Read Central Bicolano Numbers 6 Bible Online

Numbers 6 - Central Bicolano bible

Numbers 6

¹Pinagbotan nin Kagurangnan si Moises

²na itao an minasunod na mga katukdoan sa mga Israelita. Kun an sarong lalaki o sarong babae manuga na magigin saro siyang Nazireo asin lalaenon niya an saiyang sadiri sa Kagurangnan,

³dai siya mag-iinom nin arak o nin ano man na maisog na inomon. Dai siya mainom nin arak hale sa duga kan mga ubas asin dai siya makakan nin ubas o pasas.

⁴Sa bilog na panahon nin saiyang pagigin Nazireo, dai siya makakan nin anoman na gikan sa poon nin ubas, maski kan ubak o pisog kaini.

⁵Sa bilog na panahon kan saiyang pagigin Nazireo, dai niya puputolan an saiyang buhok, ni aahiton an saiyang barabas. Nabubugkos siya kan panuga sa bilog na panahon na nagdusay siya kan saiyang buhay sa Kagurangnan asin papahalabaon niya an saiyang buhok saka barabas.

⁶Sa bilog na panahon kan saiyang panuga, dai siya dapat magrani sa sarong gadan,

⁷maski ini saiyang ama, ina, tugang na lalaki o babae. An saiyang buhok iyo an tanda kan saiyang pagdusay kan saiyang buhay sa Dios, kaya dai niya dapat pagdigtaan an sadiri huli sa pagrani sa gadan.

⁸Sagkod na siya sarong Nazireo, siya konsagrado sa Kagurangnan.

⁹Kun may panaling magadan sa kataed niya asin huli kaiyan naatian an saiyang konsagradong buhok, aarison niya iyan pakalihis nin pitong aldaw, sa aldaw nin saiyang paglinig.

¹⁰Sa ikawalong aldaw madara siya sa padi nin duwang salampati o duwang agbaan sa may pintoan kan Tabernakulo.

¹¹An sarong gamgam idodolot kan padi bilang dolot para sa kasalan asin an saro bilang tinutong na atang, tanganing gibohon an pagtubos saiya, huli ta nagkasala siya kan makaduta siya sa gadan. Sa aldaw na iyan, makokonsagra niya giraray an saiyang buhok.

¹²Idudusay niya giraray an saiyang sadiri sa Kagurangnan bilang sarong Nazireo. An mga naenot na aldaw dai ibibilang, huli ta nadigtaan an konsagrado niyang buhok. Bilang pantubos sa kasalan, madara siya nin sarong kordero na sangtaon pa sana an edad.

¹³Iyo ini an togon manongod sa sarong Nazireo na nakatapos na kan saiyang panuga. Maduman siya sa pintoan kan Tabernakulo

¹⁴asin madolot siya sa Kagurangnan nin tolong hayop na mayo nin kaninan—sarong lalaking kordero na sarong taon pa sana bilang tinutong na atang, sarong babaeng kordero na sarong taon pa sana bilang dolot para sa kasalan, asin sarong lalaking karnero bilang dolot para sa katoninongan.

¹⁵Laen pa kaiyan, madolot siya nin sarong basket nin tinapay na mayo nin lebadura: mahihibog na tinapay na gibo sa arinang sinalakan nin lana nin oliba, asin maninipis na biskwit na linahidan nin lana nin oliba, kaiba an dolot na pagkakan asin dolot na inomon.

¹⁶Ini gabos dadarahon kan padi sa atubangan nin Kagurangnan asin idodolot niya an dolot para sa kasalan saka an tinutong na atang.

¹⁷Idodolot niya sa Kagurangnan an lalaking karnero bilang dolot para sa katoninongan, kaiba an basket nin tinapay na mayo nin lebadura, an dolot na pagkakan asin an dolot na inomon.

¹⁸Aarison kan Nazireo an saiyang buhok sa may pintoan kan Tabernakulo, asin ibubugtak niya iyan sa kalayo na tinututongan kan dolot para sa katoninongan.

¹⁹Kukuahon kan padi an linabonan na abaga kan karnero, kaiba an sarong tinapay asin sarong biskwit hale sa basket, dangan ibubugtak sa mga kamot kan Nazireo.

²⁰Pakatapos, an mga ini idodolot kan padi sa Kagurangnan bilang espesyal na regalo; an mga ini iyo an banal na kahirasan kan padi, kaiba an daghan saka bitis kan karnero. Kun magibo na ini, pwede nang uminom nin arak an Nazireo.

²¹Iyo ini an pagsusundon manongod sa mga Nazireo; alagad kun an sarong Nazireo nanunuga nin sobra sa hinahagad kan saiyang panuga, kaipuhan gibohon niya iyan.

²²Pinagbotan nin Kagurangnan si Moises

²³na sabihan si Aaron saka an mga aking lalaki kaini na gamiton an minasunod na mga tataramon sa pagbendisyon kan banwaan nin Israel:

²⁴Bendisyonan logod kamo asin atamanon nin Kagurangnan;

²⁵Paliwanagon logod nin Kagurangnan an saiyang lalawogon sa saindo asin maugayan kamo;

²⁶Mawilihan logod kamo nin Kagurangnan asin tawan nin katoninongan.

²⁷Nagtaram an Kagurangnan, “Kun sambiton ninda an sakong ngaran bilang sarong bendisyon sa banwaan nin Israel, bebendisyonan ko sinda.”