Read Central Bicolano Habakkuk 2 Bible Online

Habakkuk 2 - Central Bicolano bible

Habakkuk 2

¹Masakat ako sa sakong bantayan asin mahalat tanganing maaraman ko an itataram sako nin Kagurangnan—kun anong simbag an itatao niya sa sakong reklamo.

²Iyo ini an simbag sako nin Kagurangnan: “Isurat mo nin malinaw sa mga tabla an ipapahayag ko saimo, tanganing maski sa sarong hirilingan, mababasa iyan.

³Isurat mo iyan, huli ta dai pa napapanahon tanganing maotob iyan. Alagad madali nang mag-abot an panahon, asin magkakatotoo an ipapahiling ko saimo. Pwedeng mahaloy nin kadikit an pag-abot kaiyan, alagad halaton mo; mangyayari iyan, asin dai iyan mapupugolan.

⁴Iyo ini an mensahe: ‘An mga maraot dai mabubuhay, alagad an mga matanos mabubuhay huli ta maimbod sinda sa Dios.’”

⁵Madaya an kayamanan. Mapalangkaw an mga tawong paslo saka dai napapamugtak—siring sa kagadanan na dai nababasog. Iyan an dahelan kun tano ta sinasakop ninda an mga nasyon.

⁶Oolog-ologon kan mga nasakop na banwaan an mga nagsakop sainda asin papahilingan kan saindang pagkauyam. Masabi sinda, “Nangungua kamo kan bako saindo, alagad herak man saindo! Sagkod nuarin kamo magpapayaman huli sa pagpirit kan mga nagkautang saindo na magbayad na?”

⁷Alagad bago kamo makaaram, kamo na nagsakop sa iba makakalubong man sa utang asin pipiriton na magbayad sagkod kan tubo. Maabot an mga kaiwal nindo asin tatakigan man kamo. Dangan sasamsaman ninda kamo!

⁸Sinamsaman nindo an mga taga ibang nasyon, alagad sasamsaman kamo kan mga matatadang buhay huli kan mga panggagadan na ginibo nindo asin huli kan saindong kadahasan laban sa mga banwaan kan kinaban saka kan mga syudad kaiyan.

⁹Herak man saindo na nagpayaman kan saindong mga pamilya, huli sa mga nakua nindo sa paagi nin kadahasan! Hiningowa nindong magin ligtas an sadiri nindong harong,

¹⁰alagad kasosopgan an dinara sa saindong pamilya kan saindong mga plano; sa panraraot nin mga nasyon, kamo man sana an nagdara nin pagkaraot sa saindong sadiri.

¹¹Maski an mga gapo sa mga kudal, nagkukurahaw laban saindo, asin sinisimbag iyan kan mga kahabaan.

¹²Herak man saindo na nagmukna nin sarong syudad sa paagi nin krimen asin nagpatindog kaiyan huli sa panggagadan!

¹³Nagparagal sa mayong kamugtakan na trabaho an mga nasyon na sinakop nindo; an gabos nindang pinatindog nagkakasurulo man sana. An Kagurangnan nin mga hukbo iyo an kaggibo kaini.

¹⁴Alagad mapapano an daga kan pakaaram kan kamurawayan nin Kagurangnan siring na pano nin tubig an mga dagat.

¹⁵Herak man saindo na nagsopog kan saindong mga kapwa sa saindong kaanggotan; pinapasayasay nindo sinda na garo mga burat.

¹⁶Sosopogon man kamo embes na oomawon. Mainom man kamo asin magsasayasay. Papainomon kamo nin Kagurangnan sa sadiri nindong kalis nin padusa, asin magigin kasosopgan an saindong kaomawan.

¹⁷Pinurotol nindo an kakahoyan nin Lebanon; ngunyan kamo an pupurotolon. Ginaradan nindo an mga hayop duman; ngunyan kamo an tatakoton kan mga hayop. Mangyayari ini huli kan mga panggagadan na ginibo nindo asin huli kan saindong kadahasan laban sa mga banwaan kan kinaban saka kan mga syudad kaiyan.

¹⁸Anong karahayan an makukua sa sarong ladawan? Sarong bagay man sana iyan na ginibo nin tawo, asin mayo iyan nin sinasabi kundi kaputikan. Anong karahayan an makukua diyan kan naggibo kaiyan kun pagsarigan niya iyan—sarong dios-dios na dai ngani nakakataram!

¹⁹Herak man saindo na nagsasabi sa sarong pedaso nin kahoy, “Pagmata!” o sa sarong dakulang gapo, “Tindog!” Igwa daw nin ikakapahayag saindo an sarong dios-dios? Pwedeng patoson iyan nin plata o bulawan, alagad mayo iyan nin buhay.

²⁰An Kagurangnan nasa banal niyang Templo; mag-alo an gabos sa atubangan niya.