Read Central Bicolano Numbers 5 Bible Online

Numbers 5 - Central Bicolano bible

Numbers 5

¹Tinaraman nin Kagurangnan si Moises,

²“Pagbotan mo an mga Israelita na iluwas sa kampo an gabos na may nakakatakot na helang sa kublit, an mga pinag-aawasan asin an mga maati sosog sa Katogonan, patin an gabos na nagin maati huli sa pagduta sa sarong gadan.

³Iluwas nindo sinda, babae man o lalaki, tanganing dai ninda madigtaan an kampo na pinag-eerokan ko kaiba an sakong banwaan.”

⁴Nagkuyog an mga Israelita, ilinuwas ninda sa kampo an mga tawong maaati.

⁵Itinao nin Kagurangnan ki Moises

⁶an minasunod na mga katukdoan para sa mga Israelita. Kun dai magin maimbod sa Kagurangnan an siisay man, lalaki man o babae, asin makaginibo nin maraot sa saiyang kapwa,

⁷ikukumpisal niya an ginibong kasalan, dangan matao siya kan bilog na kabayadan kaiyan sa saiyang pinagkasalaan kaiba an dagdag na beynte porsyento.

⁸Alagad kun nagadan an pinagkasalaan asin mayo siya nin kadugo na pwedeng tawan kan kabayadan, itatao iyan sa Kagurangnan para sa mga padi, kaiba an lalaking karnero na idodolot kan nagkasala bilang pantubos sa saiyang kasalan.

⁹An lambang banal na dolot na dinadara kan mga Israelita sa padi magigin sadiri kan padi.

¹⁰Kukuahon kan padi an ano man na dolot na itinao saiya.

¹¹Pinagbotan nin Kagurangnan si Moises

¹²na itao an minasunod na mga katukdoan sa mga Israelita. Kun magpasambay an sarong babae, asin dai ini aram kan saiyang agom, dangan mayo nin nakaisi kan kasalan huli ta minsan totoong nagpasambay an babae, alagad mayo nin katibayan laban saiya asin dai siya nadakop sa akto; kun mag-imon an agom na lalaki asin magduda na nagpasambay an saiyang agom; o kun mag-imon an lalaki minsan dai totoong nagpasambay an saiyang agom;

¹⁵sa arin man na kaso, dadarahon kan lalaki an saiyang agom sa padi. Dadarahon man niya an dolot para sa saiyang agom—sarong kilo nin arinang sebada. Dai niya iyan uulaan nin lana, ni bubugtakan nin insenso, huli ta iyan dolot nin pag-imon, sarong dolot tanganing aramon an katotoohan.

¹⁶Dadarahon kan padi an babae sa enotan dangan papatindogon niya sa atubangan kan altar.

¹⁷Pakatapos, lalaogan niya nin banal na tubig an sarong dalipay na mangko, makua siya nin alpog sa salog kan Tabernakulo asin isasalak sa tubig.

¹⁸Papalugayon niya an buhok kan babae asin ibubugtak niya an dolot na arina sa mga kamot kaini, dangan kakapotan kan padi an mangko nin mapait na tubig na nagdadara nin maldisyon.

¹⁹An babae papasumpaon kan padi. Masabi an padi, “Kun dai ka nagpasambay, dai ka maano kan maldisyon na dara kan tubig na ini.

²⁰Alagad kun nagpasambay ka,

²¹gibohon ka logod nin Kagurangnan na sarong maldisyon sa saimong banwaan huli sa pagkunkon kan saimong kinabuhay asin sa pagbutog kan saimong tulak.

²²Lumaog logod sa saimong tulak an tubig na ini tanganing pabutogon iyan asin pakunkunon an saimong kinabuhay.” Masimbag an babae: “Minauyon ako; gibohon logod iyan nin Kagurangnan.”

²³Dangan isusurat kan padi an mga maldisyon na ini sa sarong libro asin paparaon niya ini kan mapait na tubig.

²⁴Bago niya ipainom sa babae an tubig, na pwedeng magin dahelan kan pagkulog kan saiyang tulak,

²⁵kukuahon kan padi sa babae an dolot na arina, iiitaas sa Kagurangnan, asin dadarahon sa altar.

²⁶Dangan mahakbot siya nin sarong gugom kan arina bilang sarong dolot na giromdom, asin tututongon niya sa altar. Pakatapos, papainomon niya kan tubig an babae.

²⁷Kun nagpasambay siya, makakamate siya nin grabeng kulog huli kan tubig; makunkon an saiyang kinabuhay asin mabutog an saiyang tulak. An babae magigin sarong maldisyon sa saiyang banwaan.

²⁸Alagad kun dai siya nin kasalan, dai siya maaano kan maldisyon asin mangangaki pa nin dakul.

²⁹Iyo ini an pagboot manongod sa mga pag-imon, kun an sarong babae nagpasambay minsan nasa irarom siya kan kapangyarihan kan saiyang agom,

³⁰o kun mag-imon an lalaki sa saiyang agom; papatindogon an babae sa atubangan kan altar, asin gigibohon kan padi an gabos na pagboot na ini.

³¹Dai madadamay an lalaki sa kasalan, alagad magtitios an babae, sa ginibo niyang kasalan.