Read Central Bicolano Numbers 35 Bible Online

Numbers 35 - Central Bicolano bible

Numbers 35

¹Sa kapatagan nin Moab sa ibong kan Jordan hale sa Jerico, nagtaram an Kagurangnan ki Moises,

²“Sabihan mo an mga Israelita na tawan an mga Levita nin mga syudad na maeerokan saka dagang pasabsaban sa palibot kan mga syudad hale sa dagang minana ninda.

³An mga syudad magigin pagsadiri kan mga Levita asin maerok sinda duman; an dagang pasabsaban para sa saindang mga baka saka iba pang mga hayop.

⁴An sukol kan dagang pasabsaban mapoon sa luwas kan nakapalibot na kudal kan syudad iyo ini: kwatro syentos singkwenta metros an pasirangan, kwatro syentos singkwenta metros an pahabagat, kwatro syentos singkwenta metros an pasolnopan, asin kwatro syentos singkwenta metros an paamihan.

⁵Kaya kwadrado iyan na nuebe syentos metros kwadrados an kabilogan na sukol; an syudad nasa tahaw.

⁶Tatawan nindo nin anom na syudad na pailihan an mga Levita na pwedeng dumanan nin sarong tawong dai tuyong nakagadan kan saiyang kapwa. Laen pa kaiyan, tatawan pa nindo sinda nin kwarenta y dos na syudad.

⁷Kaya kwarenta y otso gabos an syudad na itatao nindo sa mga Levita kaiba an mga dagang pasabsaban.

⁸An bilang kan syudad kan mga Levita sa lambang tribu aaramon sosog sa sukol kan teritoryo kan tribu.”

⁹Tinaraman nin Kagurangnan si Moises

¹⁰na sabihan an banwaan nin Israel: “Pagbalyo nindo sa Salog nin Jordan asin paglaog nindo sa daga nin Canaan,

¹¹mapili kamo nin mga syudad na pailihan tanganing an sarong tawo na dai tuyong makagadan nin kapwa pwedeng magdulag pasiring duman.

¹²Duman magigin ligtas siya sa boot magbalos na kadugo kan nagadan; an sarong tawo na nakagadan dai pwedeng gadanon sagkod na dai siya nahuhukoman sa atubangan kan banwaan.

¹³Pumili kamo nin anom na syudad,

¹⁴tolo sa sirangan kan Jordan asin tolo sa daga nin Canaan.

¹⁵Iyan an magigin mga syudad na pailihan para sa mga Israelita, asin sa mga dayuhan na nag-eerok sa kaibahan nindo o nakikihimanwa saindo. An siisay man na dai tuyong makagadan nin kapwa, pwedeng dumulag pasiring sa arin man kan mga syudad na iyan.

¹⁶“Alagad kun an sarong tawo maggamit nin armas na lansang o gapo o kahoy tanganing gadanon an kapwa, nagkasala siya nin paggadan asin dapat gadanon.

¹⁹An pinakaharaning kadugo kan biktima iyo an magadan kan kriminal. Gagadanon niya ini kun saiyang mahiling.

²⁰“Alagad kun sa kaongisan, hipaan nin sarong tawo an saiyang kapwa dangan ginadan niya sa paagi nin pagbuno o paggapo nin ano man saiya

²¹o pagsuntok, nagkasala siya nin paggadan asin dapat na gadanon. An pinakaharaning kadugo kan biktima iyo an magadan kan kriminal. Gagadanon niya ini kun saiyang mahiling.

²²“Alagad kun dai tuyong magadan nin sarong tawo an dai man niya ikinakaongis, huli ta nabuno niya o nagapo nin ano man;

²³kun makagapo siya nin kapwa na dai man niya nahiling saka bako man niya kaiwal dangan magadan,

²⁴sa siring na mga kaso, papaboran kan komunidad an tawong nakagadan asin bako an boot magbalos na kadugo kan biktima.

²⁵An nakagadan ililigtas kan komunidad sa kadugo kan nagadan. Ibabalik ninda an nakagadan sa syudad na pinagpailihan niya. Kaipuhan duman siya mag-erok sagkod na buhay pa an Halangkaw na Padi sa panahon na iyan.

²⁶Alagad kun an nakagadan luminuwas sa syudad na saiyang pinagpailihan,

²⁷dangan nahiling siya asin ginadan kan kadugo kan biktima, an gaweng iyan nin pagbalos bakong panggadan.

²⁸An lalaking nagkasala nin paggadan kaipuhan mag-erok sa syudad nin pailihan sagkod na buhay pa an Halangkaw na Padi; kun gadan na ini pwede na siyang magpuli sa sadiri niyang harong.

²⁹An mga pagsusundon na ini kukuyogon nindo asin kan saindong kapagarakian saen man kamo mag-erok.

³⁰“An sarong tawo na idinimanda nin paggadan pwede sanang mapatotoohan na nagkasala asin pwedeng magadan huli sa patotoo nin mga saksi. Mayo nin gagadanon huli sa patotoo nin saro sanang saksi.

³¹Kaipuhan gadanon an sarong kriminal. Dai siya pwedeng tuboson nin kwarta.

³²Kun magdulag an sarong tawo pasiring sa sarong syudad na pailihan, dai nindo siya pagtugotan na magbayad tangani sanang makapuli sa sadiri niyang harong bago magadan an Halangkaw na Padi.

³³Kun gibohon nindo iyan, didigtaan nindo an dagang pinag-eerokan nindo; huli ta an paggadan nakakadigta sa daga. Kaya pwera kan paggadan sa kriminal mayo na nin ibang paagi tanganing matubos an daga na nabulosan nin dugo kan biktima.

³⁴Dai nindo pagdigtaan an dagang pinag-eerokan nindo, huli ta ako an Kagurangnan asin nag-eerok ako sa kaibahan kan banwaan nin Israel.”