Read Central Bicolano Zechariah 8 Bible Online

Zechariah 8 - Central Bicolano bible

Zechariah 8

¹Itinao nin Kagurangnan nin mga hukbo an mensaheng ini ki Zacarias:

²“Haloy ko nang minawot na tabangan an Jerusalem huli sa dakula kong pagkamoot sa saiyang mga namamanwaan, sarong pagkamoot na nagin dahelan kan pagkaanggot ko sa saiyang mga kaiwal.

³Mabalik ako sa Jerusalem, sa banal kong syudad dangan duman ako maerok. An Jerusalem mamimidbidan na maimbod na syudad, asin an bulod kan Kagurangnan nin mga hukbo aapodon an banal na bulod.

⁴Magtuturukaw giraray sa mga plasa nin Jerusalem an gururang nang mga lalaki saka mga babae, na an lambang saro naggagamit na nin sugkod huli kan saindang edad.

⁵An mga tinampo mapapano nin nagkakarawat na mga aking lalaki saka babae.

⁶“An siring kaini pwedeng sabihon kan mga nasyon na nagkatarada na dai mangyayari, alagad bakong imposible iyan para sako.

⁷Ililigtas ko an sakong banwaan hale sa mga dagang pinagdarahan sainda,

⁸dangan ibabalik hale sa sirangan saka solnopan tanganing mag-erok sa Jerusalem. Sinda an magigin banwaan ko, asin ako an magigin Dios ninda, na maimbod saka matanos na mamamayo sainda.

⁹“Magmakosog kamo! An parehong mga tataramon na itinaram kan mga propeta kan ibinubugtak an pundasyon para sa pagpatindog giraray kan sakong Templo, iyo an saindong nadadangog ngunyan.

¹⁰Bago kan panahon na idto, mayo nin siisay man na pwedeng magtandan nin mga tawo o mga hayop, asin mayo nin ligtas sa saiyang mga kaiwal; huli ta pinangyari kong magralaban an lambang saro.

¹¹Alagad dai ko na iyan gigibohon sa mga natada sa nasyon na ini.

¹²Matoninong sindang magtatanom. Mamumunga nin ubas an saindang mga balagon, mataralubo sa daga an saindang tinanom, asin magkakaigwa nin tamang uran. Itatao ko an gabos na biyayang ini sa mga natadang namamanwaan sa sakong nasyon.

¹³Mga taga Juda asin mga taga Israel, kaidto, kun igwa nin boot na maldisyonon an mga dayuhan minasabi sindang, ‘Umabot man logod saimo an parehong maldisyon na uminabot sa Juda asin sa Israel!’ Alagad ililigtas ko kamo, dangan masabi an mga dayuhan na idto, ‘Akoon mo logod an parehong bendisyon na uminabot sa Juda asin sa Israel!’ Kaya magmaisog kamo asin dai kamo matakot.”

¹⁴Nagtataram an Kagurangnan nin mga hukbo, “Kan paanggoton ako kan saindong mga ginikanan, inisip kong maldisyonon sinda, asin dai ko liniwat an sakong inisip kundi ginibo ko iyan.

¹⁵Alagad ngunyan pinaplano kong bendisyonan an banwaan nin Jerusalem asin Juda. Kaya dai kamo matakot.

¹⁶Iyo ini an mga bagay na dapat nindong gibohon: an katotoohan sana an ipagtaram nindo sa saindong kapwa. Sa mga hukoman, itao nindo an totoong hustisya—an hustisya na nagdodolot nin katoninongan.

¹⁷Dai kamo mag-isip nin mga ikakaraot kan saindong kapwa. Dai kamo magsaksi nin putik. Ikinakaongis ko an pagputik, an inhustisya, asin an kadahasan.”

¹⁸Itinao kan Kagurangnan nin mga hukbo an mensaheng ini ki Zacarias:

¹⁹“An pag-aayuno na ginigibo sa ikaapat, ikalima, ikapito, asin ikasampolong bulan magigin mga pyesta nin kaogmahan saka kagayagayahan para sa mga taga Juda; kaya kamotan nindo an katotoohan asin an katoninongan.”

²⁰Nagtataram an Kagurangnan nin mga hukbo, “Maabot an panahon na maarabot sa Jerusalem an mga tawong hale sa dakul na syudad.

²¹An mga nag-eerok sa sarong syudad masarabi sa mga nag-eerok sa saro pang syudad, ‘Masamba kami sa Kagurangnan nin mga hukbo asin mamimibi tanganing bendisyonan. Madya, mag-iba kamo samo!’

²²Dakul na tawo asin mapangyaring mga nasyon an maabot sa Jerusalem tanganing magsamba sa Kagurangnan nin mga hukbo saka mamimibi tanganing bendisyonan.

²³Sa mga aldaw na iyan, an sampolong dayuhan madolok sa sarong Judio dangan masabi, ‘Tugote kaming makiiba saindo, huli ta nadangog ming nasa saindo an Dios.’”