Read Central Bicolano Zechariah 4 Bible Online

Zechariah 4 - Central Bicolano bible

Zechariah 4

¹Duminolok giraray sako an anghel na nakiolay sako asin pinukaw ako na garo baga nagkakatorog ako.

²Hinapot niya ako, “Ano an nahihiling mo?” Nagsimbag ako, “Sarong bulawan na kandelero na igwang mangko para sa lana sa parteng ibabaw. Igwa man nin pitong ilawan an kandelero, na an lambang saro igwang pitong bugtakan nin mitsa.

³Igwa man nin duwang kahoy na oliba sa mag-ibong na parte kan kandelero.”

⁴Hinapot ko an anghel, “Ano an kahulogan kan mga bagay na ini, kagurangnan ko?”

⁵Hinapot niya ako, “Dai mo aram?” “Dai, kagurangnan,” an simbag ko.

⁶Tinaraman ako kan anghel na itao ki Zerubabel an mensaheng ini na hale sa Kagurangnan: “Magigin mauswag ka, bakong huli sa kosog nin hukbo o huli sa sadiri mong kosog, kundi huli sa sakong espiritu.

⁷Magin arog man sa bukid kadakula an olang sa atubangan mo, mawawara iyan. Ika an mapatindog giraray kan Templo, asin mantang ipinapamugtak mo an huring gapo, makurahaw an mga tawo nin, ‘Magayon, magayon!’”

⁸Saro pang mensahe an nag-abot sako hale sa Kagurangnan.

⁹Nagsabi siya, “Ibinugtak na ni Zerubabel an pundasyon kan Templo, asin tataposon niya iyan. Kun mangyari na iyan, maaaraman kan sakong banwaan na ako an nagsugo saimo sa sainda.

¹⁰Namomondo sinda huli ta maluway an dalagan kan trabaho. Alagad mahihiling nindang pinapadagos ni Zerubabel an pagtugdok kan Templo, asin maoogma sinda.”

¹¹Dangan hinapot ko siya, “Ano an kahulogan kan duwang kahoy na oliba sa mag-ibong kan kandelero?

¹²Ano man an kahulogan kan duwang sanga nin oliba sa kataed kan duwang bulawan na tubo na linuluwasan kan lana nin oliba?”

¹³Hinapot niya ako, “Dai mo aram?” Nagsimbag ako, “Dai, kagurangnan.”

¹⁴Dangan nagsabi siya, “Iyo iyan an duwang lalaking pinili nin Dios asin linahidan tanganing maglingkod saiya, an Kagurangnan kan bilog na kinaban.”

¹⁵Sinabihan ako kan anghel, “An pitong ilawan iyo an pitong mga mata kan Kagurangnan, na naghihiling sa bilog na kinaban.”