Read Central Bicolano Zephaniah 2 Bible Online

Zephaniah 2 - Central Bicolano bible

Zephaniah 2

¹Daing sopog na nasyon, magtiripon kamo asin mag-orolay,

²bago kamo maalang saka magadan siring sa sarong burak, bago mag-abot saindo an naglalaad na kaanggotan nin Kagurangnan, bago mag-abot saindo an aldaw nin pagpahiling niya kan saiyang kaanggotan.

³Magbalik kamo sa Kagurangnan, kamo gabos na mapakumbabang namamanwaan kan daga, na nag-ootob kan saiyang mga pagboot. Giboha nindo an matanos, asin magpakumbaba kamo sa atubang nin Kagurangnan, ta tibaad madulagan nindo an padusa sa aldaw na ipahiling nin Kagurangnan an saiyang kaanggotan.

⁴Mayo nin matatada sa syudad nin Gaza. Maharale an mga nag-eerok sa Askelon. Sa laog nin kabangang aldaw, papahaleon an mga namamanwaan sa Asdod, asin papahaleon an mga nag-eerok sa syudad nin Ekron.

⁵Magagadan kamong mga Filisteo, kamo na mga nag-eerok sa tampi kan dagat. Hinukoman na kamo kan Kagurangnan. Gagadanon niya kamo asin mayo nin siisay man na matatada saindo.

⁶An saindong daga sa tampi kan dagat magigin mga pasabsaban, asin magigin erokan iyan kan mga pastor saka laoman kan mga karnero.

⁷An mga natatadang namamanwaan nin Juda iyo an mag-eerok sa saindong daga. Papasabsabon ninda duman an saindang mga karnero asin makatorog sinda sa mga harong sa Askelon. Iibahan sinda kan Kagurangnan na saindang Dios, asin papauswagon giraray niya sinda.

⁸An Kagurangnan nin mga hukbo nagtataram, “Nadangog ko an pagtuyatuya asin pag-olog-olog kan mga taga Moab saka Ammon sa sakong banwaan, asin naghahambog sinda na sasakopon ninda an daga kaini.

⁹Mantang ako an Dios na buhay, an Dios nin Israel, minasumpa ako na matutunaw an Moab asin an Ammon arog sa Sodoma saka Gomorra. An mga lugar na iyan magigin mga kalot nin asin, dangan magigin raot sagkod lamang, na pano nin mga doot. An mga natatada sa sakong banwaan iyo an masamsam dangan masakop kan saindang daga.”

¹⁰Siring kaiyan an pagpadusa sa mga taga Moab saka Ammon, huli kan saindang kapalangkawan asin kapaabaw-abawan patin pagtuyatuya sa banwaan kan Kagurangnan nin mga hukbo.

¹¹Tatakoton sinda nin Kagurangnan. Hahalean niya nin halaga an mga dios-dios kan daga, dangan sasambahon siya kan lambang nasyon, an lambang saro sa sadiri niyang daga.

¹²Gagadanon man nin Kagurangnan an mga taga Etiopia.

¹³Gagamiton nin Kagurangnan an saiyang kapangyarihan tanganing raoton an Asiria. An syudad nin Nineve gigibohon niyang sarong raot na lugar na mayo nin tawo, sarong mayo nin tubig na desyerto.

¹⁴Iyan magigin sarong lugar na pahingaloan kan mga karnero, mga baka asin kan gabos na klase nin hayop. An mga kuwaw mag-eerok sa mga raot na lugar kaiyan asin mahuni sa mga bintana. An mga uwak mahuni sa mga hagdan. Babakbakon an mga kahoy na sedro kan saiyang mga edipisyo.

¹⁵Iyo iyan an mangyayari sa syudad na nagpapaabaw-abaw kan saiyang kapangyarihan asin naghohona na ligtas siya. An mga namamanwaan duman naghohona na an saindang syudad iyo an pinakadakula sa bilog na kinaban. Magigin raot an lugar na iyan, sarong lugar na pagpapahingaloan kan mga lalaw na hayop! An lambang mag-agi duman masibog sa takot.