Read Central Bicolano Numbers 28 Bible Online

Numbers 28 - Central Bicolano bible

Numbers 28

¹Pinagbotan nin Kagurangnan si Moises

²na tukdoan an mga Israelita na magdolot sa Dios sa talaan na panahon kan mga dolot na pagkakan na nakakawili sa saiya.

³Iyo ini an mga dolot na pagkakan na idodolot sa Kagurangnan aroaldaw: para sa tinutong na atang, duwang lalaking kordero na manangtaon an edad, na gabos mayo nin ano man na kaninan.

⁴Idolot nindo an saro pagkaaga dangan an saro pagkabanggi;

⁵an lambang saro iibahan nin sarong kilo kan pinakamarahay na arinang trigo na minasa sa sarong litro kan pinakamarahay na lana nin oliba.

⁶Iyo iyan an dolot sa aroaldaw na tututongon nanggad siring kan enot na idinolot sa Bukid nin Sinai bilang sarong dolot na pagkakan, sarong parong na nakakawili sa Kagurangnan.

⁷Bilang dolot na arak na kaiba kan enot na kordero, iula nindo sa altar an sarong litrong arak.

⁸An saro pang kordero idolot nindo pagkabanggi asin siring kan pagkaagang dolot, ibahan nindo nin dolot na arak. Saro man iyan na dolot na pagkakan, sarong parong na nakakawili sa Kagurangnan.

⁹Sa aldaw nin Sabbath, magdolot kamo nin duwang lalaking kordero na manangtaon an edad asin mayo nin ano man na kaninan, duwang kilong arina na sinalakan nin lana nin oliba bilang sarong dolot na pagkakan, saka an dolot na arak.

¹⁰An tinutong na atang na iyan idodolot nindo sa lambang Sabbath, laen pa kan aroaldaw na tinutong na atang saka dolot na arak.

¹¹Sa pagpoon kan lambang bulan, magdolot kamo sa Kagurangnan nin tinutong na atang: duwang torilyong baka, sarong lalaking karnero, pitong lalaking kordero na manangtaon an edad, na gabos mayo nin ano man na kaninan.

¹²Bilang dolot na pagkakan, magdolot man kamo nin arinang sinalakan nin lana nin oliba; tolong kilong arina para sa lambang torilyo; duwang kilo para sa lalaking karnero;

¹³asin sarong kilo para sa lambang kordero. An mga tinutong na atang na iyan mga dolot na pagkakan, sarong parong na nakakawili sa Kagurangnan.

¹⁴Kaiba kaiyan iyo an mga dolot na arak; duwang litrong arak para sa lambang torong baka, saro may kabangang litro para sa lalaking karnero, asin sarong litro para sa lambang kordero. Iyo ini an pagsusundon para sa tinutong na atang kun enot na aldaw kan lambang bulan kan taon.

¹⁵Laen pa kan aroaldaw na tinutong na atang saka dolot na arak, magdolot man kamo nin sarong lalaking kanding bilang dolot para sa kasalan.

¹⁶Selebraron nindo an Paskwa nin Kagurangnan sa ikakatorseng aldaw kan enot na bulan.

¹⁷Mapoon an pyesta sa ikakinseng aldaw asin mapadagos sa laog nin pitong aldaw; sa mga aldaw na iyan, kakanon nindo an tinapay na mayo nin lebadura.

¹⁸Sa enot na aldaw kan pyesta magtiripon kamo sa pagsamba asin dai kamo magtrabaho.

¹⁹Magdolot kamo sa Kagurangnan nin sarong tinutong na atang bilang dolot na pagkakan: duwang torilyong baka, sarong lalaking karnero, asin pitong lalaking kordero na manangtaon an edad, na gabos mayo nin ano man na kaninan.

²⁰Idolot nindo an mga iyan kaiba an dolot na pagkakan na arinang sinalakan nin lana nin oliba: tolong kilo para sa lambang torilyo, duwang kilo para sa lalaking karnero,

²¹asin sarong kilo para sa lambang kordero.

²²Magdolot man kamo nin sarong lalaking kanding bilang dolot para sa kasalan sa pagtubos saindo.

²³Idolot nindo an mga iyan laen pa kan aroaldaw na tinutong na atang sa pagkaaga.

²⁴Sa parehong paagi, sa laog nin pitong aldaw magdolot kamo sa Kagurangnan nin dolot na pagkakan, sarong parong na nakakawili saiya. Idolot nindo iyan laen pa kan aroaldaw na tinutong na atang saka dolot na arak.

²⁵Sa ikapitong aldaw, magtiripon kamo sa pagsamba asin dai kamo magtrabaho.

²⁶Sa enot na aldaw kan Pyesta nin Pag-ani, pagdara nindo sa Kagurangnan kan dolot na bagong trigo, magtiripon kamo sa pagsamba asin dai kamo magtrabaho.

²⁷Magdolot kamo nin tinutong na atang, sarong parong na nakakawili sa Kagurangnan: duwang torilyong baka, sarong lalaking karnero, asin pitong lalaking kordero na manangtaon an edad, na gabos mayo nin ano man na kaninan.

²⁸Idolot nindo an mga iyan kaiba an dolot na pagkakan na arinang sinalakan nin lana nin oliba: tolong kilo para sa lambang torilyo, duwang kilo para sa lalaking karnero,

²⁹asin sarong kilo para sa lambang kordero.

³⁰Magdolot man kamo nin sarong lalaking kanding bilang dolot para sa kasalan, asin sa paaging ini ginigibo nindo an seremonya nin paglinig para sa mga tawo.

³¹Idolot nindo an mga iyan saka an dolot na arak laen pa kan aroaldaw na tinutong na atang asin kan dolot na pagkakan.