Read Central Bicolano Nahum 3 Bible Online

Nahum 3 - Central Bicolano bible

Nahum 3

¹Herak man sa putikon, asin paragadan na syudad, na pano nin kayamanan na sasamsamon asin aagawon!

²Dangoga! An lagapak kan pamakol, an karatongkatong nin mga rweda, an paradagpadag nin mga kabayo, an ribok nin mga karwahe!

³Nagsasalakay an mga parakabayo, nagsisilyab an mga espada, nagkikinang an mga garod! Tinatambak an mga bangkay, dai mabilang na mga gadan— nasisingkogan sinda nin mga tawo!

⁴Pinapadusahan an Nineve, an maraot na babae. Mapandagka asin pano nin nakakagadan na gayuma; linumay niya an mga nasyon asin ginibong mga oripon.

⁵An Kagurangnan nin mga hukbo nagsasabi, “Papadusahan taka, Nineve! Huhubaan taka asin ipapahiling ko sa mga nasyon an saimong pagkanihuba, sa bilog mong kasosopgan.

⁶Tatapokan taka nin ati dangan pag-oolog-ologon. An mga tawong makahiling matatakot saimo.

⁷Masiribog an gabos na makakahiling saimo. Masarabi sinda, ‘Gaba na an Nineve! Siisay pa an may pagkaherak saiya? Siisay an boot na magranga saiya?’”

⁸Nineve, mas marahay ka pa daw ki sa Tebes, an pangenot na syudad nin Egipto? Igwa man ini nin sarong salog na nag-iingat saiya arog sa sarong kudal—an Nilo iyo an saiyang depensa.

⁹Pinaghadean niya an Etiopia saka an Egipto, asin katabang niya an Libya; mayo nin kasagkoran an saiyang kapangyarihan.

¹⁰Alagad ipinatapok an mga taga Tebes. Sa lambang kanto kan mga tinampo hinampak an saindang mga aki sagkod na magadan. An saindang ginagalangan na mga lalaki nakakadenahan na dinara dangan pinagripahan kan mga nakabihag sainda.

¹¹Nineve, mabagsak ka man sa ngana-nganang pagkaburat! Hihingowahon mo man na makadulag sa saimong mga kaiwal.

¹²An saimong mga bantayan makakaagid sa mga poon nin higera na hinog na an bunga: yugyoga an poon, asin mahuhulog an bunga sa ngoso kan makakan!

¹³An saimong mga soldados garo mga babae, asin an saimong daga mayo nin depensa laban sa saimong mga kaiwal. Tututongon nin kalayo an mga barat kan saimong mga trangkahan.

¹⁴Pagharok nin tubig tanganing makapag-andam para sa sarong pagsalakay, asin pakosoga an saimong mga bantayan! Timaktimaki an laboy tanganing makagibo nin mga ladrilyo, asin andama an mga hormahan kaiyan!

¹⁵Maski ano pa an saimong gibohon, masusulo ka man giraray o magagadan sa ralaban. Mapupuho ka siring sa mga tinanom na kinakan nin mga doron. Nagdakul ka siring sa mga doron!

¹⁶An mga negosyante na nagtunga hale saimo mas dakul pa ki sa mga bitoon sa kalangitan! Alagad mayo na sinda ngunyan, arog sa mga doron na nag-unat kan saindang mga pakpak dangan naglayog paharayo.

¹⁷An saimong mga opisyal nakakaagid sa sarong ariponpon nin mga doron na nagtutugdon sa mga kudal sa aldaw nin tig-lipot. Alagad pagtunga kan aldaw, minaralayog sinda, asin mayong nakakaaram kun saen sinda nagduman!

¹⁸Emperador nin Asiria, garadan na an saimong mga gobernador, asin nagkakatorog na sagkod pa man an saimong mga ginagalangan na mga lalaki! An saimong mga nasasakopan nagkawararak na sa kabukidan, asin mayo nin madara sainda pabalik sa saindang mga harong.

¹⁹Mayo nin bolong para sa saimong namamatean, asin mayong karahayan an saimong mga lugad. Mag-ooropak an mga makadangog kan saimong pagbagsak. May nakaligtas daw sa saimong mayong ontok na kakurihan?