Read Central Bicolano Zechariah 1 Bible Online

Zechariah 1 - Central Bicolano bible

Zechariah 1

¹Kan ikawalong bulan kan ikaduwang taon kan pagigin emperador ni Dario sa Persia, nag-abot an tataramon nin Kagurangnan ki Zacarias na aking lalaki ni Berekias asin makoapo ni Iddo.

²Sinabihan kan Kagurangnan nin mga hukbo si Zacarias na taraman an mga tawo nin siring, “Ako, an Kagurangnan, naaanggot sa saindong mga ginikanan,

³alagad sinasabihan ko kamo, ‘Magbalik kamo sako asin mabalik ako sa saindo.

⁴Dai kamo mag-arog sa saindong mga ginikanan. Haloy nang panahon an nag-agi kan itao sainda kan mga propeta an sakong mensahe, na magbakle na sinda sa maraot nindang pamumuhay. Alagad dai sinda nagdangog o nagkuyog sako.

⁵Gadan na an saindong mga ginikanan saka idtong mga propeta.

⁶Sa paagi kan sakong mga sorogoon, an mga propeta, an saindong mga ginikanan tinawan ko nin mga pagboot asin mga patanid, alagad dai ninda iyan pinahalagahan, kaya nagtios sinda bilang bunga kan dai ninda pagkuyog. Dangan nagbakle sinda asin nag-ako na ako, an Kagurangnan nin mga hukbo, iyo an nagpadusa sa sainda sosog sa maninigo sainda asin siring sa desisyon ko.’”

⁷Kan ikabeynte y kwatrong aldaw, kan ikaonseng bulan (an bulan nin Sebat), kan ikaduwang taon kan pagigin emperador ni Dario, nag-abot sako an mensahe nin Kagurangnan sa sarong bisyon sa pagkabanggi.

⁸Nahiling ko an sarong anghel nin Kagurangnan na naglulunad sa sarong pulang kabayo. Nag-ontok siya sa tahaw kan mga kahoy na mirto sa sarong kapantayan. Sa likodan niya igwa nin mga kabayong pula, kabang, saka puti.

⁹Hinapot ko siya, “Kagurangnan, ano an kahulogan kan mga kabayong ini?” Nagsimbag siya, “Ipapaliwanag ko an kahulogan ninda.

¹⁰Sinda an ipinadara nin Kagurangnan tanganing magsiyasat kan kinaban.”

¹¹Nagpahayag an mga kabayo sa anghel, “Nalibot mi na an bilog na kinaban asin nahiling mi na matoninong an kinaban.”

¹²Dangan nagtaram an anghel, “O Kagurangnan nin mga hukbo, setentang taon na ngunyan na naaanggot ka sa Jerusalem saka sa mga syudad nin Juda. Sagkod nuarin pa kaya bago mo ipahiling sainda an pagkaherak?”

¹³Sa makararangang mga tataramon, sinimbag nin Kagurangnan an anghel,

¹⁴dangan sinabihan ako kaini na ipahayag ko an itinaram kan Kagurangnan nin mga hukbo: “Namomotan ko nin marahay asin igwa ako nin pagmakulog sa Jerusalem, an sakong banal na syudad.

¹⁵Anggot ako nin marahay sa mga nasyon na nakakamate ngunyan nin katoninongan. Huli ta mantang pinupugolan ko an sakong kaanggotan laban sa sakong banwaan, orog pang dinagdagan kan mga nasyon an kasakitan kan sakong banwaan.

¹⁶Kaya nagbalik ako sa Jerusalem tanganing pahilingan nin pagkaherak an syudad. Papakarahayon giraray an sakong Templo asin papatindogon man an syudad.”

¹⁷Sinabihan man ako kan anghel na magpahayag: “Nagtataram an Kagurangnan nin mga hukbo na magigin mauswag giraray an saiyang mga syudad asin tatabangan niya giraray an Jerusalem saka aakoon na sadiri niya.”

¹⁸Sa saro pang bisyon, nakahiling ako nin apat na sungay.

¹⁹Hinapot ko an anghel na nakiolay sako, “Ano an kahulogan kan mga sungay na ini?” Nagsimbag siya, “Iyan an mga sungay na nagwarak kan mga taga Juda, taga Israel, asin taga Jerusalem.”

²⁰Dangan ipinahiling sako nin Kagurangnan an apat na panday na igwang kapot na mga martilyo.

²¹Naghapot ako, “Ano an tuyo kan mga lalaking ini?” Nagsimbag siya, “Napadigdi sinda sa pagtakot saka sa pagrumpag kan mga nasyon na nagronot kan daga nin Juda asin nagwarak kan mga namamanwaan duman.”