Read Central Bicolano Nahum 2 Bible Online

Nahum 2 - Central Bicolano bible

Nahum 2

¹Nineve, sinasalakay ka! An kapangyarihan na marumpag saimo nagdatong na. Bugtaki nin mga bantay an mga depensa! Bantayi an mga tinampo! Pag-andam sa pakilaban! (

²Madali nang ibalik nin Kagurangnan an kamurawayan nin Israel, an dating kamurawayan kaini kan dai pa sinasamsaman kan saiyang mga kaiwal.)

³Pulang mga kalasag an dara kan kaiwal na mga soldados asin pula an sulot nindang gubing. Nag-aandam na sinda sa pagsalakay! Nagsisilyab arog sa kalayo an saindang mga karwahe! Naglulukso an saindang mga kabayo!

⁴Marikas na nagdadalagan an mga karwahe sa mga tinampo, pabalik-balik sinda sa mga plasa kan syudad. Nagsisilyab sinda siring sa mga karaba asin marikas na minahiro arog sa kikilat.

⁵Ipinaapod na an mga opisyal; nagkakaturumba sinda mantang nagpapaenotan. Nagdadalagan pasiring sa kudal an mga parasalakay asin inaandam na ninda an kagamitan na panggaba kan kudal.

⁶An mga trangkahan sa may salog nagkaburukasan na; napano na nin kahandalan an palasyo.

⁷Nabihag na an reyna; nag-aaguro siring sa mga salampati an sorogoon niyang mga babae asin pinagtutumbok ninda an saindang daghan sa kamondoan.

⁸Arog sa tubig hale sa nagabang dike an mga tawo nagdadaralagan hale sa Nineve! “Ontok! Ontok!” an nadangog na kurahaw— alagad maski saro mayong nagbalik.

⁹Samsamon nindo an plata! Samsamon nindo an bulawan! An syudad pano nin kayamanan!

¹⁰An Nineve raot na, binayaan na nin tawo, asin mamondo! Nanluluya na sa takot an mga puso; nagtatakig an mga tuhod, mayo na an kosog; nanlolongsi an mga lalawogon.

¹¹Haen na ngunyan an syudad na kaidto arog sa lungib nin mga leon, saen binabahog an mga ogbon na leon, na dinudumanan kan mag-agom na leon, saen ligtas an saindang mga ogbon?

¹²Ginadan kan leon an saiyang biktima dangan pinedaso para sa saiyang agom saka mga ogbon; pinano niya an saiyang lungib nin mga pinedasong karne.

¹³“Ako an saimong kaiwal!” an itinataram nin Kagurangnan nin mga hukbo. “Susuloon ko an saimong mga karwahe. Magagadan an saimong mga soldados sa gera, asin kukuahon ko saimo an gabos na kinua mo sa iba. Dai na nanggad madadangog an tingog kan saimong mga sugo.”