Read Central Bicolano Micah 7 Bible Online

Micah 7 - Central Bicolano bible

Micah 7

¹Herak man sa sako! Nakakaagid ako sa sarong gutom na tawong mayong nakukuang bunga sa mga kahoy asin ubas sa mga balagon. Ginuno na an gabos na ubas asin an masisiram na higera.

²Mayo na minsan sarong onestong tawo sa daga, mayo maski sarong maimbod sa Dios. An gabos naghahalat kan tamang panahon tanganing manggadan. An lambang saro naghahanap kan saiyang kapwa tanganing gadanon.

³Gabos sinda eksperto sa paggibo kan maraot. An mga opisyal saka mga hukom naghahagad nin suhol. Sinasabihan sinda kan mapangyaring tawo kan saiyang kamawotan, asin tarabang sindang minagibo nin plano.

⁴Maski an pinakamarahay saka pinakaonesto sa sainda garo mga tonok na mayo nin halaga. Nag-abot na an aldaw kan pagpadusa nin Dios sa mga tawo, siring kan saiyang ipinatanid sainda sa paagi kan saindang mga parabantay, an mga propeta. Ngunyan, nagkakariribong sinda.

⁵Dai ka magtubod sa saimong kataed ni manarig sa saimong katood. Mag-ingat ka sa sinasabi mo sa saimong agom.

⁶Sa panahon na ini, iaarog sa mga lolong kan mga aking lalaki an saindang mga ama; tutumangan kan mga aking babae an saindang mga ina, asin makikiiwal an mga hoben na babae sa saindang panugangan na babae; an mga kaiwal nin sarong tawo iyo man sana an mga tawong kadugo niya.

⁷Alagad maghahalat ako sa Kagurangnan; padagos akong maglalaom sa Dios na maligtas sako. Dadangogon ako kan sakong Dios.

⁸Mayong dahelan tanganing pagngisihan kami kan samong mga kaiwal. Nagkaturumba kami, alagad mabangon giraray kami. Nasa kadikloman kami ngunyan, alagad tatawan kami nin liwanag kan Kagurangnan.

⁹Nagkasala kami sa Kagurangnan, kaya kaipuhan tioson mi sa kadikit na panahon an saiyang kaanggotan. Alagad susurogon niya giraray kami asin babaloson an mga nagkasala samo. Dadarahon niya kami sa liwanag; mahihiling nyamo an pagligtas niya samo.

¹⁰Dangan mahihiling iyan kan samong mga kaiwal asin mawawaraan sinda nin onra—an parehong mga kaiwal na nag-olog-olog samo sa pagsabing, “Haen an Kagurangnan na saindong Dios?” Mahihiling mi sindang daog, na tinitimaktimakan arog sa laboy sa mga tinampo.

¹¹Mga taga Jerusalem, nagdadangadang na an panahon kan pagpakarahay kan kudal kan saindong syudad. Sa panahon na iyan, papadakulaon an saindong teritoryo.

¹²Mabaralik sa saindo an saindong mga kahimanwa hale sa manlaen-laen na lugar—hale sa Asiria sa sirangan, hale sa Egipto sa habagat, hale sa rehiyon kan Salog nin Eufrates, hale sa hararayong kadagatan saka kabukidan.

¹³Alagad magigin sarong desyerto an daga huli kan karatan kan mga nag-eerok diyan.

¹⁴Atamana siring sa sarong pastor an saimong banwaan, Kagurangnan, an banwaan na saimong pinili. Maski bako sindang sararo na nag-eerok sa kalangtadan, igwa nin matubang na daga sa palibot ninda. Padumana sinda sa mayaman na mga pasabsaban nin Basan saka Gilead, dangan pakakana sinda duman arog kan ginibo ninda kaidtong panahon.

¹⁵Maggibo ka nin mga milagro para sa samo, “Kagurangnan, Kagurangnan siring kan ginibo mo kaidto kan iluwas mo kami sa Egipto.

¹⁶Mahihiling ini kan mga nasyon asin masosopog sinda, huli ta makokosog sinda. Sa katakotan, titikomon ninda an saindang mga ngoso asin tatahoban an saindang mga talinga.

¹⁷Makamang sinda sa alpog arog sa mga halas; maabot sinda hale sa saindang mga bantayan na nagtatakig saka natatakot. Sa katakotan, madolok sinda sa Kagurangnan na samong Dios.

¹⁸Mayo nin ibang dios na arog saimo, Kagurangnan; pinapatawad mo an kasalan kan mga natada sa saimong banwaan. Dai ka naanggot sagkod pa man, kundi nawiwili ka sa pagpahiling sa samo kan saimong danay na pagkamoot.

¹⁹Maheherakan mo giraray kami. Titimaktimakan mo an samong mga kasalan dangan itatapok mo iyan sa kairaroman kan dagat!

²⁰Ipapahiling mo sa saimong banwaan, an mga kapagarakian ni Abraham asin ni Jacob, an saimong kaimbodan saka danay na pagkamoot, siring sa ipinanuga mo sa samong mga ginikanan kaidtong panahon.