Read Central Bicolano Numbers 4 Bible Online

Numbers 4 - Central Bicolano bible

Numbers 4

¹Tinaraman nin Kagurangnan si Moises saka si Aaron

²na sensohon an Levitang kamaganakan ni Kohat sosog sa ginikanan nindang pamilya,

³magpoon sa edad na treynta sagkod sa singkwentang taon, na gabos maninigong maglingkod sa Tabernakulo.

⁴An saindang magigin trabaho iyo an manonongod sa mga bagay na orog kabanal.

⁵Itinao nin Kagurangnan ki Moises an minasunod na mga katukdoan. Sa panahon na mahale na an mga Israelita sa saindang pinagkakampohan, malaog sa Tabernakulo si Aaron saka an saiyang mga aki; hahaleon ninda an panlipod na kurtina sa atubang kan Kaban nin Tipan dangan itatahob ninda iyan sa Kaban.

⁶An Kaban tatahoban ninda nin anit nin kanding dangan ibibiklad ninda sa ibabaw kaiyan an sarong telang anas asul. Dangan isusurok ninda an mga pasanan.

⁷Sa ibabaw kan lamesa para sa tinapay na dolot sa Kagurangnan, ibibiklad ninda an sarong telang asul dangan ibubugtak ninda digdi an mga plato, an mga mangko para sa insenso saka dolot, asin an mga tapayan para sa dolot na alak patin an danay na tinapay.

⁸Sa ibabaw kan mga kagamitan na iyan, ibibiklad ninda an sarong pulang tela, dangan papatoson nin anit nin kanding. Pakatapos isusurok ninda an mga pasanan.

⁹Makua sinda nin sarong telang asul, dangan tatahoban ninda an kandelero, kaiba an mga ilaw, mga pansipit, mga bandehado saka an gabos na lalagan kan lana nin oliba.

¹⁰An kandelero asin an gabos na kagamitan kaiyan papatoson ninda nin sarong anit nin kanding dangan ibubugtak ninda sa sarong lalagan.

¹¹An altar na bulawan bibikladan ninda nin sarong telang asul asin papatoson nin sarong anit nin kanding. Pakatapos, isusurok ninda an mga pasanan.

¹²An gabos na kasangkapan na ginagamit sa Banal na Lugar kukuahon ninda dangan ibubugtak sa sarong asul na tela. Dangan papatoson ninda iyan sa anit nin kanding asin ibubugtak sa sarong lalagan.

¹³An altar hahalean ninda nin abo dangan tatahoban nin pulang tela.

¹⁴Pakatapos, ibubugtak ninda sa ibabaw kaiyan an gabos na kasangkapan na ginagamit sa paglilingkod sa altar: an mga bugtakan nin baga, an mga pansipit, mga pala saka mga palanggana. Papatoson ninda iyan nin sarong anit nin kanding dangan isusurok ninda an mga pasanan.

¹⁵Kun mahale na sinda sa saindang pinagkakampohan pakatapos na mapatos ni Aaron saka kan saiyang mga aki an mga kagamitan sa Tabernakulo, madolok an kamaganakan ni Kohat tanganing darahon an mga sagradong bagay. Alagad dai ninda dapat dutaan an mga iyan tanganing dai sinda magadan. Iyo iyan an magigin katongdan kan kamaganakan ni Kohat kun liniliwat an Tabernakulo.

¹⁶Si Eleazar na aking lalaki ni Aaron na padi iyo an magmamangno kan lana para sa mga ilawan, kan insenso, kan dolot na pagkakan asin kan panlahid na lana. Siya an mamamahala sa Tabernakulo asin sa gabos na kagamitan diyan.

¹⁷Nagtaram an Kagurangnan ki Moises saka ki Aaron,

¹⁸“Dai nindo pagbayaan an kamaganakan ni Kohat

¹⁹na magadan huli sa pagdolok ninda sa mga sagradong kagamitan. Tanganing dai iyan mangyari, itutukdo sainda ni Aaron saka kan mga aki niya, kun ano an saindang mga gigibohon asin kun ano an saindang dadarahon.

²⁰Alagad dai sinda maglaog tanganing maghiling kan mga banal na bagay maski sa kadikit na panahon, huli ta magagadan sinda.”

²¹Nagtaram an Kagurangnan ki Moises,

²²na sensohon an Levitang kamaganakan ni Gerson sosog sa ginikanan nindang pamilya,

²³magpoon sa edad na treynta sagkod sa singkwentang taon, na gabos maninigong maglingkod sa Tabernakulo.

²⁴An katongdan ninda iyo an pagdara

²⁵kan mga kurtina kan Tabernakulo, kan tolda, asin kan mga pantahob kaiyan na gibo sa mga anit nin kordero saka kanding, kan panlipod na kurtina para sa pintoan,

²⁶kan mga kurtina asin kan mga lubid para sa patyo na nasa palibot kan Tabernakulo sagkod kan altar, kan panlipod na kurtina para sa pintoan kan patyo asin kan gabos na kagamitan sa pagpatindog kaiyan. Sainda an gabos na trabaho na may kinaaraman sa mga bagay na iyan.

²⁷Sa pamamahala ni Moises, itutukdo ni Aaron saka kan saiyang mga aki an gabos na dadarahon asin an gabos na gigibohon kan kamaganakan ni Gerson.

²⁸Iyo ini an magigin katongdan kan kamaganakan ni Gerson sa Tabernakulo; gigibohon ninda iyan sa pamamahala ni Itamar na aking lalaki ni Aaron na padi.

²⁹Tinaraman nin Kagurangnan si Moises na sensohon an Levitang kamaganakan ni Merari sosog sa ginikanan nindang pamilya,

³⁰magpoon sa treynta an edad sagkod sa singkwentang taon, na maninigong maglingkod sa Tabernakulo.

³¹An katongdan ninda iyo an pagdara kan mga tabla, mga trabisanyo, mga harigi, saka mga patungtongan kan Tabernakulo,

³²kan mga harigi, mga patungtongan, mga taldok saka mga lubid kan patyo, kaiba an mga kagamitan sa pagpatindog kaiyan. An lambang saro magmamangno kan mga bagay na itinalaan saiya tanganing darahon.

³³Iyo ini an magigin katongdan kan kamaganakan ni Merari sa Tabernakulo; gigibohon ninda iyan sa pamamahala ni Itamar na aking lalaki ni Aaron na padi.

³⁴Sa pagsunod kan pagboot nin Kagurangnan, ginibo ni Moises, ni Aaron, asin kan mga lider kan komunidad an pagsenso sa tolong Levitang kamaganakan ni Kohat, Gerson, asin Merari. Ginibo ninda ini sosog sa pamilyang ginikanan kan mga Levita asin ilinista ninda an mga lalaking nag-eedad nin treynta sagkod singkwentang taon na maninigong maglingkod sa Tabernakulo, siring sa minasunod: Kamaganakan Bilang Kohat dos mil syete syentos singkwenta Gerson dos mil seis syentos treynta Merari tres mil dos syentos An kabilogan na bilang kan Levitang kamaganakan uminabot sa otso mil kinyentos otsenta.

³⁵Sosog sa pagboot nin Kagurangnan, an lambang saro, ilinista ni Moises, asin tinawan nin katongdan sa paglingkod o pagdara.