Read Central Bicolano Micah 1 Bible Online

Micah 1 - Central Bicolano bible

Micah 1

¹Kan panahon na si Jotam, Ahaz, asin Ezekias iyo an mga hade nin Juda, tinawan nin Kagurangnan si Mikas, na taga Moreset, kan mensaheng ini. Ipinahayag nin Kagurangnan ki Mikas an gabos na bagay na ini dapit sa Samaria saka sa Jerusalem.

²Dangoga nindo ini, kamo gabos na nasyon; hinanyoga nindo ini, kamo gabos na nag-eerok sa daga! Masaksi laban saindo an Kagurangnan Dios. Paghinanyog! Nagtataram siya hale sa langitnon niyang templo.

³Madatong an Kagurangnan hale sa banal niyang lugar; mahilig siya dangan malakaw sa mga alitoktok kan kabukidan.

⁴Matutunaw an kabukidan sa irarom niya arog kan taro sa kalayo; maburulos sinda pasiring sa mga kapantayan siring sa tubig na nagbubulos hale sa bulod.

⁵Mangyayari an gabos na ini huli ta nagkasala sa Dios an Israel. Siisay an dapat basolon sa pagrebelde nin Israel? Mayong iba kundi an Samaria, an pangenot na syudad! Siisay sa Juda an nagkasala nin pagsamba sa mga dios-dios? Mayong iba kundi an Jerusalem!

⁶Kaya nagsasabi an Kagurangnan, “Raraoton ko an Samaria sagkod na magin sarong tambak iyan nin daga sa kaomahan, sarong lugar na pagtatanoman nin ubas. An mga gapo kan syudad iuula ko sa kapantayan, asin mahahayag an mga pundasyon kan syudad.

⁷Maroronot an gabos na mahalagang mga ladawan, masusulo an gabos na tandan sa mga maraot na babae sa templo, asin magigin sarong tambak nin ati an gabos na dios-dios. Huli ta tinipon nin Samaria an mga bagay na ini hale sa mga tandan sa mga maraot na babae sa templo, kaya dadarahon sinda kan saindang mga kaiwal sa ibang lugar bilang mga maraot na babae sa templo.”

⁸Dangan nagsabi si Mikas, “Huli kaini, magmomondo saka mananambitan ako. Malakaw akong nakabitis asin huba sa pagpahiling kan sakong kamondoan. Makurahaw ako arog sa sarong lalaw na ayam asin mahaya ako arog sa dakulang gamgam.

⁹Dai na mabobolong an mga lugad nin Samaria, asin madali na man na magtios sa siring na paagi an Juda; an pagkarumpag nakaabot na sa mga trangkahan nin Jerusalem, sa lugar na pinag-eerokan kan sakong banwaan.”

¹⁰Dai nindo pagtaraman an samong mga kaiwal sa Gat dapit kan samong pagkadaog; hare kamo pagpahiling sainda na naghihibi kamo. Pagriligid kamo sa alpog, mga taga Bet-leapra sa pagpahiling na mayo kamo nin paglaom!

¹¹Magpadagos kamo sa paglakaw na huba asin nasosopog, mga taga Safir. An mga taga Zaanan takot na magluwas sa saindang syudad. Kun madangog na nindong nagtatangis an mga taga Bet-ezel, maaaraman nindong mayong pailihan duman.

¹²An mga taga Marot may kahandalan na naghahalat nin tabang, huli ta an Kagurangnan nagdara nin kapahamakan sagkod sa trangkahan nin Jerusalem.

¹³Kamong mga taga Lakis, igakod nindo an mga kabayo sa mga karwahe. Inarog nindo an mga kasalan nin Israel, kaya kamo an nagin dahelan kan pagkasala nin Jerusalem.

¹⁴Mga taga Juda, magpaaram na kamo sa banwa nin Moreset-gat; mayong ikakataong tabang sa mga hade nin Israel an banwa nin Aczib.

¹⁵Mga taga Maresa, itatao kamo nin Kagurangnan sa kamot kan kaiwal, na masakop kan saindong banwa. An mga lider nin Israel madulag saka matago sa lungib sa Adullam.

¹⁶Mga taga Juda, putola an saindong mga buhok sa pagmondo para sa namomotan nindong kaakian. Aroga nindo an pagkaangas kan bwitre, huli ta itatapok an saindong kaakian.