Read Central Bicolano Haggai 2 Bible Online

Haggai 2 - Central Bicolano bible

Haggai 2

¹Kan ikabeynte y unong aldaw kan ikapitong bulan kan taon na idto, nagtaram giraray an Kagurangnan sa paagi ni propeta Hageo.

²Tinaraman niya si Hageo na sabihan si Zerubabel na gobernador nin Juda, si Josue na Halangkaw na Padi, asin an mga tawo, saka sabihan sindang,

³“Siisay sa saindo an nakahiling kan dating kagayonan kan Templong ini? Ano an paghiling nindo kaini ngunyan? Bako daw na mas marahay kun mayo na sana?

⁴Alagad dai kamo manluya. Magtrabaho kamo huli ta kaibahan nindo ako.

⁵Kan maghale kamo sa Egipto, nanuga ako na danay ko kamong iibahan. Kaibahan pa nindo ako, kaya dai kamo matakot.

⁶“Dai mahahaloy, tatanyogon ko an kalangitan asin an kinaban, an daga saka an dagat.

⁷Tatanyogon ko an gabos na nasyon, tanganing madara digdi an saindang mga kayamanan asin mapano kaiyan an Templo.

⁸Sadiri ko an gabos na plata saka bulawan kan kinaban.

⁹An bagong Templo magigin mas magayon ki sa dati, asin duman ko tatawan nin kauswagan asin katoninongan an sakong banwaan.” An Kagurangnan nin mga hukbo an nagtaram.

¹⁰Kan ikabeynte y kwatrong aldaw kan ikasiyam na bulan kan ikaduwang taon kan pagigin emperador ni Dario, an Kagurangnan nin mga hukbo nagtaram giraray ki propeta Hageo.

¹¹Nagtaram siya, “Hagadon mo sa mga padi na tawan nin desisyon an hapot na ini:

¹²Halimbawa an sarong tawo nagkua nin sarong pedaso nin kinonsagrang karne hale sa sarong sakripisyo, asin ibinugtak iyan sa saiyang bulsa, dangan madutaan kaiyan an arin man na tinapay, isisira, arak, lana nin oliba o anoman na kakanon, makokonsagra man daw an kakanon na iyan?” Kan ihinapot ini sa mga padi, nagsimbag sinda, “Dai.”

¹³Dangan naghapot si Hageo, “Halimbawa nadigtaan an sarong tawo huli ta nakaduta siya sa sarong bangkay, dangan madutaan niya an arin man sa mga kakanon na ini, madidigtaan man daw an kakanon?” Nagsimbag an mga padi, “Iyo.”

¹⁴Dangan nagsabi si Hageo, “Nagtataram an Kagurangnan na arog man kan halimbawang iyan an namamanwaan sa nasyon na ini asin sa gabos na gibo kan saindang kamot; kaya maati an gabos na idinodolot ninda sa altar.”

¹⁵An Kagurangnan nagtataram, “Horophoropa an nangyari saindo. Bago nindo pinonan an paghirahay kan Templo,

¹⁶nagduman kamo sa tinambak na trigo sa paghona na makakakua kamo nin beynteng takad, alagad sampolo sana an idtoon duman. Nagduman kamo sa laogan nin arak sa pagharok nin singkwentang galon, alagad beynte sana an idtoon duman.

¹⁷Nagpadara ako nin mainit na doros asin uran nin yelo tanganing raoton an bunga kan saindong kapagalan, alagad dai kamo nagsolsol.

¹⁸Ngunyan iyo an ikabeynte y kwatrong aldaw kan ikasiyam na bulan poon kan ibugtak an pundasyon kan Templo. Horophoropa nindo an mangyayari poon ngunyan.

¹⁹Maski mayo nang natadang trigo, asin dai nagbunga an mga ubas, an mga kahoy na higera, granada asin oliba, alagad poon ngunyan bebendisyonan ko kamo.”

²⁰Kan aldaw man sanang idto, an ikabeynte y kwatrong aldaw kan bulan, an Kagurangnan nagtao ki Hageo nin ikaduwang mensahe

²¹para ki Zerubabel na gobernador nin Juda: “Tatanyogon ko na an kalangitan saka an kinaban;

²²rurumpagon ko na an mga kahadean dangan tataposon an saindang kapangyarihan. Papabalintokon ko an mga karwahe asin an mga lunad kaiyan; magagadan an mga kabayo asin maggagaradanan an mga lunad diyan.

²³Sa aldaw na iyan, kukuahon taka, Zerubabel na sakuyang sorogoon, asin ibubugtak takang hade sa ngaran ko. Ika an napili ko.” An Kagurangnan nin mga hukbo an nagtaram.