Read Central Bicolano Numbers 23 Bible Online

Numbers 23 - Central Bicolano bible

Numbers 23

¹Sinabihan ni Balaam si Balak, “Ipatugdok mo ako digdi nin pitong altar, asin darahan mo ako nin pitong torong baka saka pitong lalaking karnero.”

²Sinunod ni Balak an ipinagibo saiya ni Balaam, asin nagdolot sindang duwa nin sarong torong baka saka sarong lalaking karnero sa lambang altar.

³Nagsabi si Balaam ki Balak, “Tumindog ka digdi sa kataed kan saimong tinutong na atang asin mahale ngona ako ta tibaad tuparon ako nin Kagurangnan. Ipapaisi ko saimo an ano man na ipahayag niya sako.” Kaya solo siyang nagduman sa alitoktok nin sarong bulod,

⁴asin tinupar siya nin Dios. Sinabihan ni Balaam an Dios, “Nagpaandam ako nin pitong altar asin nagdolot ako nin sarong torong baka saka sarong lalaking karnero sa lambang altar.”

⁵Tinaraman nin Kagurangnan si Balaam kan mga dapat isabi niya dangan pinabalik niya ini ki Balak.

⁶Kaya nagbalik si Balaam, asin inabotan niya si Balak na nakatindog pa sa kataed kan saiyang tinutong na atang kaiba an mga lider nin Moab.

⁷Sinabi ni Balaam an propesiyang ini: “Ipinaapod ako ni Balak na hade nin Moab Hale sa Siria, hale sa kabukidan sa sirangan. An sabi niya sako, ‘Madya, maldisyonon mo si Jacob. Madya, isikwal mo an banwaan nin Israel!’

⁸Paano ko mamaldisyonon an dai minaldisyon nin Dios? Paano ko isisikwal an dai isinikwal nin Dios?

⁹Nahihiling ko sinda hale sa alitoktok nin mga kabukidan; Binabantayan ko sinda hale sa kabubuldan. Sinda sarong nasyon na solo-solong namumuhay; Nakakasabot na mas paladan sinda ki sa ibang nasyon.

¹⁰An mga kapagarakian nin Israel siring sa alpog. Dai sinda mabibilang huli ta dakul nin marahay. Mapasako logod an kagadanan kan matanos, Asin an sakong kataposan magin logod siring kan saiya!”

¹¹Dangan nagsabi si Balak ki Balaam, “Anong ginibo mo sako? Dinara taka digdi tanganing maldisyonon an sakong mga kaiwal, alagad mayo kang ginibo kundi bendisyonan sinda.”

¹²Nagsimbag si Balaam, “Ikakasabi ko sana an itinaram sako nin Kagurangnan.”

¹³Nagsabi si Balak ki Balaam, “Umiba ka sako sa ibang lugar na dikit sana na Israelita an mahihiling mo; duman mo sinda maldisyonon.”

¹⁴Ipinag-iba niya si Balaam sa oma ni Zofim sa alitoktok kan Bukid nin Pisga. Nagpatugdok siya duman nin pitong altar asin nagdolot siya nin sarong torong baka saka sarong lalaking karnero sa lambang altar.

¹⁵Nagsabi si Balaam ki Balak, “Digdi ka sa kataed kan saimong tinutong na atang huli ta tutuparon ko an Dios sa oroenotan.”

¹⁶Tinupar nin Kagurangnan si Balaam asin tinaraman kan mga dapat niyang itaram ki Balak. Dangan pinabalik niya si Balaam ki Balak.

¹⁷Inabotan ni Balaam si Balak na nakatindog sa kataed kan saiyang tinutong na atang, kaiba an mga lider nin Moab. Naghapot si Balak kan itinaram nin Kagurangnan,

¹⁸asin sinabi ni Balaam an propesiyang ini: “Madya Balak, aking lalaki ni Zippor, Asin hinanyoga an sakong sasabihon.

¹⁹An Dios bakong siring sa mga tawo na nagpuputik; Bako siyang tawo na nagbabago nin isip. An ano man na ipinanuga niya, ginigibo niya; Minataram siya, asin nangyayari iyan.

²⁰Pinagbotan ako na magbendisyon, Asin kun an Dios minabendisyon, dai ko iyan maliliwat.

²¹Mayo akong nahihiling na kapahamakan ki Jacob; O ano man na kasakitan sa Israel. An Kagurangnan na saindang Dios yaon sainda; Siya an ipinapahayag nindang hade.

²²An Dios an nagkua sainda sa Egipto; Nakikilaban siya para sainda siring sa sarong lalaw na toro.

²³Huli ta mayong gayuma na makakadagka ki Jacob, Mayo nin pangkukulam na makakalaban sa Israel. Masabi ngunyan an mga tawo manongod sa Israel, “Hilinga nindo kun ano an ginibo nin Dios!”

²⁴Siring sa makosog na leon an nasyon nin Israel; Dai nag-oontok sagkod na makakan an biktima, Asin mainom an dugo kan saiyang ginadan.

²⁵Nagsabi si Balak ki Balaam, “Habo mong maldisyonon an banwaan nin Israel. Kutana dai mo man sinda pagbendisyonan!”

²⁶Nagsimbag si Balaam, “Bakong sinabi ko saimo na an itinaram sana nin Kagurangnan iyo an sakong gigibohon?”

²⁷Nagsabi si Balak, “Umiba ka sako; dadarahon taka sa ibang lugar. Tibaad itugot na nin Dios na maldisyonon mo sinda duman.”

²⁸Kaya ipinag-iba niya si Balaam sa alitoktok kan Bukid nin Peor na nagdudungaw sa desyerto.

²⁹Nagsabi saiya si Balaam, “Igibo mo ako digdi nin pitong altar asin darahan mo ako nin pitong torong baka saka pitong lalaking karnero.”

³⁰Ginibo ni Balak an sinabi saiya ni Balaam, dangan nagdolot siya nin sarong torong baka saka sarong lalaking karnero sa lambang altar.