Read Central Bicolano Numbers 25 Bible Online

Numbers 25 - Central Bicolano bible

Numbers 25

¹Kan magkampo sa Sittim an mga Israelita, nagpoon na makidorog an mga lalaki sa mga babaeng Moabita na yaon duman.

²Inalok sinda kan mga babaeng ini na magdolot sa saindang mga dios-dios. Nagkakan an mga Israelita asin nagsamba sa dios-dios

³na si Baal nin Peor; kaya naanggot sainda an Kagurangnan.

⁴Nagtaram siya ki Moises, “Tiponon mo an gabos na lider nin Israel dangan bilang pagkuyog sako, bitayon mo sinda sa atubang kan mga tawo, asin dai na ako maaanggot sa mga tawo.”

⁵Sinabihan ni Moises an mga hukom, “Gadanon nindo an lambang lalaki sa saindong tribu na nagin parasamba ki Baal nin Peor.”

⁶Saro sa mga Israelita an nagdara nin babaeng Midianita sa saiyang tolda sa panhiling ni Moises asin kan bilog na komunidad mantang nagtatangis an mga ini sa may pintoan kan Tabernakulo.

⁷Kan mahiling ini ni Finehas na aking lalaki ni Eleazar asin makoapo kan padi na si Aaron, binayaan niya an katiriponan asin kuminua siya nin garod.

⁸Sinunod niya an lalaking may darang babae sa tolda asin tinuhog niya kan garod an duwa. Huli kaini uminontok an peste sa Israel,

⁹alagad an nagadan sa peste uminabot sa beynte y kwatro mil katawo.

¹⁰Nagtaram an Kagurangnan ki Moises,

¹¹“Huli kan ginibo ni Finehas, dai na ako anggot sa banwaan nin Israel. Dai siya nagtugot na pagsambahon an ibang dios kundi ako sana, kaya dai ko sinda inubos sa sakuyang kaanggotan.

¹²Sabihan mo siya na makikipagtipan ako saiya.

¹³An pagkapadi magdadanay saiya asin sa saiyang kapagarakian huli ta ipinahiling niya an saiyang kaimbodan sa saiyang Dios, asin binayadan niya an kasalan kan mga tawo.”

¹⁴An Israelitang ginadan kaiba an babaeng Midianita iyo si Zimri na aking lalaki ni Salu. Pamayo siya nin sarong pamilya sa tribu ni Simeon.

¹⁵An babae iyo si Cozbi na aki ni Zur, na pamayo nin sarong grupo kan mga kamaganakan nin Midian.

¹⁶Nagboot an Kagurangnan ki Moises,

¹⁷“Salakayon nindo an mga Midianita asin gadanon nindo sinda,

¹⁸huli kan ginibo nindang karatan kan dayaon ninda kamo sa Peor, asin huli sa tugang nindang si Cozbi, na nagadan kan panahon nin peste sa Peor.”