Read Central Bicolano Zephaniah 3 Bible Online

Zephaniah 3 - Central Bicolano bible

Zephaniah 3

¹Herak man sa Jerusalem, idtong maraot saka rebeldeng syudad, na nang-aapi sa sadiri niyang mga namamanwaan.

²Dai iyan nagdangog sa Kagurangnan ni nag-ako kan saiyang pagdidisiplina. Dai siya nagsarig sa Kagurangnan ni naghagad saiya nin tabang.

³An mga opisyal niya arog sa nag-uungal na mga leon; an saiyang mga hukom arog sa paslong mga lobo, na minaubos sagkod kan tolang bago mag-abot an aga.

⁴Dai malalaoman asin parapasaluib an saiyang mga propeta; an mga banal na bagay dinidigtaan kan mga padi asin an togon nin Dios saindang binibiko para sa sadiri nindang karahayan.

⁵Alagad yaon pa sa syudad an Kagurangnan; ginigibo niya an tama asin bako an sala. Aga-aga asin mayo nanggad nin palihis, pinapahilingan niya nin hustisya an saiyang banwaan. Alagad an bakong matanos na mga tawo diyan padagos na naggigibo nin maraot asin dai nasosopog.

⁶Nagtataram an Kagurangnan, “Pinara ko an mga nasyon; rinaot ko an saindang mga syudad asin binayaan kong rumpag an saindang mga kudal saka mga tore. Nagharale na an mga nag-eerok sa mga syudad; mayo nin tawo sa mga tinampo—mayo nin nawalat maski saro.

⁷Naghona ako na an sakong banwaan magalang sako asin maako kan sakong pagdidisiplina, na dai nanggad ninda malilingawan an adal na itinukdo ko sainda. Alagad dai nahaloy, nagbalik sinda sa dati nindang maraot na mga gibo.

⁸Nagtataram an Kagurangnan, “Halaton nindo ako.” Halaton nindo an aldaw nin pagtindog ko tanganing iakusar an mga nasyon. Huli ta nagdesisyon na akong tiponon an mga nasyon asin mga kahadean tanganing ipamate sainda an init kan sakuyang kaanggotan. An bilog na daga tutunawon kan kalayo nin labi-labi kong kaanggotan.

⁹“Dangan babagohon ko an mga namamanwaan kan mga nasyon, asin sako sana sinda mamimibi asin bako sa ibang mga dios. Gabos sinda makuyog sako.

¹⁰Hale sa harayong daga nin Etiopia, an nagkawararak kong banwaan madara sako nin mga dolot.

¹¹Sa panahon na iyan, kamong banwaan ko, dai na dapat masopog kan ginibo nindong pagrebelde sako. Hahaleon ko sa tahaw nindo an siisay man na mahambog saka mapaabaw-abaw, asin dai na nanggad kamo marebelde sako sa sakong banal na bulod.

¹²Iwawalat ko sa tahaw nindo an sarong mapakumbabang banwaan na madolok sako sa paghagad nin tabang.

¹³An matatada sa banwaan nin Israel dai magibo nin maraot sa kapwa, dai magpuputik o mandadaya. Magigin mauswag sinda asin matiwasay, dai sinda matatakot sa kiisay man.”

¹⁴Pag-awit asin pagkurahaw sa kaogmahan, banwaan nin Israel! Pag-ogma sa bilog mong puso, O Jerusalem!

¹⁵Inontok nin Kagurangnan an pagpadusa saimo; hinale niya an gabos mong kaiwal. An Kagurangnan, an Hade nin Israel, kaibahan mo; mayo ka na nin dahelan tanganing matakot.

¹⁶Maabot an panahon na sasabihan an Jerusalem, “Dai ka matakot, O syudad nin Sion! Pakosoga an saimong mga kamot!

¹⁷Kaibahan mo an Kagurangnan na saimong Dios; siya an paralaban na nagtatao saimo nin kapangganahan. Mawiwilihan ka nin Kagurangnan, asin tatawan ka niya nin bagong buhay sa saiyang pagkamoot. Mag-aawit siya asin mag-oogma huli saimo,

¹⁸siring kan mga nag-oogma sa aldaw nin pyesta.” An Kagurangnan nagtataram, “Hinale ko na an mga kasakitan mo, tanganing dai ka na mawaraan nin onra huli kaiyan.

¹⁹Maabot an panahon na papadusahan ko an nag-api saimo; ililigtas ko an mga lopog asin ibabalik ko sa saindang mga harong an mga itinapok. An saindang kasosopgan riribayan ko nin kaomawan asin kabantogan sa bilog na daga.

²⁰Maabot an panahon na ibabalik ko sa saindang mga harong an nagkawararak mong mga namamanwaan; gigibohon takang bantog sa bilog na kinaban asin papauswagon taka giraray.” An Kagurangnan an nagtaram.