Read Central Bicolano Numbers 7 Bible Online

Numbers 7 - Central Bicolano bible

Numbers 7

¹Kan aldaw na mapatindog ni Moises an Tabernakulo, linahidan niya asin kinonsagra iyan; linahidan man niya dangan kinonsagra an mga kasangkapan kan Tabernakulo, an altar asin an mga kagamitan kaiyan.

²An mga lider nin Israel, na mga pamayo kan saindang mga kamaganakan asin nagtarabang sa pagkua kan senso,

³nagdara kan saindang mga dolot sa Kagurangnan: anom na kareta saka doseng torong baka, sarong kareta para sa lambang duwang lider asin sarong torong baka para sa lambang lider.

⁴Nagtaram an Kagurangnan ki Moises,

⁵“Akoon mo an saindang mga dolot na gagamiton para sa paglingkod sa Tabernakulo. Itao mo an mga dolot na iyan sa mga Levita sosog sa saindang katongdan.”

⁶Kaya inako ni Moises an mga kareta asin an mga torong baka dangan itinao sa mga Levita.

⁷Itinao niya an duwang kareta asin an apat na torong baka sa mga aki ni Gerson,

⁸asin an apat na kareta saka an walong torong baka itinao niya sa mga aki ni Merari. An gabos nindang trabaho gigibohon ninda sa pamamahala ni Itamar na aking lalaki ni Aaron na padi.

⁹Dai niya tinawan nin ano man an mga aki ni Kohat huli ta an katongdan na itinao sainda iyo an pangataman kan mga sagradong bagay na kaipuhan pasanon ninda.

¹⁰Nagdara man an mga lider nin mga dolot tanganing selebraron an pagkonsagra kan altar. Kan andam na sinda sa pagdara kan saindang mga dolot sa altar,

¹¹nagtaram an Kagurangnan ki Moises, “Aroaldaw, saro sana sa mga lider an madolot para sa pagkonsagra kan altar.”

¹²Ini an orden kan aroaldaw nindang pagdara kan saindang mga dolot: Sa enot na aldaw, si Nason na aking lalaki ni Amminadab asin lider kan tribu ni Juda; sa ikaduwang aldaw, si Netanel na aking lalaki ni Zuar asin lider kan tribu ni Issakar; sa ikatolong aldaw, si Eliab na aking lalaki ni Helon asin lider kan tribu ni Zabulon; sa ikaapat na aldaw, si Elizur na aking lalaki ni Sedeur asin lider kan tribu ni Ruben; sa ikalimang aldaw, si Selumiel na aking lalaki ni Zurisaddai asin lider kan tribu ni Simeon; sa ikaanom na aldaw, si Eliasaf na aking lalaki ni Deuel asin lider kan tribu ni Gad; sa ikapitong aldaw, si Elisama na aking lalaki ni Ammihud asin lider kan tribu ni Efraim; sa ikawalong aldaw, si Gamaliel na aking lalaki ni Pedazur asin lider kan tribu ni Manases; sa ikasiyam na aldaw, si Abidan na aking lalaki ni Gideoni asin lider kan tribu ni Benjamin; sa ikasampolong aldaw, si Ahiezer na aking lalaki ni Ammisaddai asin lider kan tribu ni Dan; sa ikaonseng aldaw, si Pagiel na aking lalaki ni Okran asin l(...)

¹³Iyo ini an mga dolot na dara kan doseng lider nin Israel, kan konsagrahon an altar: –doseng platang mangko asin doseng platang palanggana, na an kabilogan na timbang uminabot sa beynte y syete kilos, seis syentos gramos. –doseng bulawan na platong an kabilogan na timbang uminabot sa sarong kilo may treynta y dos gramos asin pano nin insenso –doseng torilyong baka, doseng lalaking karnero asin doseng kordero na manangtaon an edad bilang mga tinutong na atang, kaiba an mga dolot na pagkakan –doseng kanding bilang dolot para sa kasalan –beynte y kwatrong torong baka, sesentang lalaking karnero, sesentang kanding, sesentang kordero na manangtaon an edad bilang dolot para sa katoninongan

¹⁴Kan maglaog si Moises sa Tabernakulo tanganing makipag-olay sa Kagurangnan, nadangog niya an Kagurangnan na nagtataram saiya hale sa ibabaw kan takop kan Kaban nin Tipan, sa tahaw kan duwang kerubin na nasa ibabaw kan Kaban nin Tipan.