Read Central Bicolano Numbers 20 Bible Online

Numbers 20 - Central Bicolano bible

Numbers 20

¹Kan enot na bulan, an bilog na komunidad nin Israel nakaabot sa kalangtadan nin Zin asin nagkampo sa Kades. Duman nagadan asin ilinubong si Miriam.

²Mayo nin tubig sa pinagkampohan ninda, kaya pinalibotan kan mga tawo si Moises saka si Aaron

³dangan nagreklamo, “Mas marahay pang nagadan na kami sa atubangan kan Tabernakulo nin Kagurangnan kaiba kan kapwa nyamo mga Israelita.

⁴Tadaw ta dinara nindo kami digdi sa kalangtadan? Tangani sanang magadan digdi kaiba an samong mga hayop?

⁵Tadaw ta hinale nindo kami sa Egipto asin dinara sa maraot na lugar na ini na mayong nabubuhay na ano man? Mayo digdi nin pagkakan; mayong higera, ubas o granada. Mayo minsan tubig na maiinom!”

⁶Binayaan sinda ni Moises saka ni Aaron asin nagpasiring sa pintoan kan Tabernakulo. Nagdapa sinda sa daga, asin nagpahiling sainda an kamurawayan nin Kagurangnan.

⁷Tinaraman nin Kagurangnan si Moises,

⁸“Kuahon mo an sugkod na nasa atubangan kan Kaban nin Tipan. Dangan tiponon nindo ni Aaron an bilog na komunidad. Sa atubangan ninda gabos, taraman mo an gapo na yaon duman, dangan maluwas an tubig. Sa paaging ini papaluwason mo an tubig sa gapo para sa mga tawo, tubig na maiinom ninda asin kan saindang mga hayop.”

⁹Kinua ni Moises an sugkod, sosog sa pagboot nin Kagurangnan.

¹⁰Tinipon ni Moises saka ni Aaron an bilog na komunidad sa atubangan kan gapo. Sinabihan sinda ni Moises, “Pagdangog kamo, mga rebelde. Boot nindong magpaluwas kami nin tubig hale sa gapong ini para saindo?”

¹¹Pakasabi kaini, itinaas ni Moises an sugkod dangan binadolan nin duwang beses an gapo. Luminuwas an kadakul na tubig; nag-inom an gabos na tawo saka hayop.

¹²Alagad tinuyaw nin Kagurangnan si Moises saka si Aaron, “Huli sa kakulangan kan saindong pagtubod na ipamidbid sa mga tawo an sakong banal na kapangyarihan, bako kamo an mangengenot sainda pasiring sa dagang ipinanuga kong itatao sainda.”

¹³Nangyari ini sa Meriba, saen nagreklamo an banwaan nin Israel tumang sa Kagurangnan; duman niya ipinahiling sainda na siya banal.

¹⁴Hale sa Kades, nagpadara si Moises nin mga sugo sa hade kan Edom. Olay ninda, “An mensaheng ini hale sa saimong mga kadugo, an mga tribu nin Israel. Nakakaisi ka kan mga kasakitan na uminabot samo,

¹⁵kun paanong an samong mga ginikanan nagduman sa Egipto, saen nag-erok kami nin haloy na panahon. Inapi kami asin an samong mga ginikanan kan mga Egipcio,

¹⁶kaya nag-agrangay kami sa Kagurangnan. Dinangog niya an samong inagrangay asin nagsugo siya nin anghel na iyo an nangenot samo paluwas sa Egipto. Ngunyan, uya kami sa Kades, an banwaan sa pagdolonan kan saimong teritoryo.

¹⁷Tugote kaming mag-agi sa saimong daga. Dai kami maagi sa kaomahan, ni sa mga ubasan. Dai man kami mainom kan tubig sa saimong mga bubon. Maagi nanggad sana kami sa Tinampo kan Hade sagkod na makaluwas kami sa saimong teritoryo.”

¹⁸Alagad nagsimbag an hade kan Edom, “Dai ako matugot na mag-agi kamo sa sakong daga! Probaran nindong mag-agi asin sasalakayon ko kamo.”

¹⁹Nagsabi an banwaan nin Israel, “Maagi nanggad sana kami sa Tinampo kan Hade. Kun kami o an samong mga hayop mag-inom kan tubig nindo, babayadan mi iyan. Makikiagi nanggad sana kami.”

²⁰Nagsimbag an hade, “Dai kamo mag-agi!” Dangan nagluwas siya kaiba an dakul na soldados tanganing salakayon an mga Israelita.

²¹Huli ta dai pinaagi kan hade kan Edom an mga Israelita, nag-agi sinda sa ibang dalan.

²²Naghale sa Kades an bilog na komunidad nin Israel asin nakaabot sinda sa Bukid nin Hor,

²³sa pagdolonan nin Edom. Duman tinaraman nin Kagurangnan si Moises saka si Aaron,

²⁴“Dai makakalaog si Aaron sa dagang ipinanuga kong itatao sa Israel; magagadan siya huli ta dai nindo sinunod an sakong pagboot duman sa Meriba.

²⁵Ipag-iba mo sa itaas kan Bukid nin Hor si Aaron asin an saiyang aking si Eleazar.

²⁶Hubaon mo duman an sa pading mga gubing ni Aaron asin isulot mo ki Eleazar. Duman magagadan si Aaron.”

²⁷Ginibo ni Moises an ipinagboot nin Kagurangnan. Nagtukad sinda sa Bukid nin Hor mantang naghihiling an bilog na komunidad.

²⁸Dangan hinuba ni Moises an sa pading mga gubing ni Aaron asin isinulot ki Eleazar. Nagadan si Aaron duman sa alitoktok kan bukid. Dangan naghilig hale sa bukid si Moises asin si Eleazar.

²⁹Naaraman kan bilog na komunidad na gadan na si Aaron kaya nagmondo sinda para saiya sa laog nin treyntang aldaw.