Read Central Bicolano Habakkuk 3 Bible Online

Habakkuk 3 - Central Bicolano bible

Habakkuk 3

¹Iyo ini an sarong pamibi kan propetang si Habakkuk:

²Kagurangnan, nadangog ko an manongod sa saimong ginibo, asin natakot ako. Giboha giraray sa samong panahon an mga ngangalasan na ginibo mo kaidto. Magin maheherakon ka maski sa panahon na naaanggot ka.

³Hale sa Edom madigdi giraray an Dios; hale sa kabubuldan nin Paran maabot an banal na Dios. Tinatahoban kan saiyang kamurawayan an kalangitan, asin an daga pano kan saiyang kaomawan.

⁴Nagdadangadang siya kaiba an liwanag nin kikilat; an liwanag nagsisilyab hale sa saiyang kamot, saen natatago an saiyang kapangyarihan.

⁵Pinapadara niya an helang sa enotan niya asin pinagbobotan niya an kagadanan na magsunod saiya.

⁶Kun siya minaontok, an daga minakunogkunog; sa saiyang paghiling an mga nasyon minakubogkubog. Nagkawarasak an mayong kataposan na kabukidan; nag-urulnod an mayong kataposan na kabubuldan, an kabubuldan na saiyang linakawan kan suanoy na panahon.

⁷Nahiling ko na nagkatarakot an mga taga Cushan asin nagkurubogkubog an mga taga Midian.

⁸An mga salog daw an dahelan kan pagkaanggot mo, Kagurangnan? An dagat daw an dahelan kan saimong labi-labing kaanggotan? Naglunad ka sa mga panganoron; an panganoron nin bagyo an saimong karwahe, kan darahan mo nin kapangganahan an saimong banwaan.

⁹Nag-andam ka sa paggamit kan saimong pana, nag-andam sa pagpalayog kan saimong mga bosog. An daga nagkagaratak kan saimong kikilat.

¹⁰Kan mahiling ka kan kabukidan, tinakigan sinda; nagbulos an tubig hale sa kalangitan. Naghagubohob an katubigan sa irarom kan daga, asin nag-orolanto an saindang mga alon.

¹¹Sa kintab kan marikas mong mga bosog asin sa kinang kan saimong nagkikintab na garod, an aldaw saka an bulan dai naghiro.

¹²Sa kaanggotan, naglakaw ka sa kahiwasan kan daga; sa labi-labi mong kaanggotan, tinimaktimakan mo an mga nasyon.

¹³Nagluwas ka sa pagligtas kan saimong banwaan, sa pagligtas kan hadeng saimong pinili. Ginadan mo an pamayo kan mga maraot asin pinuho an saiyang mga parasunod.

¹⁴Tinuhog kan saimong mga bosog an pamayo kan saiyang hukbo kan ini nag-abot siring sa sarong bagyo, sa pagwarak samo, nagngingisi ini arog kan mga tawong hilom na nang-aapi kan mga dukha.

¹⁵Tinimaktimakan mo an dagat sa paagi kan saimong mga kabayo, asin an makosog na katubigan nagsurubo.

¹⁶Nadadangog ko an gabos na ini, asin tinatakigan ako; an sakong ngabil nagkikimigkimig sa takot. Nanluluya an sakong hawak, asin nagkakasiringkog an sakong mga bitis. Daing girong na hahalaton ko an pag-abot kan panahon na papadusahan nin Dios an nagsasalakay sato.

¹⁷Maski dai namumurak an mga poon nin higera asin an mga ubas mayo nin bunga, maski dai makakua nin lana nin oliba asin an kaomahan dai mamunga, maski magkagaradan an gabos na karnero asin mawaraan nin laog an mga laoman nin hayop,

¹⁸magigin maogma pa giraray ako asin magayagaya, huli ta an Kagurangnan Dios iyo an sakong paraligtas.

¹⁹An Kagurangnan Dios an nagtatao sako nin kosog. Pinapangagin niyang maingat an sakong mga bitis arog kan sa usa asin iniingatan na ligtas sa kabukidan.