁴ipapamareta ninda iyan sa mga nag-eerok sa dagang ini. Nadangog na man kan mga tawong ini na kaiba mi ika, O Kagurangnan, na nahihiling ka kun minaontok an saimong panganoron sa tangod nyamo, asin kun aldaw nangengenot ka sa samo sa sarong harigi nin panganoron dangan kun banggi sa sarong harigi nin kalayo.

¹⁵Kun gadanon mo an saimong banwaan, an mga nasyon na nakadangog kan saimong ginibo masarabi

¹⁶na ginadan mo sa kalangtadan an saimong banwaan huli ta dai mo kayang darahon sinda sa dagang ipinanuga mo sainda.

¹⁷Kaya nakikimaherak ako na ipahiling mo samo an saimong kapangyarihan siring kan ipinanuga mo kan ika magtaram,

¹⁸‘Ako, an Kagurangnan, dai tolos naaanggot saka dakula sa pagkamoot, nagpapatawad kan kasalan patin kasombikalan. Alagad papadusahan ko an mga aki asin makoapo sagkod sa ikatolo patin ikaapat na henerasyon huli kan mga kasalan kan saindang mga magurang.’

¹⁹Nakikimaherak ako, patawada an kasalan kan mga tawong ini Kagurangnan, sosog sa saimong dakula asin danay na pagkamoot, siring kan pagpatawad mo sainda poon kan paghale ninda sa Egipto.”

²⁰Nagsimbag an Kagurangnan, “Pinapatawad ko sinda, siring kan saimong hinahagad.

²¹Alagad siring na ako buhay, asin siring na nakakalakop sa kinaban an sakong kamurawayan,

²²mayo nin mabubuhay sa mga tawong ini tanganing maglaog sa dagang idto. Nahiling ninda an sakong kamurawayan asin an mga milagrong ginibo ko sa Egipto saka sa kalangtadan, alagad dakul na beses ninda akong binalo asin dai ninda ako dinangog.

²³Dai nanggad sinda makakalaog sa dagang ipinanuga ko sa saindang mga ginikanan. Mayo nin siisay sa mga nagsikwal sako na makakalaog duman.

²⁴Alagad nalalaen sainda an sorogoon kong si Caleb; nagin maimbod siya sako. Huli kaini, dadarahon ko siya sa dagang siniyasat niya asin masasadirihan iyan kan saiyang mga kapagarakian.

²⁵Alagad huli ta nag-eerok ngunyan sa kapantayan an mga Amalekita asin an mga Cananeo, sa aga, magbalik kamo sa kalangtadan sa direksyon kan Dagat na Pula.”

²⁶Tinaraman nin Kagurangnan si Moises asin si Aaron,

²⁷“Sagkod nuarin maggugurumod-gumod tumang sako an mga maraot na tawong ini? Nadangog ko an saindang mga reklamo.

²⁸Kaya sabihan mo sinda, ‘Minasumpa ako siring na ako buhay, na gigibohon ko an hinahagad nindo.

²⁹Magagadan kamo asin an saindong mga bangkay magkakawararak digdi sa kalangtadan. Mayo nin siisay man sa mga nasenso, magpoon sa beynte an edad paitaas na naggurumodgumod tumang sako

³⁰an makakalaog sa daga na ipinanuga kong paeerokan saindo, pwera ki Caleb saka ki Josue.

³¹Alagad an saindong mga aki na sinabi nindong magigin mga bihag, iyo an dadarahon ko sa daga na sinayumahan nindo, asin maerok sinda duman.

³²Digdi kamo magagadan sa kalangtadan.

³³An saindong mga aki maglalagalag sa kalangtadan sa laog nin kwarentang taon asin magtitios sinda huli kan saindong mga kasalan sagkod na magadan an natatada saindo.

³⁴Babayadan nindo an saindong kasalan sa laog nin kwarentang taon, sangtaon sa lambang aldaw kan kwarentang aldaw na ipinagsiyasat nindo kan daga. Maaaraman nanggad nindo an kahulogan kan pagtumang nindo sako!

³⁵Minasumpa ako na gigibohon ko ini saindo, kamong mga maraot na tawo na nagkasararo tumang sako. An lambang saro saindo magagadan sa kalangtadan na ini. Ako, an Kagurangnan, an nagtaram.’”

³⁶Kaya nagkagaradan sa peste na ipinadara nin Kagurangnan an mga espiya na sinugo ni Moises sa pagsiyasat kan daga, na nagbalik asin nagtao nin salang bareta na iyo an nagin dahelan kan pagreklamo kan mga Israelita.

³⁸An dai sana nagadan sa doseng espiya iyo si Josue saka si Caleb.

³⁹Kan ipahayag ni Moises sa mga Israelita an itinaram nin Kagurangnan, namondo sinda nin makuri.

⁴⁰Pagkaaga, naglakaw sinda pasiring sa mabulod na daga tanganing salakayon idto. Nagsabi sinda, “Andam na kami ngunyan na magduman sa lugar na itinaram nin Kagurangnan. Inaako mi na kami nagkasala.”

⁴¹Alagad nagsabi si Moises, “Tadaw ta linalapas nindo ngunyan an pagboot nin Kagurangnan? Mayo nin marahay na mangyayari saindo.

⁴²Dai kamo magpadagos; mayo sa kaibahan nindo an Kagurangnan asin madadaog kamo kan mga kaiwal.

⁴³Sa oras na labanan nindo an mga Amalekita asin mga Cananeo, magagadan kamo; dai kamo iibahan nin Kagurangnan huli ta nagtalikod kamo saiya.”

⁴⁴Alagad nagdagos sinda sa mabulod na daga maski dai ninda dara an Kaban nin Tipan asin dai nag-iba sainda si Moises.

⁴⁵Sinalakay sinda kan mga Amalekita saka kan mga Cananeo na nag-eerok duman; dinaog sinda kan mga kaiwal asin linamag sagkod sa Horma.