Read Central Bicolano Malachi 4 Bible Online

Malachi 4 - Central Bicolano bible

Malachi 4

¹Nagsasabi an Kagurangnan nin mga hukbo, “Nagdadangadang an aldaw na susuloon siring sa dagami an gabos na mapaabaw-abaw saka mga maraot na tawo. Sa aldaw na iyan, matututong sinda, asin mayo nin matatada sa sainda.

²Alagad sa saindo na nagkukuyog sa sako, masirang sa saindo arog kan aldaw an sakong nakakaligtas na kapangyarihan, asin magdadara iyan nin kaomayan arog kan saldang kan aldaw. Magigin talingkas asin maogma kamo siring sa mga ogbon nin baka na pinaluwas sa toril.

³Sa aldaw na humiro ako, madadaog nindo an mga maraot na tawo, asin makakaagid sinda sa alpog sa irarom kan saindong mga bitis.

⁴“Giromdoma nindo an katukdoan kan sakong sorogoon na si Moises, an mga togon saka mga pagboot na itinao ko saiya sa Bukid nin Sinai na dapat kuyogon kan gabos na tawo sa Israel.

⁵“Alagad bago dumatong an dakula saka makangirhat na aldaw nin Kagurangnan, ipapadara ko saindo an propetang si Elias.

⁶Gigibohon niyang magharani giraray an boot kan mga mag-arama; kun dai niya iyan magibo, ako na an madatong sa pagraot kan daga.”