Read Central Bicolano Zechariah 11 Bible Online

Zechariah 11 - Central Bicolano bible

Zechariah 11

¹Bukasi an saimong mga pintoan, Lebanon, tanganing masulo kan kalayo an saimong mga kahoy na sedro!

²Paghibi asin paghaya, mga kahoy na sipres— nagkaturumba na an mga sedro; nagkararaot na an mamuraway na mga kahoy na idto! Paghibi asin paghaya, mga hamurawon nin Basan— purotol na an kakahoyan sa mahibog na kadlagan!

³Naghihibi an mga pamayo sa kamondoan; mayo na an saindang kamurawayan! Dangoga an ungal kan mga leon; raot na an erokan nindang kadlagan sa may Salog nin Jordan!

⁴Tinaraman ako nin Kagurangnan na sakong Dios, “Magin pastor ka kan mga karnero na bubunoon.

⁵Ginagadan sinda kan saindang mga kagsadiri asin an mga ini dai napapadusahan. Ipinapabakal ninda an karne dangan minasabi sinda, ‘Pag-omawon an Kagurangnan! Mayaman na kami!’ Maski an nagpapastor sainda dai naheherak sa sainda.” (

⁶Nagtaram an Kagurangnan, “Dai na ako maheherak sa kiisay man sa kinaban. Ako mismo an mabugtak kan gabos na banwaan sa kapangyarihan kan saindang mga pamayo. An mga pamayong ini an maraot kan kinaban, asin dai ko iyan ililigtas sa saindang kapangyarihan.”)

⁷Inalok ako kan mga tawong nagbabakal saka nagpapabakal nin karnero, kaya nagin pastor ako kan mga karnero na bubunoon. Nagkua ako nin duwang sugkod; an saro inapod kong “Biyaya” asin an ikaduwa inapod kong, “Pagkasararo.” Dangan inataman ko an mga karnero.

⁸Nauyam ako sa tolo pang pastor, na naoongis sako, asin ginadan ko sinda sa laog nin saro sanang bulan.

⁹Dangan sinabihan ko an mga karnero, “Habo na akong magin pastor nindo. Pabayae nindong magadan an magagadanon. Pabayae nindong maronot an maroronoton. An mga matada pabayae nindong maggaradanan.”

¹⁰Pakatapos kinua ko an sugkod na inapod kong “Biyaya” dangan binari ko, tanganing mawaraan nin halaga an tipan na ginibo nin Kagurangnan sa gabos na nasyon.

¹¹Kaya nawaraan nin halaga an tipan kan aldaw na idto. An mga nagbabakal saka nagpapabakal nin karnero naghihiling sako, asin aram ninda na nagtataram an Kagurangnan huli sa mga ginibo ko.

¹²Sinabihan ko sinda, “Kun boot nindo, itao nindo sako an sweldo ko; alagad kun habo kamo, saindo na.” Kaya binayadan ninda ako nin treyntang pedaso nin plata bilang sweldo ko.

¹³Tinaraman ako nin Kagurangnan, “Bugtakan an kwarta sa kaban nin yaman kan Templo.” Kaya dinara ko an treyntang pedaso nin plata—an dakulang halaga na ibinayad ninda sako—asin ibinugtak ko sa kaban nin yaman kan Templo.

¹⁴Dangan binari ko an ikaduwang sugkod, an inapod kong “Pagkasararo,” asin nawara an pagkasararo kan mga taga Juda saka kan mga taga Israel.

¹⁵Dangan tinaraman ako nin Kagurangnan, “Magin saro kang pastor giraray, alagad ngunyan, sarong pastor na mayong halaga.

¹⁶Nagbugtak ako nin sarong pastor na mamamahala kan sakong mga karnero, alagad dai niya tinatabangan an karnero na nasa kapahamakan; dai man niya hinahanap an nawara, o binobolong an nalugadan, o pinapakakan an mga natada. Kundi kinakakan niya an karne kan pinakamatabang karnero asin hinahale niya an mga kuku kaini.

¹⁷Herak man sa mayong halagang pastor na idto! Pinabayaan niya an saiyang mga karnero. Roronoton nanggad nin gera an saiyang kapangyarihan. Mawawaraan nin kosog an saiyang kamot, asin mabubuta an too niyang mata.”