Read Central Bicolano Micah 2 Bible Online

Micah 2 - Central Bicolano bible

Micah 2

¹Herak man sa mga tawong nagpupuka asin nagpaplano nin karatan! Pagsirang kan aldaw, ginigibo ninda tolos an saindang maraot na plano.

²Kun mawot ninda an kaomahan, inaagaw ninda iyan; kun mga harong an mawot ninda, kinukua ninda iyan. Bako nang ligtas an pamilya o pagsadiri nin sarong tawo.

³Kaya nagsasabi an Kagurangnan, “Nagpaplano ako nin kapahamakan laban saindo, asin dai kamo makakaligtas diyan. Manunumpongan na sana nindo an saindong sadiri na nasa kahaditan. Dai na nanggad kamo makakapaabaw-abaw.

⁴Pag-abot kan panahon na iyan, gagamiton nin mga tawo an istorya dapit saindo bilang sarong arogan nin kapahamakan, dangan aawiton ninda ining awit nin mayong paglaom dapit sa nangyari saindo: Buminagsak na nanggad kita! Kinua nin Kagurangnan an satong daga Asin itinao sa mga nagbihag sa sato.”

⁵Kaya pag-abot kan panahon na ibalik na an daga sa banwaan nin Kagurangnan, mayo kamong makukuang kahirasan.

⁶Hinuhulitan ako kan mga tawo asin sinasabihan, “Dai ka maghulit sa samo. Dai mo ipaghulit an dapit sa mga bagay na iyan. Dai kami sosopogon nin Dios.

⁷Sa paghona mo daw, nasa irarom nin maldisyon an banwaan nin Israel? Naubos na daw an pasensya nin Kagurangnan? Gibohon daw niya an mga bagay na iyan? Bakong may pagkaherak na tinataraman niya an mga naggigibo nin tama?”

⁸Nagsisimbag an Kagurangnan, “Sinasalakay nindo an sakong banwaan siring sa mga kaiwal. Minapuruli an mga lalaki hale sa pakilaban, naghohona na ligtas sinda sa saindang harong, alagad yaon kamo duman, naghahalat tanganing habonon an saindang gubing.

⁹Inaalaw nindo paluwas kan mga harong na saindang namomotan an mga babae sa sakong banwaan, asin inaagawan nindo an saindang kaakian kan itinatao kong daing tapos na bendisyon.

¹⁰Bangon kamo asin lakaw; mayo na nin kaligtasan digdi para sa saindo. Ipinahamak kan saindong mga kasalan an lugar na ini, kaya raraoton ini.

¹¹“Mawot kan mga tawong ini an propetang naglilibot, na mahambog saka madaya asin nagsasabing, ‘Hinuhulaan kong mabulos an arak saka makosog na inomon para sa saindo.’

¹²“Alagad titiponon ko kamo, kamo gabos na natada sa Israel. Sarabay ko kamong dadarahon siring sa mga karnero na nagbabalik sa toril. Arog sa pasabsaban na pano nin karnero, magigin pano giraray nin tawo an saindong daga.”

¹³An Dios iyo an mabukas nin agihan para sainda dangan mahale sa sainda sa pagkatapokan. Maruluwas sinda sa mga trangkahan kan syudad asin magigin talingkas. An saindang hade, an Kagurangnan mismo, iyo an mangengenot sainda paluwas.