Read Central Bicolano Malachi 2 Bible Online

Malachi 2 - Central Bicolano bible

Malachi 2

¹Nagsasabi an Kagurangnan nin mga hukbo sa mga padi, “Para sa saindo an pagboot na ini:

²Kaipuhan na omawon nindo ako sa paagi kan saindong ginigibo. Kun dai kamo magdangog sa sakong sinasabi, dadarahan ko kamo nin maldisyon. Mamaldisyonon ko man an mga biyaya na inaako nindo. Sa katunayan, minaldisyon ko na an mga iyan, huli ta dai nindo pinahalagahan an sakong pagboot.

³Papadusahan ko an saindong mga aki asin inonosnos ko an saindong lalawogon sa odo kan mga hayop na isinasakripisyo nindo—dangan itatapok kamo sa luwas sa tambakan kan mga odo.

⁴Dangan nindo maaaraman na ako an nagtao kan pagboot na ini saindo, tanganing dai lapason an sakong tipan sa mga padi, an kapagarakian ni Levi.

⁵“An tipan ko sainda sarong tipan nin buhay asin katoninongan; itinao ko iyan sainda, tanganing galangan ninda ako. Kaidto, iginalang ninda ako asin natakot sinda sako.

⁶Itinukdo ninda an tama, bakong an sala. Namuhay sinda na matoninong sa kaibahan ko; bako sanang naggibo sinda kan tama kundi kadakul pa an tinabangan ninda na mag-ontok sa paggibo kan maraot.

⁷Katongdan kan mga padi na magtukdo kan tunay na pakaaram manongod sa Dios. Kaipuhan na magdolok sa mga padi an mga tawo tanganing makanood kan sakong kabotan, huli ta sinda an mga sugo kan Kagurangnan nin mga hukbo.

⁸“Alagad ngunyan, kamong mga padi, nagsuhay kamo sa tamang dalan; an saindong katukdoan iyo an dahelan kan pagkasingkog nin dakul na tawo. Linapas nindo an tipan na ginibo ko saindo.

⁹Kaya ako, sa pagbalos, magtugot na kaongisan kamo kan banwaan nin Israel huli ta dai nindo kinuyog an sakong kabotan; may pinapalaen kamo kun nagtutukdo kamo sa sakong banwaan.”

¹⁰Bakong saro man sana an satong ama? Bakong saro sanang Dios an naglalang sato gabos? Kun siring, tadaw ta dai ta inootob an satong panuga sa satong kapwa, asin tano ta binabasang-basang ta an tipan na ginibo nin Dios sa satong mga ginikanan?

¹¹Linapas kan mga taga Juda an saindang panuga sa Dios asin naggibo sinda nin makauuyam na bagay sa Jerusalem asin sa bilog na daga. Dinigtaan ninda an Templo na namomotan nin Kagurangnan. Inagom kan mga lalaki nin Juda an mga babaeng nagsasamba sa dayuhan na mga dios-dios.

¹²Haleon logod nin Kagurangnan sa komunidad nin Israel an mga naggibo kaini, asin dai na logod tugotan na makaiba sa pagdodolot na ginigibo kan satong nasyon sa Kagurangnan nin mga hukbo.

¹³May saro pang bagay kamong ginigibo. An altar nin Kagurangnan linulunod nindo sa luha, sa paghibi asin pagtangis huli ta dai na niya inaako an mga dolot na dinadara nindo sa saiya.

¹⁴Minahapot kamo kun tano ta habo na niyang akoon an mga iyan. Huli ta aram niya na linapas nindo an saindong panuga sa babaeng inagom nindo kan mga hoben pa kamo. Siya an saindong kaiba, asin linapas nindo an saindong panuga saiya maski nanuga kamo sa atubangan nin Dios na magigin maimbod saiya.

¹⁵Bakong an Dios an nagsaro saindo sa hawak asin sa espiritu? Ano an katuyohan niya sa paggibo kaini? An katuyohan iyo na magkaigwa kamo nin mga aki na totoong diosnon. Kaya hingowahon nanggad nindo na mayo saindo nin maglapas kan saiyang panuga sa saiyang agom.

¹⁶Nagsasabi an Kagurangnan Dios nin Israel, “Ikinakaongis ko an pagsuhayan nin mag-agom. Ikinakaongis ko iyan orog na kun an saro saindo minagibo kan makuring bagay na ini sa saiyang agom. Kaya mag-ingat kamo na dai nindo malapas an saindong panuga na magin maimbod sa saindong agom.”

¹⁷Pinagal nindo an Kagurangnan huli kan saindong mga pagparataram. Alagad minahapot kamo, “Paano mi siya pinagal?” Huli sa pagsasabi nin, “Ibinibilang kan Kagurangnan nin mga hukbo na marahay an siisay man na naggigibo nin maraot, asin nawiwilihan niya sinda.” O huli sa paghapot nin, “Haen na an Dios nin hustisya?”