Read Central Bicolano Zechariah 9 Bible Online

Zechariah 9 - Central Bicolano bible

Zechariah 9

¹Iyo ini an mensahe nin Kagurangnan: Nagboot siyang padusahan an daga nin Hadrak asin an syudad nin Damasco. Sadiri nin Kagurangnan bako sana an mga tribu nin Israel, kundi pati an pangenot na syudad nin Siria.

²An Hamat, na nasa pagdolonan nin Hadrak, sadiri man niya. Sadiri man nin Kagurangnan an mga syudad nin Tiro saka Sidon, maski mga madonong sinda.

³Nagpatindog an Tiro nin mga bantayan asin nagtambak nin plata saka bulawan, arog kan pagtambak nin alpog o laboy!

⁴Alagad kukuahon nin Kagurangnan an gabos na nasasadirihan nin Tiro, asin itatapok niya sa dagat an kayamanan kaini. Dangan gagabaon niya an syudad sa paagi nin kalayo.

⁵Mahihiling ini kan syudad nin Askelon saka matatakot. Mahihiling man iyan kan syudad nin Gaza, asin mamimiripit iyan sa kulog. Arog man kaini an mangyayari sa Ekron, kaya mawawaraan siya nin paglaom. Magagadan an hade nin Gaza; an Askelon dai na pag-eerokan.

⁶An Asdod pag-eerokan nin mga tawong gikan sa manlaen-laen na rasa. Nagtataram an Kagurangnan, “Papadukoon ko an mapalangkaw na mga Filistiong ini.

⁷An mga Filisteo dai na nanggad magkakakan nin karneng igwa pa nin dugo, o nin ibang ipinapangalad na kakanon. Magigin kaayon sa sakong banwaan an gabos na matada sa sainda, asin ibibilang sinda na saro sa mga kamaganakan sa tribu nin Juda. An Ekron magigin kaayon kan sakong banwaan arog kan mga Jebuseo.

⁸Babantayan ko an sakong daga asin dai ako matugot na pag-agihan iyan nin mga soldados. Dai na ako matugot na apihon giraray an sakong banwaan, huli ta nahiling ko kun paano sinda nagtios.”

⁹Pag-ogma, pag-ogma, banwaan nin Sion! Pagkurahaw sa kaogmahan, kamong mga taga Jerusalem! Hilinga, an saindong hade maabot na sa saindo! Maabot siyang mapandaog saka mapanggana, alagad mapakumbaba asin naglulunad sa sarong asno— sa sarong torilyo, na ogbon nin sarong asno.

¹⁰Nagtataram an Kagurangnan, “Hahaleon ko an mga panggerang karwahe sa Israel asin an mga kabayo sa Jerusalem; an mga pana na ginagamit sa gera magkakararaot. An saindong hade makikipagtipan nin katoninongan sa mga nasyon; an pagdolonan kan saiyang kahadean mapoon sa dagat sagkod sa saro pang dagat, mapoon sa Salog nin Eufrates sagkod sa mga poro kan kinaban.”

¹¹Nagtataram an Kagurangnan, “Huli kan pakikipagtipan ko saindo na sinelyohan kan dugo nin mga sakripisyo, tatalingkasan ko an saimong banwaan— talingkas sa mayong tubig na kalot nin pagtapokan.

¹²Magpuli na kamo, mga itinapok na ngunyan igwa nang paglaom; magpuli kamo sa ligtas nindong mga harong. Ngunyan tinataraman ko kamo na babayadan ko nin dobleng bendisyon an gabos na tinios nindo.

¹³An Juda gagamiton ko siring sa pana nin sarong soldados, asin an Israel arog sa mga bosog. An mga lalaki nin Sion gagamiton ko siring sa sarong espada, tanganing labanan an kalalakihan nin Grecia.”

¹⁴An Kagurangnan matunga sa ibabaw kan saiyang banwaan; garo kikilat na bubutasan niya an saiyang mga bosog. Papatanogon kan Kagurangnan Dios an trompeta, dangan mamartsa siya sa mga bagyong hale sa habagat.

¹⁵Iingatan kan Kagurangnan nin mga hukbo an saiyang banwaan, asin roronoton ninda an saindang mga kaiwal. Magkukurahaw sinda sa ralaban arog sa burat na mga lalaki asin papabuloson ninda an dugo kan saindang mga kaiwal; mabulos iyan siring sa dugo nin sarong sakripisyo na inula sa altar hale sa sarong mangko.

¹⁶Pag-abot kan aldaw na iyan, ililigtas nin Kagurangnan an saiyang banwaan, siring kan pagligtas nin sarong pastor sa saiyang mga karnero na nasa pag-alaman. Magliliwanag sinda sa saiyang daga arog sa mamahalon na bato sa sarong korona.

¹⁷Orog na magigin marahay saka magayon an daga! Huli sa trigo saka arak, orog na magigin makosog an mga hoben na lalaki asin babae.