Read Central Bicolano Numbers 16 Bible Online

Numbers 16 - Central Bicolano bible

Numbers 16

¹Nagrebelde laban sa pamamayo ni Moises si Kora na aking lalaki ni Izar na gikan sa Levitang kamaganakan ni Kohat. Nag-apil saiya an tolong lalaking gikan sa tribu ni Ruben na si Datan saka si Abiram na mga aking lalaki ni Eliab, asin si On na aking lalaki ni Pelet. Nagrebelde sinda laban ki Moises kaiba an dos syentos singkwentang mga midbid na lider kan komunidad.

³Nagtiripon sinda sa atubang ni Moises saka ni Aaron, dangan nagsabi, “Sobra na an gibo nindo! Sadiri nin Kagurangnan an gabos na kaayon sa komunidad asin kaibahan siya kan gabos. Tadaw ta nagpapalangkaw kamo sa komunidad nin Kagurangnan?”

⁴Kan madangog ini ni Moises, nagdapa siya sa daga asin namibi.

⁵Dangan sinabihan niya si Kora asin an mga kairiba kaini, “Sa aga, ipapahiling sato nin Kagurangnan kun siisay an sadiri niya, an mga pinili niya na papadolokon niya saiya sa altar.

⁶Kumua kamo nin insensaryo sa aga, bugtakan nindo nin baga asin insenso, dangan darahon sa altar. Mahihiling nyato kun siisay sato an pinili nin Kagurangnan. Sobra na kamong mga Levita!”

⁷

⁸Sinabihan pa ni Moises si Kora, “Pagdangog kamong mga Levita!

⁹Sadit pa daw na bagay para saindo na linaen kamo sa komunidad nin Israel kan Dios nin Israel tanganing makadolok kamo saiya, makagibo kan saindong katongdan sa Tabernakulo nin Kagurangnan asin makapaglingkod sa komunidad?

¹⁰Itinao niya saindo saka sa ibang mga Levita an onrang iyan, asin ngunyan boot pa nindong kuahon an pagkapadi.

¹¹Kun minareklamo kamo ki Aaron, sa katunayan minareklamo kamo sa Kagurangnan.”

¹²Dangan ipinaapod ni Moises si Datan saka si Abiram, alagad nagsabi sinda, “Dai kami madiyan!

¹³Kulang pa nanggad saimo an paghale mo samo sa matubang na daga nin Egipto tanganing gadanon digdi sa kalangtadan? Tano ta boot mo pang magin samong kagurangnan?

¹⁴Dai mo pa ngani kami nadadara sa sarong daga na mayaman sa gabos na bagay asin dai pa natatawan nin pamanang mga oma saka mga ubasan, dangan ngunyan boot mo kaming dayaon. Dai kami madiyan!”

¹⁵Naanggot nin marahay si Moises dangan nagsabi sa Kagurangnan, “Dai mo pag-akoon an ano man na dolot na dadarahon kan mga lalaking ini. Dai ako naggibo nin maraot sainda; dai ako nagkua minsan saro kan saindang mga asno.”

¹⁶Sinabihan ni Moises si Kora, “Mag-atubang kamo sa Kagurangnan sa aga, ika asin an dos syentos singkwenta mong parasunod; siring man si Aaron.

¹⁷An lambang saro saindo, madara kan saiyang insensaryo na binugtakan nin insenso, dangan darahon niya iyan sa altar.”

¹⁸Kaya kinua kan lambang saro an saiyang insensaryo dangan binugtakan nin baga saka insenso. Pakatapos, nagtindog sinda sa pintoan kan Tabernakulo kaiba si Moises saka si Aaron.

¹⁹Tinipon ni Kora an bilog na komunidad asin nag-atubang ki Moises saka ki Aaron sa pintoan kan Tabernakulo. Dangan nagpahiling an kamurawayan nin Kagurangnan sa bilog na komunidad.

²⁰Tinaraman nin Kagurangnan si Moises saka si Aaron,

²¹“Humarayo kamo sa mga tawong ini tanganing matunaw ko sinda tolos.”

²²Alagad nagdapa sa daga si Moises saka si Aaron, dangan nagsabi, “O Dios na kagtao nin buhay sa gabos, kun nagkakasala an saro katawo, maaanggot ka daw sa bilog na komunidad?”

²³Tinaraman nin Kagurangnan si Moises,

²⁴“Sabihan mo an mga tawo na humarayo sa tolda ni Kora, ni Datan, saka ni Abiram.”

²⁵Nagduman si Moises ki Datan saka ki Abiram; kasunod niya an kamagurangan nin Israel.

²⁶Sinabihan niya an mga tawo, “Humarayo kamo sa mga tolda kan mga maraot na tawong ini. Dai nindo pagdutaan an ano man na pagsadiri ninda tanganing dai kamo matunaw kaiba ninda huli kan saindang mga kasalan.”

²⁷Kaya nagharayo sinda sa tolda ni Kora, ni Datan saka ni Abiram. Nagluwas si Datan saka si Abiram dangan nagtindog sa pintoan kan saindang tolda, kaiba an saindang mga agom, mga aking lalaki sagkod mga saradit na aki.

²⁸Sinabihan ni Moises an mga tawo, “Sa paaging ini maaaraman nindo na sinugo ako nin Kagurangnan tanganing gibohon an mga bagay na ini, asin bako ko ining sadiring kagustohan.

²⁹Kun an mga tawong ini magadan sa natural na paagi, na mayo nin padusa hale sa Dios, nangangahulogan iyan na dai ako sinugo nin Kagurangnan.

³⁰Alagad kun gumibo an Kagurangnan nin sarong bagay na dai pa nadangog, na bumuka an daga asin halonon sinda nin buhay kaiba an gabos nindang pagsadiri, maaaraman nindo na isinikwal ninda an Kagurangnan.”

³¹Pakasabi kaini ni Moises, buminuka an dagang natitindogan ni Datan saka ni Abiram

³²asin hinalon sinda kaiba an saindang mga pamilya, an mga tawohan ni Kora sagkod an gabos nindang pagsadiri.

³³Kaya nalubong sindang buhay kaiba an saindang mga pagsadiri. Suminera an daga sagkod dai na sinda nahiling kan mga Israelita.

³⁴Nagdurulag an bilog na banwaan nin Israel kan madangog an saindang inagrangay. Nagkururahaw sinda, “Magharale kita digdi ta tibaad halonon man kita kan daga!”

³⁵Dangan nagpadara an Kagurangnan nin kalayo asin sinulo an dos syentos singkwentang lalaki na nagdolot nin insenso.

³⁶Dangan tinaraman nin Kagurangnan si Moises,

³⁷“Sabihan mo si Eleazar, na aking lalaki kan pading si Aaron, na haleon sa mga bangkay kan nagkasurulo an mga bronseng insensaryo asin iwarak sa harayo an mga baga huli ta banal an mga insensaryo.

³⁸Nagin banal an mga ini kan idolot sa altar nin Kagurangnan. An mga insensaryo kan mga lalaking ini na ginadan huli ta nagkasala, pulpogon mo asin gibohon na mga mahimpis na pantahob sa altar. Ini magigin sarong tanda para sa mga Israelita.”

³⁹Kaya kinua kan pading si Eleazar an mga insensaryo dangan ginibong mga mahimpis na pantahob sa altar

⁴⁰bilang sarong pagiromdom sa mga Israelita na an siisay man na bakong gikan sa kapagarakian ni Aaron, dai dapat magrani sa altar tanganing magtutong nin insenso para sa Kagurangnan, huli ta makakaarog siya ki Kora sagkod sa saiyang mga kairiba. An gabos na ini ginibo sosog sa ipinagboot nin Kagurangnan ki Eleazar huli ki Moises.

⁴¹Sunod na aldaw, nagreklamo an bilog na komunidad ki Moises saka ki Aaron asin nagsabi sinda, “Ginadan nindo an nagkapirang tawo kan banwaan nin Kagurangnan.”

⁴²Kan nagkatiripon na sinda gabos tanganing magprotesta ki Moises saka ki Aaron, nagsalingoy sinda sa Tabernakulo asin nahiling ninda na tinahoban idto kan panganoron dangan tuminunga an kamurawayan nin Kagurangnan.

⁴³Nagduman si Moises saka si Aaron sa atubangan kan Tabernakulo.

⁴⁴Dangan nagtaram an Kagurangnan ki Moises,

⁴⁵“Humarayo kamo sa mga tawong iyan asin tutunawon ko sinda tolos!” Nagdapa sindang duwa,

⁴⁶dangan nagsabi si Moises ki Aaron, “Kuahon mo an saimong insensaryo, bugtakan mo kan baga sa altar, asin bugtakan mo nin insenso an baga. Daraha an insensaryo pasiring sa mga tawo asin gibohon mo an seremonya nin paglinig para sainda. Maghidali ka! Anggot na an Kagurangnan asin nagpoon na an peste.”

⁴⁷Kaya siring sa sinabi ni Moises, kinua ni Aaron an saiyang insensaryo asin duminalagan pasiring sa tahaw kan mga tawo. Kan nahiling niyang nagpoon na an peste, ibinugtak niya sa baga an insenso asin ginibo niya an seremonya nin paglinig sa banwaan.

⁴⁸Napaontok kaini an peste, asin nagtindog si Aaron sa pagultanan kan mga buhay asin kan mga gadan.

⁴⁹An bilang kan mga nagkagaradan uminabot sa katorse mil, syete syentos, pwera kan nagkagaradan sa pagrebelde ni Kora.

⁵⁰Kan mag-ontok na an peste, nagbalik si Aaron ki Moises duman sa pintoan kan Tabernakulo.