Read Central Bicolano Zechariah 14 Bible Online

Zechariah 14 - Central Bicolano bible

Zechariah 14

¹Harani na an aldaw na matukaw sa paghukom an Kagurangnan. Dangan sasamsaman an Jerusalem, asin pagbabarangaon an sinamsam sa atubangan nindo.

²Titiponon nin Kagurangnan an gabos na nasyon tanganing labanan an Jerusalem. Masasakop an syudad, sasamsaman an mga harong, asin lulupigan an kababaehan. Itatapok an kabanga kan mga tawo, alagad dai bibihagon an kabanga sainda.

³Dangan maluwas an Kagurangnan asin makikilaban sa mga nasyon, arog kan pakilaban niya kaidtong panahon.

⁴Sa panahon na iyan, matindog siya sa Bukid nin mga Oliba, sa parteng sirangan kan Jerusalem. Dangan mababanga sa duwang kabtang an Bukid nin Oliba, magpoon sa sirangan sagkod sa solnopan huli sa sarong dakulang kapantayan. Mapapaduman sa amihan an kabanga kan bukid, asin sa habagat an kabanga.

⁵An kapantayan na ini na minabanga kan bukid iyo an saindong aagihan sa pagdulag. Madulag kamo arog kan mga ginikanan nindo kan maglinog sa panahon ni Hadeng Uzzias nin Juda. Dangan madatong an Kagurangnan na sakong Dios, kaiba an gabos niyang mga anghel.

⁶Pag-abot kan panahon na iyan, dai na magkakaigwa nin lipot o yelo,

⁷o kadikloman. Padagos na magkakaigwa nin liwanag maski sa pagkabanggi. An Kagurangnan sana an nakakaaram kun nuarin ini mangyayari.

⁸Pag-abot kan aldaw na iyan, mabulos hale sa Jerusalem an preskong tubig; an kabanga kaiyan mapasiring sa Gadan na Dagat asin sa Mediteraneo an kabanga. Magbubulos iyan sa bilog na taon, tig-init man o tig-lipot.

⁹Dangan paghahadean nin Kagurangnan an bilog na daga; sasambahon siya kan gabos bilang Dios asin mamimidbidan siya sa siring na ngaran.

¹⁰An bilog na daga, magpoon sa Geba sa amihan sagkod sa Rimmon sa habagat, magigin sarong kapatagan. Alagad magdadanay na halangkaw an Jerusalem ki sa ibang daga sa palibot kaini; an syudad minapoon sa Trangkahan ni Benjamin sagkod sa Trangkahan sa Kanto, sa namumugtakan kaidto kan enot na trangkahan, asin minapoon sa Tore ni Hananel sagkod sa mga pugaan nin ubas kan hade.

¹¹Duman mag-eerok na ligtas an mga tawo, huli ta mayo na nin pagkatakot na sinda pupuhoon.

¹²An Kagurangnan madara nin makangirhat na mga peste sa gabos na nasyon na nakikilaban sa Jerusalem. Maglalapa an saindang kublit maski buhay pa sinda; sagkod an saindang mga mata saka dila maglalapa.

¹³Sa panahon na iyan, riribongon sinda nin Kagurangnan, kaya dadakopon kan lambang saro an saiyang kataed dangan kukulogon.

¹⁴Makikilaban an mga taga Juda tanganing surogon an Jerusalem. Dangan titiponon ninda an kayamanan kan gabos na nasyon—bulawan, plata, asin gubing na kadakul nin marahay.

¹⁵Maabot man an mangirhat na peste sa mga kabayo, mga mula, mga kamelyo, asin sa mga asno—sa gabos na hayop na nasa kampo kan kaiwal.

¹⁶Dangan an mga matada hale sa mga nasyon na nagsalakay sa Jerusalem maduman sa Jerusalem taon-taon tanganing sambahon an Hade, an Kagurangnan nin mga hukbo, asin tanganing selebraron an Pyesta nin mga Harong-harong.

¹⁷An arin man na nasyon na dai magduman asin dai magsamba sa Hade, an Kagurangnan nin mga hukbo, dai tatawan nin uran.

¹⁸Kun dai magselebrar an mga taga Egipto kan Pyesta nin mga Harong-harong, maabot sa sainda an parehong peste na ipapadara nin Kagurangnan sa arin man na nasyon na habong magduman.

¹⁹Iyo ini an magigin padusa na maabot sa Egipto asin sa gabos na nasyon kun dai ninda selebraron an Pyesta nin mga Harong-harong.

²⁰Sa panahon na iyan, maski an mga kampanilya na nakagakod sa mga kabayo magkakaigwa kan mga tataramon na “Idinusay sa Kagurangnan.” An mga kagamitan sa pagluto sa Templo magigin sagrado man siring kan mga mangko sa atubangan kan altar.

²¹An gabos na kagamitan sa pagluto sa Jerusalem asin sa Juda lalaenon tanganing gamiton sa pagsamba sa Kagurangnan nin mga hukbo. Gagamiton an mga iyan kan mga tawong nagdodolot nin sakripisyo para sa paglabon nin karne. Pag-abot kan panahon na iyan, dai na magkakaigwa nin negosyante sa Templo kan Kagurangnan nin mga hukbo.